2016年1月14日 星期四

白蝕白做 「高司奶」幫師奶買餸 [壹週刊 - 1349 - 財經] __,M1,

嘉倫(左)想要健康生活,Inky(右)想要學廚,令自己「package」更吸引。上年一月開始,兩人一拍即合,一同實行高司奶這個構思。壹盤生意白蝕白做 「高司奶」幫師奶買餸每日返工朝九晚六,放工街市已經閂門,想自己煮餐飯談何容易。上年一月,兩個八十後姜嘉倫及謝雅櫻(Inky),辭去各自的設計和銷售工作,創辦「高司奶」,一朝早替沙田區的OL客到街市買餸,讓她們放工後在火炭銀禧街市取貨,買滿二百蚊甚至可 ...


嘉倫(左)想要健康生活, Inky(右)想要學廚,令自己「 package」更吸引。上年一月開始,兩人一拍即合,一同實行高司奶這個構思。

壹盤生意

白蝕白做 「高司奶」幫師奶買餸

每日返工朝九晚六,放工街市已經閂門,想自己煮餐飯談何容易。上年一月,兩個八十後姜嘉倫及謝雅櫻( Inky),辭去各自的設計和銷售工作,創辦「高司奶」,一朝早替沙田區的 OL客到街市買餸,讓她們放工後在火炭銀禧街市取貨,買滿二百蚊甚至可直送府上。

營運一個新鮮的生意模式,燒錢在所難免。單計上個月,「高司奶」已蝕近七萬。兩位老闆要同時兼顧宣傳、門市、採購、物流等多個範疇,到底是會帶領潮流、改變大家買餸習慣,還是銀彈先盡呢?且看看他們的盤算。

網上買衫已經流行了好幾年,高司奶網上買餸,確定收貨才付款。擔心網上交易安全的人,都可以放心使用。

Inky及嘉倫二人,年初開發「高司奶」 app,放上琳瑯滿目的蔬果肉類,供客人挑選認購;到六月再租用火炭銀禧街市地鋪,目的是以 O2O( online to offline)形式,讓客人在門市取貨減低物流成本。二人有意將此模式在各區複製。在 app上,連柴米油鹽都有,但主打是各種鮮肉、蔬菜,亦有配搭好的「今晚食乜餸」。

「例如三杯雞、番茄紅蘿蔔大眼雞湯,我哋幫佢配埋醃料及香料等,方便佢哋諗少樣嘢。」他們主攻中產市場,貨品都迎合中產口味,如力推本地出產的黑毛豬、嘉美雞、有機菜,就算是內地來港的蔬菜,都標明是香港人經營的農場所出。具體運作,是每朝早七點,嘉倫將前一晚收到的訂單,傳給大埔街市的相關商販,十一點截單前有加單會再通知。從大埔取貨回銀禧街市,便直接放入雪櫃不再處理,負責買餸的嘉倫解釋:「蔬菜通常客人鍾意自己洗,而肉類如果先切好會無咁新鮮。」

雖然仍要蝕錢,但 Inky及嘉倫勝在年輕有衝勁,左度右度,希望在各個範疇能改良出一套賺錢模式:

採購 直接左手交右手

街市婆賣菜,都能養活一家大小,高司奶「搞咁多嘢」卻倒蝕七萬。主要原因,是貨價不夠平。由於攞批發需要大量入貨,而高司奶只靠網上落單客源不足,只好直接在街市購買。現時嘉倫每朝在大埔街市入貨,「對比其他街市,大埔的選擇最多。最初好多檔口老闆,見我係後生仔,覺得我搞搞震,頭一個月惟有當散客買。佢哋之後見我真係長期幫襯,就俾我記賬月結,並按零售價減一至兩成俾貨。」嘉倫指目前做法是迫不得已,「我哋定價不能太高,結果去零售店入貨,等於『轉售』,左手交右手。七萬的營業額中,買餸已經佔了五萬,毛利只有一成多,還要計其他開支。」

買滿二百元的客戶可以選擇下午四時至八時送貨至家中,暫時人手不足,嘉倫多數會親自送貨。

高司奶的門市放了多個凍櫃,有來自丹麥的有機果汁,前一期《壹盤生意》介紹過的西餐懶人包在這裡亦找得到。

《改良》

嘉倫強調將來不會持續在街市買貨,目前是投資期,到有一定生意,便會到批發市場取貨。「街市同批發價嘅差距,喺保鮮期短的蔬菜、鮮肉,分別最大,價錢可以相差四、五倍。」其實高司奶每月營業額七萬元,和一個菜檔差不多,所以他們除發展沙田區,亦開拓更多新區,希望蔬菜肉類等各自都有七至十萬元生意額,這樣就可到批發商提貨,大幅降低來貨價。

宣傳 伺服器飽和

火炭銀禧街市這個鋪位是高司奶的試點,將來發展的新鋪都會以這個 O2O( Online to Offline)模式實行。

要谷大生意,就要多加宣傳。不過負責 marketing的 Inky指,預算不多,「保守起見,當初只用了十多萬在 app上,打算運作過覺得可行,才繼續優化。」 app版面設計未完善,伺服器的容量亦已接近飽和, Inky怕大加宣傳後,可能會逼爆伺服器。

