朱茵同阿 Paul由拍拖至結婚已經長達十九年，但兩人依然恩愛，出街時仍然手拖手。
娛樂偵訊
男內女外 朱茵搵錢阿 Paul湊女
12年誕下愛女黃鶯後，朱茵一度大幅減產，家庭收入，要靠老公阿 Paul黃貫中外，便要食老本，直至去年拍住林青霞、蔡少芬等做內地真人騷《偶像來了》，令人氣再度反彈，廣告商演活動隨即接到冇停手，短短一年時間，已有超過三千萬落袋。
老婆吸金力強，湊女的重任，就落在阿 Paul身上。難得唔使返大陸，朱茵爭取時間，同老公一齊湊女家庭樂，「性感女神」更加不顧身世，幫阿女挽鞋。
復出真人騷好反應
女兒黃鶯今年十月滿四歲，之前朱茵因為湊女減產，搵錢養家的重任，由老公孭起，不過，阿 Paul性格行先，揀騷接之外，去年十月的內地巡唱又突然被取消，加上 Beyond合體傾極唔成，收入始終好有限。
勢色唔對，去年朱茵見囡囡都開始大，加上睇錢份上，決定分身復出，接拍內地真人騷《偶像來了》，同林青霞和老死蔡少芬等，四個月內分別去了多個不同地方進行拍攝工作。
「阿茵原本諗住拍完《偶像來了》，搵一筆錢慢慢就繼續湊女，點知個節目好好反應，《西遊記》嘅紫霞仙子人氣又返晒嚟，之後好多 job係咁搵上門，而且啲價錢仲好好，所以阿茵都順其自然，有就做。」朱茵身邊人說。
追唔到數要妥協
朱茵要無間斷地北上搵錢，照顧囡囡的責任，就要阿 Paul代勞。據了解，阿 Paul其實亦唔情願讓老婆穿州過省咁辛苦，奈何近年演出量大減，就算自己肯接夜場酒吧騷，但騷價始終唔高，比起朱茵出一個商演活動，閒閒哋收八十萬，阿 Paul跑到氣咳，都不及老婆，最終惟有妥協，接受男主內女主外做法。
獨愛打韆鞦
日前，難得唔使返內地開工的朱茵爭取時間陪囡囡，一家三口加埋外傭姐姐去九龍城寨公園玩。
一到埗，黃鶯已一副急不及待的樣子，外傭姐姐先抱她落車，阿 Paul同朱茵一齊去泊車，之後手拖手入公園搵女。
快四歲的黃鶯只愛玩打韆鞦，公園不同款的韆鞦逐一試勻，阿 Paul亦不忘做攝影師，幫囡囡影寫真，其間黃鶯玩到除晒鞋，朱茵見狀，自己落手幫囡囡挽鞋，唔使外傭姐姐分心幫手。
北上掘金
去年，朱茵因為一個大陸真人騷節目，人氣再度爆升，廣告商演節目，賺到盤滿鉢滿，吸金力極強。
2015-16收入
內地綜藝節目
《女神新裝》（ 4集） 480萬
《偶像來了》（ 13集） 650萬
《為她而戰》 120萬
代言品牌
手機遊戲「大聖歸來」 600萬
「合生元」奶粉 800萬
商演活動× 15 1,200萬
年賺約 3,850萬
撰文、攝影、攝錄：娛樂組
|
鍾意就快D Share啦！
|
|
|
