雖然有糧出，不過麥明詩都要慳住使，跟朋友排隊食澳牛。
娛樂偵訊
出雪櫃 麥明詩簽五年終於有糧出
十優港姐冠軍麥明詩候選期間人氣爆燈，更成為 15年度搜尋人物排行榜第三位，無綫咬住唔放，要求簽十年長約，有意從政做娛圈純玩的她還價兩年，雙方拉鋸四個多月，每月得一千六百蚊車馬費的麥明詩終肯讓步，甘願被綁五年。自此有糧出，唔使再問屋企攞錢。
執番靚個樣
上週二（一月五日），鬥完靚攞埋獎即鬆懈，搞到殘爆凸腩的麥明詩，上午十一點已經由漾日居屋企，去到北角木星街一間美容院扮靚。
「 Louisa（麥明詩）落實簽 TVB後，樂大媽（易玲）第一時間叫佢減肥，起碼要減八至十磅，因為嚟緊安排咗佢試鏡推佢拍電影； Louisa都唔敢拖，即刻積極番，除咗減肥，仲要搞番靚啲皮膚。」知情者說。
扮靚一粒鐘，麥明詩離開美容院搭港鐵過佐敦，當日她約了個 TB打扮的朋友去食「澳洲牛奶」，午飯時間大排長龍，二人在門口邊吹水邊等位，之後坐低食唔夠廿分鐘，再轉場到附近的「仙跡岩」食紅豆冰繼續傾。
改例縮皮
據了解，麥明詩跟同是港姐出身的陳凱琳、蔡思貝一樣待遇，起薪點接近三萬，但無綫去年改例，取消港姐在任期間的一萬元月薪，變成一年兩萬蚊車馬費；因此，除非當選後立即簽約，否則大部分時間接慈善 job的港姐，要接到廣告和商演，才有收入。
「由十年開始，拗到八年， Louisa都唔肯落筆，大台都係一貫做法，唔聽話就冇嘢俾你做，所以 Louisa除咗出席慈善活動，就冇其他，反而季軍（郭嘉文）好快簽咗約，所以乜都俾晒佢做。呢四個幾月， Louisa靠以前幫學生補習嘅積蓄，屋企亦有幫補吓。」知情者說。
食飽傾飽後，麥明詩孖住朋友搭港鐵到鑽石山，出站後再行十分鐘到新蒲崗工業區，原來給自己五年時間做娛樂圈的她，報讀了蝦頭楊詩敏親授的演技班，一堂二千蚊，賣咗身，十優麥明詩重燃戰意，唔再求其！
籌碼有大有細
港姐鬥完靚，不論有獎冇獎，十居其九都會立即賣身無綫，偏偏今屆冠、亞軍出身富貴，攞住份約拗數拗年期，同無綫死過！季軍郭嘉文冇籌碼，惟有火速就範。
撰文、攝影、攝錄：娛樂組
|
鍾意就快D Share啦！
|
|
|
