與唐詩詠出發台灣前，洪永城被發現在 coffee shop喪刨手上的結婚天書，離開時嘴角暗暗偷笑。
探熱針
台灣求婚 洪永城刨定結婚天書 娶唐詩詠
拍拖年半，洪永城和唐詩詠由昔日低調，到近日男方不避嫌發表「生小朋友係我其中一個計劃」言論，雖然有指契哥馬國明一直吼住契妹，經常借故爭埋一份，但拍拖不二心的唐詩詠始終不動心，同洪永城打風打唔甩。據知，本月初洪永城同女友到台灣慶生期間，已經開咗口求婚。日前記者更發現他喪刨一本介紹婚宴場地、影結婚照的天書，洪永城心急做人夫，呼之欲出。
變咗住家男
比唐詩詠細超過兩年的洪永城，由旅遊節目主持，搏到上大台小生，要保一線地位，洪永城不敢再行差踏錯，被出名專一、賢慧的唐詩詠收服後，更大幅改變成住家男。
圈中筍盤難求，好女更加罕有！名花有主的唐詩詠，依然是一眾餓男目標，其中包括契哥馬國明，一直伺機出擊。有傳馬明不時出口術，勸契妹「睇定啲」。由於明知唐詩詠十分抗拒「住埋一齊」，馬明索性借力打力，經常有意無意地，不鼓勵契妹搬去同洪永城一齊住。
身邊有個計時炸彈，年尾才三十三歲的洪永城為免夜長夢多，決定盡快結束王老五生涯，與女友拉埋。
「希望可以帶詩詠睇多啲呢個世界。」又自爆：「想去亞馬遜影婚紗相。」公告天下。
事實上，洪永城唔係得把口。早前記者便發現，他一支公在西貢歎咖啡時，攞住本介紹外國搞婚宴場地，和影婚紗相十大靚景的天書，睇到津津有味。
冇花照求婚
「以前嘅 Tony（洪永城）好大細路，淨係掛住打機、睇波、去旅行，唔會諗將來，亦唔會有長遠計劃。但阿 Nat（唐詩詠）改變咗佢好多，女友嘅全方位照顧，餵貓、煮飯、執屋……令 Tony明白到咁好嘅人好難搵，佢覺得自己要有膊頭，要照顧對方。」知情人說。
據了解，洪永城月初趁女友生日，已經做嘢！
為慶祝二人拍拖後女友第二個生日，洪永城提議去台灣走一轉，又花盡心思，搵定地方帶女友燭光晚餐吃分子料理，在浪漫氣氛下，冇花冇鑽戒冇單膝跪地，洪永城照開口求婚。
慳家買平背心
「雖然 Tony都想等多兩年事業再穩定啲先置家，但佢知女友點諗，所以決定自己開口先，佢話就算阿 Nat拒絕，佢之後都可以想辦法繼續，直到成功為止！今次喺台灣求婚，其實阿 Nat冇俾答案，但 Tony睇得出，阿 Nat唔係三心兩意嘅人，拍拖更加唔會玩玩吓，所以 Tony會再搵機會（求婚）。」知情人說。
上週六（五月十四日），洪永城要開工，唐詩詠獨自揸車到中環行街，又唔怕人逼人，走入 H&M執平價背心。 Hea到夠鐘，唐詩詠再殺入西貢，出席老友 Toby梁靖琪替她補祝生日飯局。
賢淑有前科
唐詩詠被網民封為「不能錯過的女人」！已錯過了的有崔建邦，不想錯過但苦無機會的，是一直咬住唔放的馬明，亦是洪永城心中大患。
撰文、攝影、攝錄：娛樂組
|
鍾意就快D Share啦！
|
|
|
