真人騷
十年《紀念日》唔係結婚日 方力申：傳得多好大壓力！
嗰頭見到行家成群結隊攞大台十年服務金牌，呢頭見到葉念琛愛情電影十週年，連《獨家試愛》男女主角都行埋咗已經十年，名副其實的《紀念日》，名副其實的「人生可以有幾個十年」。
其實從男孩子，長大成男子漢，原來用不着十年，五年已經足夠。五年前和宣傳《人約黃昏後》的方力申做訪問，他還在用他的那套拒絕長大：「因為做呢行成日扮演比實際年齡細嘅角色，成日覺得自己仲細，時間仲好多。」
五年以後，同樣是我，同一個攝影師，還是方力申，話題卻已經天翻地覆：會談起生兒育兒：「成日留意朋友嘅仔女，𠵱家啲細路好難教，身邊都有唔少現眼報。不過我有信心會做個好爸爸，因為我自己都係個孝順仔。」
會講到儲備彈藥：「我成副身家都喺藝術品度，以前貪平買新畫家，𠵱家會諗反正地方有限，不如一次過買幅貴嘅。以前會貪得意乜都買乜都儲，𠵱家要儲下彈藥，樓價就跌㗎喇！」
說起鄧麗欣，會像是老夫老妻：「琴日先講起，舊年買個麵包機，成年都仲擺喺度包裝都未拆……我唔係話佢，我邊敢話佢！」唯獨係結婚，一年閒閒哋傳幾次，傳到日期時間、禮金數目都實一實似層層，當事人反而話未諗住：「寫得多，知道原來真係好多人關心，反而有壓力，會諗，我係唔係真係可以令呢件事完美呢？會如你哋所願好幸福呢？萬一是旦一方面做得唔好，你哋會唔會失望呢？」
說到年少時反叛過，試過半個鐘食七支煙食到嘔食到怕，方力申用了一個形容詞「物極必反」。愛情又何嘗唔係呢？已經一齊住，仲要拍住十年上演旺角愛情故事，一年到頭回應記者問題離唔開三幅被「幾時結？」「係唔係結？」，你估個個係海綿蛋糕同 Baby？樂此不疲做大龍鳳？
結婚生仔，諗下都覺得難！
開始對小朋友的話題有興趣？
唔係呀，尤其係𠵱家呢個年代嘅小朋友太叻，永遠同大人就係一種鬥力……有得 train？唔係㗎，我年紀大（下年 2月 36歲）先至生，就算我唔縱，我爹媽都會縱！其實我由細到大都好鍾意細路仔，但有一排唔鍾意。香港同城市嘅小朋友乜都掉，俾咩佢都掉，但係去山區探訪，無論俾啲乜，佢捉到實一實……太明顯，俾一粒糖，佢問可唔可以要多粒，返去攞俾細佬。佢哋好懂事，覺得嗰樣嘢好珍貴，知道珍惜、知道分享。我唔係怪啲家長，環境係咁……有啲有錢人朋友，我嘗試同佢哋嘅細路講下，嗱，呢個世界好多人冇車坐、連飯都冇得食，佢話喎：「我唔識呢啲人，我識個個有司機！」國際學校嗰啲仲難教，講平等講自由……好難。
你對自己冇信心咩？
我唔係話唔生小朋友，係覺得要教，好難。
起碼你同以前唔同，大個仔，會諗教仔。
我都有信心可以做個好爸爸，因為我覺得我自己係好仔，生出嚟嘅小朋友肯定會模仿。人人都識講，你點對父母，兒女將來點對你，我好快已經喺身邊見到現眼報，仲要問：「點解個女咁對我？」其實佢都係咁對自己父母啫嘛！
你呢？你嘅父母喺屋企好威嚴，高高在上？
係呀好嚴㗎，會聽父母話珍惜食物，細細個出街從來唔敢叫汽水、因為貴吖，我最記得㗎喇，好想飲都冇得叫汽水。我老竇唔打，阿媽就打手板、打屁股。
《紀念日》就係講緊結婚十年，好唔好有小朋友行到婚姻下一步，你呢？有冇諗過，有冇同 Stephy傾過幾時結婚，行到下一步？
有諗過結婚生仔，但係未諗過幾時。我覺得生小朋友最重要唔係經濟能力，而係時間，小朋友一定要係自己湊先至教得好，先至俾到一個好嘅成長環境。
所謂嘅好嘅成長環境即係點？你喺邊度大？
好環境即係要睇住佢囉，即係唔好俾佢識啲損友囉……不過我喺薄扶林區大，除咗返學就係練水，都俾我識到啲損友，都反叛過一段時間。
你都反叛過，點反叛呢？
