馬時亨與曾志偉分屬表兄弟。
中環人語
肥馬惹江湖是非
呢排江湖多事，刀光劍影，差啲「揩」埋貴為港鐵主席嘅馬時亨教授身上，小宗咁啱撞到馬教授，佢都話「如果張海報唔係登埋我，呢單新聞都冇人夠膽登出嚟」；亦係咁，馬教授先要發個嚴正聲明，反駁他與某報業集團主事人在政治上有所圖謀之謠言；何出此謠言，可能跟馬教授背景有關。
話說祖籍潮陽嘅佢，自小家貧喪父，全賴舅父曾啟榮，即是曾志偉老豆資助才學有所成；早年當差嘅曾啟榮做到甲級高級警長，係呂樂下屬，七十年代被老廉指控貪污而潛逃到台灣，至 2011年病逝；可能就係咁嘅人脈淵源，又得閒同家己冷世叔伯食飯飲茶，搞到謠言滿天飛！
金融逍遙客：異常手法「笠錯」對象
游走於中港台併購、私募投資的金融多棲動物，現為多間上市公司主要股東及董事
李波事件觸動咗好多港人神經，以前就算天大的事情，大陸公安即使跨境，都會節制地低調辦案。好似今次先後五人失蹤、兼李波離奇又曝光的事，甚為罕見。查實另類辦案方法，即使在文明民主國度也經常出現。《 60分鐘時事雜誌》就有一輯專講美國 CIA如何喺世界各地老笠犯罪嫌疑人；間中笠錯對象，曾引起不少政治風波。
對付異常人士必須用異常手段，只有不食人間煙火的書生才會有婦人之仁，認為有了法律，就當法律係唯一解決問題的工具。然而今次被失蹤的，只是個經營有道的書店老闆，從任何角度看用「異常方式」對付都值得同情。多年前大富豪綁匪張子強，玩盡香港法律漏洞，大舉 V字手勢的得戚相歷歷在目。當時公安也是利用非常手段誘其入境，幾乎即捕即審即殺，令香港富豪放下心頭大石，公眾也拍手稱快。同樣不遵常規，不遵守法律，觀感卻大相逕庭。
其實每個良知市民心中都有把正義之尺，執政者的任何作為，只要符合呢把尺的期望，還是能夠得到支持。反而坐在立法會的尊貴議員，卻開口夾着脷，無恥到極點的叫雞理論都講得出口，我國我黨培養出咁失禮的人物，真係丟架之至。今時今日，任何精明老闆，最唔缺係擦鞋仔。從等埋發叔事件，到阿星叫雞，呢班豬隊友一一現形，無為老闆排憂解難之餘，還添煩添亂，換咗逍遙客坐喺中南海，真係會監生激死！執筆期間收到探子消息，李波事件中在泰國失蹤的桂民海才是主角，背景並不簡單，十多年前就在祖家寧波惹禍，但為何與李波又扯上乜關係就無從得知。呢個消息真確與否應該好快揭盅，但絕對可靠過阿星哥的集體叫雞理論。
中環寸嘴：有美利堅踎算好彩！
工廈大王楊耀松長子，是各大有名食肆之 VIP，喜歡研究城中有錢佬對食之要求，透過美酒佳餚，察看人生百態，讓讀者「嗒」落有味。
嘩，呢個禮拜個市，我睇係自○七、○八年金融海嘯以來，最慘烈嘅熊市第三期，因為今次有埋人民幣貶值嘅 factor，我通常長假期前，有理冇理都會掟晒短線嘅股票，有胡就食，費事夜長夢多，咁先至有心情喺聖誕節嗰日，走去鏞記歎個「尿兜翅」，驚佢清咗盤冇得食，其實想「鑿置」嗰個「兜」啫，聽講全店得番六個咋。
大丈夫能屈能伸，過完年個市跌到一仆一碌，通常輸錢嘅速度快過贏錢嘅速度㗎。走去灣仔美利堅食碗仔翅啦，呢啲時候有「美利堅」踎都算好彩，隔籬幾枱鬼佬加埋「竹升」仔都係踎呢度咋，大件夾抵食吖，唔差㗎，仲可以緬懷一下舊時唐人街大酒樓風味。
我有個潮州老友寸我，話我成日幫襯福臨門，都唔識買樽手攪嘅潮州辣椒醬，超，呢樽辣椒醬個包裝寫住「 XO」醬，一嚿水「 XO」醬？想創你個心呀，不過又咁講，呢樽辣椒醬係有師傅執過嘅，而且真係手攪，唔係機器攪，冇咁勻巡，唔好𢳂面嗰浸，要好似攪屎棍咁勤力啲攪吓佢先好食，學得潮州李嘉誠話齋，今年喺各方面要更努力。
長和凶兆
上年六月，敝刊專欄作家林本利寫了一篇題為「長和世紀重組不是吉兆」，當時恒指高企 26,000點；林本利提出李氏每有重組，後市即大幅回落 10,000點，如 97年 3月長和系重組，以垂直方式控制四間上市公司，以及 2000年 2月李澤楷鯨吞香港電訊；去年初，長和系宣布重組，如今股市大跌，林本利的預言中了，他說：「我救咗好多人九月份時我都話會跌到 18,000點啦，每次重組都係誠哥走得最快，高追長和系的人都好慘！」各位投資者，下一個 Q位，睇萬八！
冼國林又多一瓣
第一信用金融集團（ 8215）主席冼國林，一向百足咁多爪，既開財仔公司，又拍吓電影、喺佛山搞吓影城，連詠春都學埋。最新搞作，係學人拍微電影，仲好開心咁向小宗 show咗樣嘢──「平安卡」！佢參加咗建造業安全課程；但堂堂上市公司主席要拎平安卡，難道要再培訓？佢就話：「方便轉做地盤……講笑啫！」原來冼師傅諗緊搞工場，收啲舊木材傢俬返來再造，賣咗嘅錢做慈善用途。佢仲話攞平安卡係因為身體力行，要求影城員工同樣注意工業安全。冼師傅一向精明，咁仲唔一箭雙鵰？
|
鍾意就快D Share啦！
|
|
|
