探熱針
李思捷放蚊藐爆 YouTuber薑檸樂還拖：佢缺氧
無綫為求創新，邀請一班網絡紅人拍真人騷《網絡挑機》，更講明「節目要爆」，但原來得個講字。 YouTuber伍公子率先踢爆，不滿自己在節目中狂插汪阿姐唱歌難聽的片段被剪走，於是帶頭叫大家罷睇。但真正激起一班 YouTuber怒火的，是自命才子的李思捷，拍攝時不停放蚊藐爆，又狂寸他們「零創意」。事後李思捷自知樣衰唔俾無綫播出街，大台為保自己人即時河蟹片段。
編導岑應帶住薑檸樂一組人去睇《今晚睇李》，嗰晚嘉賓係夏韶聲，佢哋等節目錄完去訪問李思捷。點知一埋去，李生已經擺晒款藐爆，仲兜口兜面話：『你哋著到咁樣嚟見我！』然後未等人哋開始講嘢，就睇錶兇人：『我俾三十秒你哋，講』跟住就開始倒數。擺明玩嘢，仲可以講乜。後來 Kibi問佢點樣做好一個整蠱節目。人哋一路問，佢一路放蚊，好冇禮貌。倒數完三十秒，佢寸爆咁話：『冇嘢講呀！冇就學咩人講創意。我收好貴，如果喺度教你，收番錢。』」
施壓冰封冇品片
據悉編導岑應當場亦「 O嘴」，在旁聽住訪問的豹哥單立文惟有出口打圓場。「我都做咗好多年，都知點運作，不如問我。」
成功大蝦細，但事後李思捷卻向高層施壓，要將冇品藐人片段冰封唔准出街。由李思捷孭飛的《今晚睇李》一直被網民插爆抄橋兼低俗，李思捷乘機踩班 YouTuber，擺明報仇。
週一（三十日）晚，被欺凌的薑檸樂和 Ruby接受本刊訪問，對於李思捷的冇品行為，只有無奈。「多謝佢令我多咗個訪問，我會再練習吓！（有冇嬲佢咁寸？）可能佢缺氧啫！（係咪有睇開佢啲節目，知佢為人係咁？）我好耐冇睇 TVB，《今晚睇李》都冇睇過，對上一次睇佢係《福祿壽》。佢睇錶，可能係趕收工。」薑檸樂說。
而 Ruby則說：「佢可能以為拍緊戲，不過多謝佢激起我心中團火，特別係佢數三十秒嗰陣，我知自己轉數唔快，下次要做好啲！」
司徒夾帶眼火爆
《網絡挑機》開宗明義請班網絡紅人上節目，公開挑機 TVB，真實地反映網民心聲。以為大台突然開竅，點知本週一首集出街，帶頭挑機大台的司徒夾帶，發現唔少精句遭河蟹， YouTuber最後淪為吹捧大台的工具！
司徒夾帶睇完眼火爆，尤其與徒弟 Miss Hunny挑戰阿叻的部分，佢話完全貨不對辦。「錄影時我話獨大就腐敗，政治同娛樂一樣」，點知出街佢剪走後半句，有啲嘢未講完已經 cut番去叻哥度，搞到阿叻自問自答。我印象中佢都有認同我哋批評 TVB，但都 cut埋，淨係抽咗一啲叻哥企喺 TVB嗰邊嘅內容。」被剪走的大部分內容，最令司徒夾帶有印象的，是連阿叻都冇睇大台劇，「佢話冇睇《愛•回家》，某啲節目都唔睇。」明晒。
撰文、攝影、攝錄：娛樂組
|
鍾意就快D Share啦！
|
|
|