食煙講粗口囉，試過喺學校講俾先生罰，又試過食煙，成班人一齊覺得好好玩，喺朋友屋企食第一支，不過食咗一個月就冇食……因為玩吖嘛，半個鐘頭食咗七支煙，食到個人好暈，搭小巴返屋企一落車就嘔……呢啲叫物極必反。
同 Stephy有冇傾結婚生仔？
冇呀！
點解冇傾呢？定係你唔使傾都知佢諗咩？
咁大家一齊差唔多十年，步伐一定係一致嘅，但真係冇攞出嚟傾。
厭唔厭呢，作為當事人，一年傳幾次結婚，次次講到實一實，禮金日子去邊度渡蜜月都講埋？
我又唔覺得厭，真係慣咗。但係講得多，點都有啲影響。因為講得多，反而多咗壓力，二嚟更加唔想。唔係賭氣，係有陣時幾多月幾多號邊間酒店都寫埋，我又真係唔想做完啲人話：都話啦，一早寫咗另一方面，寫得多，知道原來真係好多朋友 fans好關心，又會諗，我係唔係真係可以令呢件事完美呢……會如你哋所願好幸福呢……萬一是旦一方面做得唔好，你哋會唔會失望呢？另外仲有一樣嘢，我哋兩個都喺呢行，呢行嘅人想法單純啲、成日演都係演啲後生過實際年齡嘅角色。身邊朋友亦都係，四十幾歲結婚生仔大有人在，我哋冇嗰種壓力，幾時要結婚、幾時要生仔，唔係就會遲……係會令到冇咗個時間框框，仲覺得自己好年輕。
唔係話 Stephy，我邊敢話 Stephy！
前幾年冇個框框，但係都 35歲入行 15年，有冇突然間覺得，原來自己都唔細？
梗係有，會覺得時間過得好快，距離我第一次做男主角都已經十年。我哋拍套戲上年同 Stephy、葉念琛開會，第一條問題就係問大家呢十年有咩唔同。真係好多唔同，轉過公司、去過內地，婆婆過咗身，朋友都有人走咗，病嘅又有、意外都有，咁多變化，竟然都仲可以同 Paco、導演、 Stephy一齊拍呢套戲，都竟然仲有觀眾仲想睇我哋，所以呢套戲我哋都係當自己嘅一樣，每日十幾個鐘頭宣傳，幾辛苦都要做。
十年以來，你自身有咩改變？
梗係好多，《獨家試愛》係我第一次做男主角，十年嚟我都做咗廿套電影男主角，工作上唔同。人大咗，會念舊多咗、會重情義多咗。
係囉，出邊咁多變化，你哋兩個仲係一齊。你哋當年都係因為呢套戲撻着，某程度上《紀念日》都紀念緊你哋成長？
係，我哋係因為《獨家試愛》嘅宣傳而一齊，跟住又合唱歌，又做嘢，在公在私都好有意義，佢（ Stephy)係我事業上好重要嘅一個人。
在公在私都咁關係密切，到底好唔好？
有好有唔好，合作方面有默契有信任當然唔同，但係都會因為工作上嘅拗撬影響咗私人情緒。唔係拍戲，其實我哋兩個都盡量少講工作，因為往往講工作意見都會唔一致。所以劇本我哋好少返屋企講，去到現場聽導演話。
有啲咩工作上嘅話題會唔一致？
好多㗎，幾乎講咩都唔一致，我話呢樣好，佢話呢樣唔好。我話嗰樣好，佢又會話嗰樣唔好。一講工作就會，所以佢做嘢，我通常都唔會參與意見。
套戲係講你喺呢段十年婚姻出現第三者？
其實主要問題唔係第三者。一段十年婚姻照計應該好堅固，唔係一個第三者就可以拆得散，反而係生活、家庭一啲更深入嘅問題，有啲嘢平時唔講，嗌交嘅時候攞出嚟講，其實啲問題一直都喺度。
我最近不約而同聽到幾個人講，幾十年婚姻，出現一定唔止一男一女，最後維繫到一夫一妻，係好彩。你覺得呢？
我唔知呀，我又未遇到……可能我哋兩個仲好後生，大家仲係俾緊大家最好嗰一面對方睇，無論外在定內在……我唔知未來會係點，當然唔希望
套戲入面有個好傻好天真嘅廿歲女對你好主動，現實中冇咩？冇𡃁妹主動埋你身？
戲入面個 Joy係好後生，好崇拜擁戴我，但屋企個老婆就從來唔會讚老公，我都想，有個人好崇拜我，但係冇。
Stephy唔崇拜你咩？
應該……冇……以我認識嘅佢，冇……你可以去問下佢。我諗欣賞囉，未去到崇拜。
佢喺屋企有冇老虎乸嘅特質？
