探熱針
吳千語帶林峯 悉尼見家長
林峯開騷唔得閒，千語 BB日日黐住「好姊妹」馬天佑，感情好到連對方當面露械屙尿，峯嫂都若無其事！
三場個唱結束，馬天佑任務完成，陪玩陪食陪買重任，再次交番俾林峯。週日（五月十五日），林峯已第一時間陪千語 BB出發去澳洲放電。今次五日四夜之旅，二人除了 plan好去滑浪、行山，最主要是探望千語 BB在澳洲的親戚，進一步深入女家。
唔住酒店
為咗全副精神應付個唱，被指要「禁慾」，同女友保持距離的林峯，完騷後全面回歸千語 BB。
拍拖三年，二人幾乎遊勻世界，男友忙了足足兩個幾月，為準備今次「放監」之旅，千語 BB未出發，先興奮，個幾月前已經揸晒主意， book定機票和自定行程。
唔講唔知，原來千語 BB大部分至親早年已移居澳洲，但拍拖以來，林峯都未有機會，到澳洲拜會女家的親戚，所以今次的悉尼之旅，二人並非住酒店，而是入住當地親戚屋企。
此外，千語 BB更放棄最愛的 shopping習慣，行程以戶外活動為主，非常突破。
滑浪天堂
「千語十幾歲嗰陣，佢爹哋就去咗澳洲做嘢，好多親戚亦移民咗去嗰邊。今次佢同男友去到澳洲，都係住親戚屋企。千語話由親戚屋企揸車，廿分鐘就去到 Bondi Beach，佢恨咗去呢個滑浪天堂好耐。」千語身邊人說。
週日，林峯同千語 BB搭夜機出發。二人戴住黑色情侶帽齊齊去到機場，林峯秒速發現記者，第一時間通知女友。
辦完登記手續後，二人各自拉住一個行李喼，前後腳入閘，過機場保安時，林峯自動自覺拉低口罩，素顏的千語 BB就 keep住耷低頭，急步入閘。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
