探熱針
昏迷完再屙嘔 衞詩雅堅持玩命
英皇娛樂旗下藝人衞詩雅，元旦日在內地演出真人騷《怒放霸王花》時，跌落冰河昏迷，要急送院搶救保命，更一度與公司失去聯絡；見過鬼依然唔怕死的她，事後繼續在四川完成野外求生遊戲。近日，衞詩雅又屙又嘔，身體再出現問題，情況令人擔心。
逃出鬼門關
在海拔接近三千米的四川玩真人騷野外追捕比賽，十六名參賽者中不乏身體強健的運動員，唯一來自香港的衞詩雅，算是其中柔弱一個，月初在高山追逐意外跌入冰河昏迷的她，強調自己只是「暈」了一陣，亦慶幸現場有工作人員懂得急救，讓她逃離鬼門關。
「其實詩雅當時好驚，不過唔敢講太多，事關製作單位唔想有咁多負面新聞出現，除咗佢之外，有幾個參賽女藝人都受過傷，只係佢傷得最重，差啲冇命。」知情者說。
冇人照顧
節目全程在四川四姑娘山拍攝，據了解，單人匹馬冇助手跟入組的衞詩雅，一直自己照顧自己，出事後，公司亦冇特別安排助手到內地跟實，但不想錯過機會的她，仍堅持繼續留守，直至整個遊戲節目完成。
「真人騷俾得起錢，加上有機會增加內地知名度，所以好多香港一線藝人都肯參加，只不過詩雅呢個節目就危險好多，真係搵命搏！咁辛苦捱到而家，佢點都唔肯退出；出院後，身體其實仲好虛弱，未完全恢復，加上冇人照顧煮食，四川食物油多又辣，所以近排佢一直又屙又嘔，但詩雅唔敢同屋企人講，怕佢哋擔心。總之佢諗住頂得幾耐就幾耐！」知情者說。
冇啖好食
本刊在朋友圈搜尋衞詩雅 po的相片中，發現近日有些餸菜相包括辣椒炒薯絲、椒絲小唐菜以及一碟油浸肉片，並註明「生病時候的分別」。
「出院後，詩雅飲食都好小心，一定唔會叫肉，因為四川人煮肉落好多油，所以大部分都係青菜，點知都係辣嘅！所以惟有餐餐食青菜淥麵頂肚，就算明知唔夠補充體力，但都冇辦法。」
另有一張是衞詩雅捧住湯麵，在室內戴晒冷帽全身包實的近照，雖然化了淡妝，但難掩憔悴病容，連包包臉都失踪埋。
「佢而家都 keep住要去覆診，睇住醫生，叫做買個保險。」知情者說。
膽搏膽
內地真人騷求新意搶收視，危險度愈來愈高，藝人返內地搵食相對亦容易出事。
撰文、攝影、攝錄：娛樂組
|
鍾意就快D Share啦！
|
|
|
