娛樂喧
暗接戚其義內地劇 陳豪離無綫搵人仔
近年無綫小生紛紛返大陸搵人仔，繼林峯及鄭嘉穎後，陳豪亦決定於明年一月約滿後，離開無綫，轉戰內地市場。不過，醒到爆的陳豪，為了在老婆陳茵媺臨盆前狂賺一筆，對無綫一直採拖字訣。被問到去向時大耍太極，即使傳他會自組公司，他亦只說︰「適當嘅時候會公布。」模稜兩可。
滿肚密圈的陳豪，其實早謀後路，暗中與離巢無綫自組公司的金牌監製戚其義斟掂，接拍內地一套古裝長劇，貪阿戚的古裝劇在內地贏盡口碑，可為自己打開內地市場。
雖然選擇離巢，但多年來都是曾勵珍愛將的陳豪，據知已冧掂無綫改簽部頭約，一年拍一劇， keep住知名度。
戚其義製作的《金枝慾孽》及《火舞黃沙》贏盡口碑，雖然《天與地》在大陸禁播，但《天》劇愈禁愈熱，反令戚其義在大陸廣為人知。有不少大陸投資者紛紛慕名找他開劇，所以阿戚去年離開無綫後，便自組公司北上發展。
劇價升 6倍
「阿戚（戚其義）用咗一年籌備新劇，頭炮梗係搵番自己人，佢第一個就搵阿 Mo（陳豪）。阿戚拍心口應承阿 Mo，嚟緊一齊拍大陸劇搵人仔，加上套劇農曆年後先開拍，遷就到佢照顧 Aimee（陳茵媺）同 BB，所以阿 Mo好快就應承。阿 Mo今次拍一集收 20萬，比喺無綫 3萬，劇酬高 6倍有多！」知情者說。
由於陳豪現時與無綫仍有約，所以他接拍戚其義新劇要低調進行。其實，陳豪明年一月便約滿無綫，無綫多次催促他續約，曾勵珍及樂易玲車輪轉遊說他，甚至連集團總經理李寶安亦親自出馬同佢傾新約，但陳豪都是一味拖。為了賺多些奶粉錢陳豪去意已決，更與跟隨自己多年的經理人陳嘉莉，計劃自組公司。
靠新劇攻大陸
「雖然阿 Mo喺香港賺好多錢，出 event有價有市，不過佢眼見阿佘、蔡少芬同鄭嘉穎賺人仔豬籠入水，劇價去到三、四十萬，點會唔心鬱。阿 Mo一向拍時裝劇多，但內地唔係好 buy佢嘅中產形象。所以人氣一般，反而佢同阿戚拍嘅古裝劇《金枝慾孽》同《火舞黃沙》，就好受內地歡迎。加上阿戚呢套創業作係 40集古裝劇，又搵蔡少芬同邵美琪做女主角，加埋編劇周旭明，阿 Mo好有信心，靠呢套劇攻陷內地市場。」
眼見不少小生花旦如郭晉安及佘詩曼等，都是兩年才幫無綫拍一劇，其餘時間就北上搵人仔，陳豪亦有樣學樣。記者就他接拍阿戚新劇及與無綫改簽部頭合約，致電其經理人陳嘉莉，但到截稿前未獲她回應。
至於戚其義，則在電話中直認傾掂陳豪做男主角：「係呀，陳豪會拍我套四十集古裝劇。（佢離開無綫即刻同你開劇？）我唔知佢係咪離開，我套劇仲等緊批文，唔講得太多。（陳豪酬勞高過無綫？）呢啲係製片傾嘅！」陳豪離巢，已係千真萬確。
合夥開糖水舖
戚其義與陳豪拍劇合作無間，但兩人的合作並不止於此。他們早在 09年開始，已經合資在天後開設甜品店「甜姨姨」，店舖更由五百呎擴充到一千呎，生意愈做愈大。有了開糖水舖的成功經驗，陳豪至決定搞咖啡店，但近日為了照顧陳茵媺及 BB，才暫時擱置開店大計。
「陳豪一直都想做生意，咁當時阿戚旗下有個女編劇想開糖水舖，陳豪知佢煮甜品好叻，咪搵埋阿戚投資間糖水舖，當係學做生意。之前阿戚嘅劇都有喺嗰度取景，外界都唔知道陳豪係股東。」知情者說。
小生離巢發圍
無綫帶俾小生從來只有知名度，他們要賺錢往往要靠離巢後北上發展，多年來成功的例子多不勝數。
劉愷威 變四大小生
05年北上發展， 08年憑內地劇《鳳穿牡丹》被內地人認識， 11年的《千山暮雪》更令他奠定一線小生地位。近日他回 TVB拍王晶執導的電視劇《風雲天地》，與汪明荃及孫興合作，加上與楊冪的婚訊，都令他人氣爆燈。
|
鍾意就快D Share啦！
|
|
|