探熱針
金牌唔係盾牌 戚其義黃德斌被剷走
在無綫拍過多套經典劇，被封為金牌監製的戚其義，前年離大台北上外闖；不過金牌唔係盾牌，首度在內地開劇的他，與男主角兼投資者張翰意見相左鬧翻，結果半途被踢走，連帶在劇中做男配角的好兄弟黃德斌，亦因受牽連被硬飛，演活一幕真人版「刀下不留人」。
有錢話事
一一年推出的《天與地》被喻為「神劇」後，戚其義被冠以金牌監製光環，前年他決定與兄弟班編劇周旭明外闖，成立工作室北上發圍。去年九月，戚其義創業頭炮打鑼，以華策影視牌頭，開拍以邵逸夫一生傳奇為藍本的內地劇《傳奇大亨》；習慣用自己的班底，安插「巴打」黃德斌，及在《火舞黃沙》飾演「兔唇女」響朵的周家怡入組，助二人打內地市場。
豈料北上頭炮竟遇滑鐵盧。據悉，劇集開拍不久，阿戚便與男主角兼投資者之一的張翰意見分歧，二人經常吵大鑊，就算孭住香港金牌監製招牌，但猛虎不及地頭蟲，拍攝中途，男主角張翰決定落手，換導演，踢走戚其義。
過往在大台，珍姐曾勵珍放手任由阿戚自己話事，素有自己一套的他，始終未適應內地作風，投資者才是最終話事人的遊戲規則，結果一開始，便跟擁有話事權的張翰發生磨擦。
留低周家怡
戚其義冇得留低，失光環的黃德斌亦被牽連。在劇中飾演男主角胞兄「顧若下」的黃德斌佔戲甚重，以為戲份已拍了三分一，可以安全過渡，但最後同阿戚一樣命運，角色由內地演員譚凱補替，重新嚟過！
「阿戚俾人換咗，作為老友，德斌梗係好冇癮，拍到中途仲連自己都照俾人踢走，大家心知係咩事！佢係阿戚嘅人，自然睇佢唔順眼，唔想益佢。投資方大把錢，搵譚凱頂替重新拍過晒黃德斌之前拍咗嘅戲份；好在佢孭正嘅《刀下留人》收得，德斌總算爭番啖氣。不過周家怡就冇事，因為佢佔戲好少。」一名內地劇組人員爆。
有辣有唔辣
人人爭住賺人仔，不過北水唔係個個港星都啱飲，有二打六賺到笑，亦有花旦撈唔掂要回流，北上搵食，規則大不同。
《佘詩曼返頭》
11年佘詩曼離巢，傳她以千五萬人仔簽約內地經理人公司，兩年間拍過兩部內地劇《建元風雲》（後改名《忽必烈傳奇》）及《嫁入豪門》，可惜兩劇收視麻麻，未能令阿佘在內地企穩， 13年決定回流娘家再搏過。
《康華密食》
反之綠葉北上搵食，冇地位包袱容易吃得開。繼苑瓊丹之後， 05年康華返內地拍劇搵出路，由於唔計較戲份，密食當三番，故由 05年至 15年共拍十三部， 10年憑《八仙全傳》的何仙姑一角跑出，有指在內地密接劇的她，搵過千萬。
撰文、攝影、攝錄：娛樂組
|
鍾意就快D Share啦！
|
|
|
