探熱針
徐榮 B女騷價 3,000蚊 出私伙打救《愛•回家》
長命劇《愛•回家》大換血後收視不停瀉，無綫惟有變陣，上月搵「馬家軍」回歸搶救，除了孻姑郭少芸冇歸隊，全家總動員出動，其中「馬強」徐榮更帶埋私伙 B女一齊落場。三個月人仔，騷價 3,000蚊，每日限時開工三粒鐘，身價比其他演員超出一倍。
收視有起色
「馬家」霸氣回歸後，收視一直插水的《愛•回家》，首週已經回升四點，大台見有起色，馬上下召快手改劇本，將由一班新人孭飛的健身室戲份，大幅削減一半。
「馬家出返嚟之後，多咗好多報導，而家故事內容仲係新舊人各一半，不過如果反應繼續好，可能會將馬家戲份再加重，嗰班新演員啲戲份分薄晒，當然有唔開心，但公司係睇收視，觀眾係老細，馬家先留到觀眾，都冇辦法。」劇組工作人員說。
孻姑郭少芸缺陣，但馬家有徐榮私伙 B女徐心怡加入做新成員，飾演馬子仁同新抱仔 Pinky的囡囡「馬家好」，一落場，三個月大的心怡 BB已成為網友話題焦點，被讚眼仔碌碌肥嘟嘟可愛度爆燈，更令收視微升兩點。據了解，童星酬勞長期保持低水的無綫，今次對「馬家公主」十分鬆手，可以跟爹哋同酬，三千蚊一個騷，每日開工不多於三小時（出鏡半句鐘為一騷）。
「徐榮唔係因為錢俾個女出鏡，只係咁啱公司要搵 BB演員，一班演員對《愛•回家》始終有感情，大家都想收視升番同做過一千集，所以徐榮出動私伙，俾個女落場幫手。」
埋身前先消毒
除了限時工作，心怡 BB開工亦有好多規矩，其他演員必須跟從。
「錄影廠空氣唔流通又污糟，所以 B女唔可以超時工作，三粒鐘冇價講，仲要媽咪一定跟場。大部分時間徐榮都會留喺廠入面𥄫實，仲會帶住消毒噴霧劑，每個同 B女有接觸嘅演員，事前都要被消毒先可以埋身。有次（劉）丹爺有幾聲咳，佢都自動波戴番口罩，免得傳染俾心怡。如果唔係拍 close up，就用公仔頂替，唔使心怡 BB留喺錄影廠咁耐。」劇組工作人員說。
小金蛋
得意的小朋友同動物，特別易呃到 like，娛圈人氣高的童星，身價可以比一般二、三線藝人更高，相當有吸金潛力。
美心妹妹
14年無綫推出電視劇《愛我請留言》後，在劇中飾演「樂悠悠」的美心妹妹楊鎧凝人氣颷升，經常出席大小活動幫阿媽搵錢，被指年賺 300萬，直至去年推出寫真集引起連串風波，將女兒作為搖錢樹的楊母，在壓力下才減少讓女兒曝光。
王詩齡
內地導演王嶽倫及主持李湘的寶貝女王詩齡，自從參加真人騷《爸爸去哪兒》彈出後，商演廣告電影排住隊，跟張家輝在《賭城風雲 2》做父女，與楊千嬅、吳鎮宇合作《寶貝當家》的她，廣告價五百萬起跳，電影片酬更高達七位數。
撰文、攝影、攝錄：娛樂組
|
鍾意就快D Share啦！
|
|
|