「現時能做的,是增加現有用戶的活躍度。」 Inky試過用 WhatsApp將訊息傳給所有客戶,結果因濫發被封鎖, Inky想出對策:「我將客人分類,好似交通燈分紅、黃、綠。紅色代表唔活躍,有大減價才傳給他們;黃色代表試用客戶,有新貨、小贈品就通知他們,希望轉為綠色;綠色代表活躍,例如當天有新鮮的魚,就會問他們要不要。若果由綠轉紅,我們會致電,希望了解是否我們的服務有不足。」

《改良》

Inky說, app正改良中,一旦版面改善、令只能容納數百人的系統升級至容納五千人,就會開始在沙田區擺街站宣傳,「會搞推廣,如居民下載並落單,就有豉油送。又會有推介的優惠,務求讓更多人接觸。」目前高司奶有六千個用家,其中九十多個用家至少每兩星期使用一次。 Inky目標是經過一連串宣傳後,有二十多萬戶的沙田區,最終會有 1%的活躍用家,即二千多人會持續使用。

人手 要似經紀湊客

Inky(左)長駐鋪頭,與大多數客人都很熟絡,經常推介各種新產品給他們。今日這位帶着小狗的熟客,由家務助理介紹,前來選購新鮮的白蘑菇給愛犬。

要錢就要找投資者, Inky及嘉倫後來找到朋友 Thomas入股,近兩個月 Thomas更辭去金融工作,全職搞高司奶。目前高司奶除了三位老闆身兼多職踢晒腳,並聘請了四位兼職看鋪、做客服。客服的工作主要是處理出問題的訂單,「有時張單有奇怪,普通一餐餸,加上三斤薯仔,要打去確認。若那天沒有紅衫魚,又要聯絡客戶,問他要不要換其他魚。另外有些客還會同我傾煮餸經,我會趁機提議新菜式,問他們要不要試煮,所以員工都要好似經紀咁湊客。」

《改良》

Thomas計過數,要做到收支平衡,每月要有二十萬生意額,即是平均每日要做六千七百元生意。屆時從批發商取貨的價錢可大跌七至八成,當然其他開支又會有所增加。

人手上,例如從批發商買菜,需要有人處理,亦要磅重後入袋。而原有客戶服務團隊亦要擴大,「現時主要我湊客,但將來我無可能湊咁多客。要請員工湊客成本高,不過好處是他們若有特別要求,如明日想食龍躉,我們都可代買,更能滿足顧客要求。」

Thomas會增添日用品給客戶選擇,「因為滿二百蚊會有免費送貨服務,通常一餐餸買唔到二百蚊,所以除了白米、醬油外,將來連紙巾、肥皂都會賣。」 Thomas了解過物流行情,「送貨時間主要是下午五至七時那段時間,該個鐘數貨車司機無生意做,所以租貨車送貨只需百二蚊一個鐘。」不過要儲存那批日用品,亦要花一筆倉租。

集資助改良

高司奶主攻中產市場,店面擺放了小量貴價食材,圖中的溫室燒烤菇 48元一磅,右上方的溫室甘筍仔 18元一磅,於門市取貨的客戶見到食材夠新鮮會即場購買。

雖然有隱憂,不過他們確信高司奶能改變香港人買餸的習慣,所以定好目標盡快增加市場佔有率, Thomas正利用之前從事金融業擁有的人脈,為這盤生意帶來投資者,「我已經同幾個分別從事金融、食品的投資者洽談。進度去到一半,有信心他們真的會注資。」他們的目標是集資五百萬元,其中二百萬會用作打入九龍區,租鋪、宣傳、增聘人手方面。「首先目標是奧運站幾個中產屋苑,嗰度只有超級市場,但就無街市,好有潛力!」

開業資料:

租金 $92,000(三按一上)

App $300,000

器具 $150,000

裝修 $30,000

牌費 $35,000

總投資 $607,000

營業資料:

營業額 $70,000

租金 $23,000

人工 $60,000(三名老闆、四名兼職)

食材 $50,000

雜費 $5,000

虧蝕 $68,000

專家意見

王利民(左)受邀請給高司奶一點意見,其間 Inky(右)不忘說服他入股,王利民欣賞高司奶的構思,不過現時生意額未能吸引到他。

康宏金融主席兼執行董事王利民,是愛煮餸之人,亦曾考慮過做這類生意。他認同有需求,但商業模式應怎樣做,他也未想到。

1.要有重點推薦。要有些貨品係好特別嘅,只能向他們買,這樣就會有必要性去使用高司奶。例如他們有個精選扎肉,就要放在 app的當眼處。

2.加入宴客菜式。例如羊架,煮給一班朋友去食,容易煮又好食,口碑在朋友間建立。而主人家有滿足感,就返唔到轉頭,一定會繼續煮。

3.人手方面,加一倍人唔等於能做多一倍生意,如果有一個好的系統,計劃好工作程序,有一百還是二百個員工,分別不大。

撰文:孫樂祈

攝影:鄭樹清

攝錄:廖健昌

ed_bn@nextdigital.com.hk


鍾意就快D Share啦!
Related Posts Plugin for WordPress, Blogger...