2016年1月6日 星期三

變幻原是永恆  52歲譚玉瑛:講咩冇功都有勞,我有出糧㗎嘛! [FACE - 450 - 專訪] __,譚玉瑛,MF,

真人騷變幻原是永恆 52歲譚玉瑛:講咩冇功都有勞,我有出糧㗎嘛!訪問譚玉瑛姐姐,不論記者、攝影,還是化妝師都表現得很興奮,因為那句老是常出現的開場白又係時候出場:「由細睇到你大呀!」譚玉瑛話,走在街上,大學生會向她鞠躬,OL會為她讓座,甚至連老婆婆也說「支持你!」,幾次差點被淘汰都是網民輿論夾硬把她留下來,係甜蜜嘅,但亦名副其實係甜蜜的負擔。這也是其中一個原因,就算要又轉船又轉車,她還是捨不得搬離 ...


真人騷

變幻原是永恆  52歲譚玉瑛:講咩冇功都有勞,我有出糧㗎嘛!

訪問譚玉瑛姐姐,不論記者、攝影,還是化妝師都表現得很興奮,因為那句老是常出現的開場白又係時候出場:「由細睇到你大呀!」

譚玉瑛話,走在街上,大學生會向她鞠躬, OL會為她讓座,甚至連老婆婆也說「支持你!」,幾次差點被淘汰都是網民輿論夾硬把她留下來,係甜蜜嘅,但亦名副其實係甜蜜的負擔。這也是其中一個原因,就算要又轉船又轉車,她還是捨不得搬離愉景灣:「係開心,但成日咁,都想放低下。住喺愉景灣有樣好,啲外國人唔會因為識我望多我兩眼,我可以着住吊帶背心落街,又可以着住兩件頭去游水!」

35年前投考藝訓班,這一考,沒想過兒童節目一做就是三十多年,愉景灣一住三十多年,男朋友也是那一個,一交已經三十多年。她說她固執,固執在喜歡的東西都想保持一成不變,可惜拖拖拉拉到 2014年 4月,網友再嘈都於事無補,還是被余詠珊把她從兒童節目撤掉,改做《東張西望》主持,踏入 2016又話改組,又係今日唔知聽日事,等候大台發落中。

網友激動,其實當事人譚玉瑛看得比誰都淡然。

由兒童節目三十年主將,到間唔中至出現嘅譚玉瑛校長,到美其名變咗節目部顧問實情退役,雖然兩年來從來沒人找她顧問過甚麼,已經徹底跟兒童節目各行各路,不過講到尾,我們都是看譚玉瑛姐姐大的,一下子都好像回到小時候,靜靜的圍着聽譚玉瑛姐姐說道理:「細個嗰時,我阿嫲成日話做人好難。其實只要件事處理得好,做人並唔難。等於人哋冚我兩巴,唔好俾反應住,佢梗有佢道理㗎!你太快反應,件事咪變質變咗嗌交囉!等於余詠珊要郁我,請得佢返嚟,出得糧俾佢,梗有佢原因㗎!呢個世界邊有冇功都有勞至得㗎?我都有出糧㗎嘛!」

聽落,又好似有啲道理。

要變嘅始終會變,夾硬掹住佢都會變。

改版後嘅《東張西望》到底仲有冇你呢?

我真係唔知,可能暫時仲有,因為我份約四月至完,啲騷都未還完,下個通告係十幾號,即係仲有得做啦……

所謂兒童節目顧問,到底離開呢一年多有冇人搵你顧問過?

哈哈……梗係冇啦……我自己咁睇呢件事,佢想個節目年輕,的確擺我喺度就唔會年輕,好正常吖!佢都仲肯俾一個位我,叫我做顧問,咪已經對我好好囉!

唔係因為頂唔順群眾壓力咩?

哦……係呀……

到底你自己想唔想停?

我唔想咩都唔做,但又唔想自己太辛苦,由年青時已經係咁喇。工作重要,但唔係全部,我都仲想學點生活㗎。

係唔係大家唔捨得多過你自己唔捨得?

的而且確……咁多年,公司 offer過我其他嘢,我選擇仲留喺度,當然都係因為我鍾意呢份工……但係到完嘅一日,好老實講,我自己好平靜,就係「哦」一聲,知道個 timing到喇。

要做大家嘅集體回憶,會唔會都係個包袱?

咁又唔會,都係榮幸多啲,就算出街,連啲阿婆都行埋嚟同我講:「支持你!」我咪話囉:「你都睇?唔係啩!」原來有咁多人鍾意我,我真係唔知,返工啲大學生同我鞠躬,搭地鐵啲女仔同我讓座,呢件事嘅感覺……係甜蜜㗎!

