熱爆娛樂: 前度踢爆　俾坤哥屈貪錢　 Aka：其實佢玩我 [壹週刊

2016年5月19日星期四

前度踢爆　俾坤哥屈貪錢　 Aka：其實佢玩我 [壹週刊 - 1367] __,坤哥,Aka,吳業坤,M1,

探熱針

前度踢爆　俾坤哥屈貪錢　 Aka：其實佢玩我

一夜爆紅！坤哥（吳業坤）表面傻傻戇戇似「毒男」，但講到溝女，其實是高手， 13年仍是三打七的他，已成功溝掂宅男女神 Super Girls隊長趙慧珊（ Aka）。

玩地下情 9個月，分手時爆出因 Aka拜金又港女，又嫌棄男友冇錢冇車，點知一切罪名是花心坤哥自製脫罪煙幕，被砌生豬肉的 Aka氣難下，公開被狠撇寃屈。

食死貓

自認毒男的坤哥，因為身邊女伴團團轉而被網民封為「偽毒坤」。

無風唔起浪！一三年，坤哥同擁有四十二吋長腿的 Super Girls隊長 Aka（趙慧珊）暗交大半年，二人分手後，因為男方一句「冇錢就冇得選擇發展！」搞到 Aka被標籤成「拜金女」。事後，食死貓的 Aka曾在森美主持的節目《公子會》中，公開自己被飛經歷。

Aka雖然冇指名道姓，只形容對方是個肥肥哋，戴眼鏡的宅男，但一講就知係講緊坤哥！

「係無聲無色咁冇咗，佢叫我等佢，叫我俾佢放個假，俾個 break佢。我等咗好耐，其間我唔敢搵佢，一直等，等咗成個月！其實身邊嘅朋友都話佢玩我，但我唔信，我真係等，佢有話過到咗嗰邊一定會搵我，但結果都冇！」 Aka在訪問中自爆。

二人拍拖期間，經常網上傳情， Aka一句「 I Miss You」，坤哥即有反應：「 Who You Miss?」

13年，仲係蛋散的坤哥，照溝掂宅男女神 Aka。

生日分手

當時外界以為坤哥因為霉而俾女飛，實情是鍾愛宅男的 Aka，於坤哥生日當天，在毫無原因下被拋棄。「我等到差不多到佢生日，就忍唔住打去問佢：『我可唔可以同你慶祝生日？』佢話唔可以！咁我話『不如我請你食飯吖！』佢就話好喎！為咗佢，我花咗半個月去設計個生日蛋糕，等到佢生日嗰朝，我一早去咗 salon set頭化妝，又特登去買衫，諗住買一套好靚嘅衫同佢慶祝；點知佢同我講要到凌晨一點幾先得，我仲 hold住所有嘢等佢。

「但最傷心係嗰晚我俾咗個蛋糕佢，佢好開心㗎喎！點知最後我得到嘅係：『我諗過喇，我唔會同你喺埋一齊！』跟住佢就話要走，我好唔開心，自己一個拎住個冇電嘅電話同個鎖匙包，喺條街漫無目的咁行！」不明不白被拋棄， Aka還一路喊一路諗，是否自己做得不夠好，才會被飛！

目前冇拖拍的 Aka，孤零零搭地鐵到太古買乳酪。

週一（ 16/5），坤哥孖住洪永城為無綫拍宣傳片。

鍾愛宅男的 Aka，以為同表面戇直的坤哥拍拖會有安全感，點知對方連 Super Girls其他成員都唔放過。

晚晚失眠

Aka更直言，這次是她多年來首次被飛，分手後一段時間，每晚眼光光到凌晨五點幾，滿腦問號瞓唔到。

「係唯一一次咁傷心，之前嗰啲拍拖分手，我完全無嘢，但呢個（坤哥）係我真係好鍾意！」被追問點解咁鍾意對方時， Aka說：「唔知點解，可能佢好可愛，肥肥哋，戴眼鏡，好可愛㗎！」

上週六（五月十四日）， Super Girls於銅鑼灣出席新歌《有事發生》 MV首播會，問到 Aka在訪問中提到自己慘被拋棄經歷，所指是否坤哥？「咁耐嘅事，我唔記得喇！（你嘅形容同坤哥好啓合喎）我諗唔講呢樣嘢喇！（佢話因為自己窮先唔可以同你拍拖）其實我想講，呢個講法係好寃枉！識我嘅都知，我一直一直都唔係嗰啲貪錢買名牌嘅人！我知道坤哥而家嘅事業好好，咁你（指坤哥）繼續努力啦，我都戥佢開心，我自己都會努力！」 Aka說。本週一（十六日）記者當面問坤哥回應時，他一臉尷尬：「我諗佢（ Aka）未必係講我嘅，要問番佢本人先清楚！」

被坤哥拋棄的 Aka，曾將分手當日送蛋糕給前度的傷心經歷，放到《有沒有我》 MV內。

擁有 42吋白滑長腿的 Aka，常在網上晒料。

14年，坤哥在自己生日的一天狠飛 Aka，撇女後心情好到同老友胡鴻鈞、許廷鏗慶祝。

Aka曾經在 instagram大晒坤哥爛 gag宣示恩愛。

夠錢買樓

吳業坤去年憑一曲《原來她不夠愛我》成功爆紅，過去半年，商演、廣告、電影密執過百萬，已經儲夠彈藥準備置業上車。

「以前坤哥連架車都養唔掂要賣，而家唔同晒！見樓市跌，佢都有去睇樓，目標係五百萬左右嘅二手私樓單位。不過今個月底要開劇，如果搵唔到啱價嘅心水盤，佢會租住先，之前睇過將軍澳啲租盤，話想可以住近啲，方便返電視城。」知情人說。

當年蛋散一個，坤哥都可以「食完棄」，如今打通埋財路，嘩！更加無往而不利！