咁又冇……係強嘅，但未去到老虎乸。因為佢成長環境、因為佢有事業，佢係強，但未去到要控制我嘅地步，唔係野蠻唔講道理嗰種。
太遠嘅嘢唔去諗，煩惱都少啲！
十年都冇其他誘惑，係因為你太愛 Stephy見唔到其他人？
唔係喎，可能我未遇到咋喎！
即係你唔擔保自己有定力？
唔擔保㗎！
做咩對自己咁冇信心？
唔係！我嘅人保守啫，唔想樣樣嘢都講到咁實！十年喇，十年我覺得唔容易，但對我哋兩個嚟講又唔覺得好長，好似眨下眼，咁就過咗。
十年喇， Stephy有冇融入家中，跟你媽媽學整北方餃子？
冇喎，佢鍾意食，但冇煮。琴日先至講佢，一年前買咗個麵包機返嚟，一年後仲係原封不動包裝都冇拆，款都舊喇，不如送俾人。跟住佢又話：「係喇係喇，食咁多麵包太甜唔係咁好！我哋都唔係成日食麵包㗎」
咁佢又買？你呢？你大個仔又會買啲咩大玩具？
我冇話佢，我邊敢話佢……我都有買，買模型啦，三千蚊一隻嗰啲超級英雄模型啦，萬幾蚊嘅 Michael Jackson或者 Michael Jordon簽名啦，人哋話會升值吖嘛……仲有畫。
張智霖最貴嗰覆都升值到三百萬，你呢？
係呀，我都有同佢傾過呢啲，佢買畫仲買相。但係我冇佢搵咁多錢，個起跑線冇佢咁高，我買唔起幾百萬嘅畫，咪買啲幾十萬嘅囉。我成副身家都擺喺藝術品，都叫做有過一百萬嘅收藏。我初時都係買新畫家，就好似買 8字頭嘅創業板一樣，估估下，有賺有蝕，𠵱家慢慢學識要忍，儲多啲至買啲有名氣嘅畫家。地方有限，不如儲多啲錢買一幅精品。
有冇目標呢？有朝一日我都買幅三百萬、一千萬嘅？
暫時唔喇，要儲現金買樓！
仲未買樓？成日傳你兩個買咗愛巢喎！
未㗎，樓市就嚟跌，所以要儲定啲彈藥喇……都唔係嘅，仲有買簽名嘢，不過大錢唔使住，淨係使啲細錢先。
做你都幾好，事業有自己嘅代表作，感情穩定，形象又幾好，十幾年前入行時有冇諗過行到邊一步？
冇㗎，我十九歲拍完《 Y2K》叫做做過下演員，都冇諗過自己會真係入呢行，冇諗過會行到今日。仲以為會繼續游水，會去美國讀大學。到真係入行，就當佢係自己事業，冇諗過應該要接咩戲，應該要點經營自己形象，我淨係會諗手頭嘅工作點做好、點樣係工作中咁享受。我冇計太遠，其實可以主動啲，諗遠啲，但係我係嗰啲人，容易啲滿足，更想留返啲時間精神去享受自己生活，所以我個人有樣好，冇咩煩惱。
下一個十年呢？有冇比 19歲時更有目標？
我希望亦都相信十年後仲會喺呢行，我相信會比𠵱家更好……唔好我就唔做喇，又唔係冇得揀，仲可以做其他嘢，開畫廊教游水開健身室㗎嘛，可能賣奶粉，大隻奶粉添！
下一個十年嘅畫面，仲有 Stephy？
嘩……呢個問題……梗係想啦，想有多十年二十年，但係冇嘢保證得到，可能我未夠十年已經死咗呢？唔敢諗太多，因為上個十年已經太多改變，冇嘢保證得到，我唔覺得咁係消極，我覺得唔需要諗咁遠。可能我運動員出身，太遠嘅嘢唔會諗，唔會想十年後住淺水灣，淨係會諗我𠵱家嘅錢夠買咩樓。
滿城盡帶万刀甲
其實「滿城盡帶万刀甲」唔係得個講字，係真係老是常出現。
尤其万刀甲架 Benz，喺駕駛討論區最出名，出名在曾經直出迴旋處，望都冇望過。
係方力申講先嘅：「我知，滿城盡帶万刀甲吖嘛！」，方力申亦都知，佢有條片幾乎全港司機都睇過：「你又知係我揸？車牌係啫嘛，有人認到我咩？」
咁又係，條片真係影唔到司機個樣。
不過全世界都當係你，有分別咩？
撰文：朱小博
攝影：范仲良
化妝： Yen Lai
髮型： Vince Pang@ IL COLPO PLATINUM
服裝： Injury、 WHYRED
|
鍾意就快D Share啦！
|
|
|