變幻原是永恒,其實點會唔變呢?

係㗎,但係偏偏呢個世界好多人掹住唔想俾佢變,某程度上佢哋自己都變緊,我諗難放低嘅係感情。其實無論變定唔變都好,我哋就係要接受喺我哋面前發生嘅一切。要搞,你最後只會搞亂你自己嘅心,唔會係面前嗰件事。

鍾意嘅嘢,我會固執地保持一成不變。

喺愉景灣住咗幾多年?

我係 86年搬入去,都就嚟三十年。嗰年係個七百幾呎嘅單位,我用咗三十幾萬嚟買……

細個呢喺邊區長大?爸爸媽媽又做乜嘢?

我細個喺西灣河大,嗰啲太古宿舍𠵱家冇晒囉……我有五兄弟姊妹,兄弟姊妹各一!爸爸做科文,我都唔知咩係科文,媽媽係工廠女工,做相機零件。但我又唔係受父母影響最多,係阿嫲湊大我嘅。阿嫲好惡嘅,成成日都有句嘢掛喺口邊,成日都話:做人好難㗎!

咩叫做人好難呢?今年 52歲,又點體會呢一句?

我又唔覺得做人好難,處理得唔好就真係難喇。件事一開始處理得好,就唔需要後尾返轉頭去解決。呢一生,我覺得我都處理得幾好,算係冇乜波浪呀。

80s(網上圖片)

張國強 梁朝偉

周星馳

一份工打三十幾年,住愉景灣三十年,男朋友又係三十年,你係真係唔鍾意變?定係面前真係冇其他選擇?

我鍾意我已經有嘅嘢,係真嘅!譬如話我搬去愉景灣,喺嗰個年代真係犯賤㗎喎!又搭車又搭船,買樓嗰年我仲啱啱考到車牌添,仲要 16厘息根本就冇人買樓添,搬得入去就真係從此唔使再買車揸車,嗰個年代返一次工好次去一次旅行咁,但係呢個就係我對生活嘅一種選擇囉!我究知揸車呢度去嗰度去好自由囉,我究知𠵱家夜咗返去 miss咗一班船郁啲就等個半鐘囉,但係人生就係咁,唔會咁好樣樣都俾你得到。住愉景灣仲有樣好呢,外國人多,唔會因為識我就望多我兩眼,我着住吊帶落街又得,着住兩件頭去游水都得,呢啲嘢我喺市區唔會得到。

所以去到邊都有人叫人譚玉瑛姐姐,都有人鞠躬,其實都會攰?

係呀,係開心,但係成日都要應付呢啲,都想放低下。

你好固執地想生活一成不變?

我係好固執地想我鍾意嘅嘢一成不變。我又唔想計較點做抵啲,點做慳時間啲,我淨係將我想做嘅嘢擺咗喺第一位。

有冇試過呢?一樣嘢堅持唔到最後,堅持唔到三十年?

試過一次半途而廢㗎,因為我鍾意食法國菜、煮法國菜所以去咗學法文。一共有十五級,係辛苦啲嘅,收完夜都要去法國文化協會返學,我都讀到第八級……跟住考試,讀就得寫唔得,跟住我返去用法文恐嚇個校長,話佢唔俾我升班我就唔讀,點知佢真係唔俾我升班,我就真係唔讀!

樣樣冇變,係唔係男朋友都仲係三十年前嗰段師生戀?

係嘅……但係嚟到呢一刻,我唔想再講感情。細個唔識嘢,講講下會講埋佢啲嘢出嚟,原來佢又未必鍾意。

90s(網上圖片)

鄭伊健

朱茵

你唔鍾意小朋友,係唔係因為咁多年對太多,對到厭?

我唔係唔鍾意小朋友,但係做人本身,我唔覺得係一件快樂嘅事,但既然我係一個人,就想選擇去過快樂嘅一生。要快樂要學習嘅嘢已經好多,再生小朋友太精力交瘁,又要未必做得好喎,又要佢一生幸福快樂都係建基於你做得好唔好喎……咁就不如唔好喇。

有冇諗過,真係遇到變故,你接唔接受得到?

到咗呢啲年紀,一定會變,你覺得自己接受唔到改變,咪盞係自己搵嚟搞?接受改變,聰明人就快啲,唔聰明嘅人就慢啲。

呢方面你係唔係聰明人?

我聰明㗎,因為我識得睇書去學習。咁人哋出得書,梗係聰明,梗係有好多嘢值得我哋學㗎。好似放低朋友離開呢件事,我都係靠睇書過渡。我前排去探鄺佐輝,佢見到我好開心,話自己會喺度住一排喎……其實呢,我去係因為聽到佢好危急,但係佢自己覺得自己仲可以住一排,你話係唔係都幾好呢?第二次再去,佢已經昏迷咗,乜人都唔認得……即使係咁,都要去探,人要做啲嘢係令自己唔會有遺憾……我覺得做人要係咁,有啲咩事唔好咁大反應先,你冚我兩巴,唔好咁快俾反應住,對方梗係有佢原因,靜一靜可能會話你知。但係你太快俾反應,將件事變咗第二件事,咪變咗嗌交囉!一件事,你唔好太快俾反應,可能過咗一陣,根本就唔算係一件事。

00s(電視圖片)

唐韋琪

人地冚你兩巴,梗有佢嘅理由。

下?你真係咁諗㗎?俾人冚兩巴唔好俾反應?

我真係好少嬲人,好多時會諗下人哋……譬如我唔做兒童節目,好多鍾意我嘅同事會話余詠珊唔要我,我又咁睇喎,點解請佢嚟,咪就係請佢嚟做嘢囉,佢覺得咁樣好,係因為佢有責任佢有能力吖嘛……佢做完都要滙報,都有苦處㗎!人哋對你唔好,你唔企返身係你對自己唔好,經過啲人都係順手踩返腳啫嘛!冇功都有勞喎,呢個世界邊有呢樣嘢㗎?我有人工出㗎嘛!佢郁我,又唔係因為我叫譚玉瑛所以憎我!

你份人咁好,難怪咁多年從來冇樹敵!

我真係冇,不過耐唔耐有啲新同事入嚟做嘢,有啲會覺得譚玉瑛喎……唓……我會特登提醒自己,唔好做到老屎忽一樣,所以凡係同我合作過,又好似冇乜唔妥……反而係舊時有啲後生,佢哋自己分兩黨,就好鍾意嚟 buy我,叫我揀一邊企。

咪住先,邊個分兩黨先?

以前啲細路哥囉!

10s

余詠珊 圖片

梁朝一黨周星馳一黨?定伊健嗰代定朱茵嗰代先?

梗係唔係啦,都唔係朱茵嗰代,係後期你哋唔識嗰啲……

即係搞咗咁多嘢都紅唔起嗰啲啦?

係呀,好鍾意阿譚呀呢樣嗰樣,又會去開飯邊個邊個去我就唔去,有啲就你一個髮夾吖嗱,我就夾夠兩個要多過你……好好笑㗎啲女仔,最後咪消失咗囉……你個焦點擺咗喺呢度,冇專注做嘢,又點會成功呢?

你話呢幾年好多朋友走,我想問你有冇宗教信仰,你覺得人死咗係去咗邊呢?

冇喎,我咩都唔信,我覺得宗教對我嚟講係一種枷鎖,我鍾意點就係點,唔想因為個宗教想我點至點。人死咗,咪就係好似熄咗盞燈一樣,乜都冇囉。有次有個記者問我想個喪禮點搞,其實我都死咗囉,你攞塊蓆捲走我就得喇……我唔使死咗之後先要人記得我,我淨係想安樂、快樂過一生,喺呢個快樂嘅過程中可以影響到人就更好,影響過就夠,唔使再記住我。

是誰,在敲打我窗。

話說藝進同學會有套慈善劇《才子亂點俏佳人》,譚玉瑛每天要花大半日拍劇,一接到我的電話,還是二話不說讓我攝入兩粒鐘做訪問,為了三唔識七嘅我早起兩粒鐘,一點沒埋怨。

所以當她說錯過了一班船要遲半粒鐘,我發誓一點也不怪她,只納悶,點解山長水遠係都要住愉景灣。

「因為我鍾意對住個海,三十年前我係負擔到嗰度嘅樓囉!本來 86年買咗就唔諗住搬㗎喇,點知十年後前面起多一排屋,冚咗我啲海浪聲……我心諗:唔得,我要聽返啲海浪先,就買咗前面嗰排屋,一直住到𠵱家。」

我諗緊,去到邊都俾人圍住講睇住你大、你係我集體回憶,件事其實唔係好好玩。

我諗緊,譚玉瑛姐姐都係鍾意着住件兩件頭,聽海浪聲多一點。

撰文:朱小博

攝影:范仲良

化妝、髮型: Maggie@Bridal Corner

形象: Bryan@the Flaming

服裝: Marina Rinaldi


鍾意就快D Share啦!
Related Posts Plugin for WordPress, Blogger...