關西機場拖手
晚上接近九時抵達大阪關西機場，林峯、吳千語準備搭的士離開。兩人拖到實，認真癡纏。
打頭陣
大阪直擊 千語送自己賀林峯生日 酒店房盡興 18小時
12月無綫頒獎禮各小生花旦鬥得如火如荼之際，無綫首席小生林峯卻
懶理獎項，靜雞雞偕女友吳千語飛日本 9天，共度他 34歲生辰。
據知林峯為冧千語，每月動輒花上 7位數字，難怪林峯今年沒有為無綫
拍劇，反而向公司要求返大陸拍劇、開騷，密賺人仔。而比女友大 14歲的林峯，為了綁住千語，早前更放聲氣指自己 ready做老竇，暗示隨時閃婚。今次日本之旅，兩人首晚到大阪，匿酒店房「盡興」足足 18小時後，再甜蜜行家品店，儼如小夫妻。
香港機場前後腳
今年沒有為無綫拍劇的林峯，上月完成了大陸劇《大漢賢後衞子夫》，趁 1月無綫劇《使徒行者》未開工，便向公司請了十天假，與女友吳千語飛往日本慶祝自己 12月 8日的 34歲生辰。
「今年阿峯冇同無綫開劇，反而返大陸狂搵人仔，因為依家要照顧千語 BB，個個月一百幾十萬走唔甩，佢唔搵多啲錢點得。阿峯自從拍拖後，對獎項反而唔在乎，總之一有假期就會同千語飛去外地疏乎，狂買名牌。」
前後腳入閘
12月 2日下午 3時許，林峯與千語 BB乘坐同一架保母車到赤鱲角機場。不過，兩人甚為避忌。為了掩人耳目，千語先到櫃位 check in，十多分鐘後，林峯才徐徐下車入閘。今次大阪連東京 9日旅程，商務機票連食宿購物，估計要豪花百萬。不過峯峯豬對女友一向疏爽，當然冇計。
兩人到關西機場後，警戒性甚高，不時兩邊望，直至感覺安全後，才手拖手步出機場。千語 BB站在一旁發呆看住行李之際，林峯已急急換錢。跟著兩人乘的士，約晚上 10時抵達大阪中央區的 The St. Regis酒店。
他們匿在房內「盡興」 18小時後，翌日傍晚出動。戴上口罩的林峯，突然拖住 BB從後門溜走，記者來不及追蹤。不過，有香港 fans報料，指兩人在心齋橋的大丸百貨公司購物：「傍晚 6點，見到林峯同吳千語喺大丸喪買，女嘅仲攞住部相機一路買一路影。我見到林峯最少攞住四袋戰利品，其中兩袋係電器，千語仲買咗部最新款嘅美容機㖭。林峯又戴口罩又戴超，好難睇佢唔到。」
據知今次日本之旅，費用就林峯俾，但酒店及行程卻是千語話事。千語為冧男友，更預先準備了一系列驚喜給林峯。她知道阿峯愛食生蠔及海鮮，便提議到大阪的道頓崛擦松葉蟹，加上心齋橋附近亦有不少玩具店，啱曬男友心意。兩人打算在大阪逗留三天後，再乘子彈火車直落東京 shopping。
第三天下午 2時 45分，林峯與 BB鬼祟地從酒店側門離開。阿峯警覺性並沒有鬆懈，臨出酒店前，著 bell boy幫他截的士，但他卻刻意行到車龍尾，上最後一部的士，杜絕有人追蹤。
豪住六星酒店
今次林峯同千語 BB先遊大阪再去東京，「峯語」會在大阪留三晚，之後就搭子彈火車到東京瘋狂掃貨。要著好、食好同住好的 BB，在大阪亦揀選最靚酒店之一的 The St. Regis入住。
The St. Regis位於中央區，鄰近心齋橋，屬六星酒店，行去 JR站只需 5分鐘，非常方便。入住 The St. Regis普通房間都要 2千 7一晚，而「峯語」所住的 Grand Duluxe Room約 500呎，有 King size大牀，仲有 Blu-ray機提供，盛惠 4千 2一晚。
回馬槍截記者
之後兩人到了梅田區最新的大型商場 Grand Front，在商場南座搵食。一入𨋢，林峯終於發現記者，然後背向𨋢門，對在旁記者眼望望。到了七樓時，他刻意讓記者先出，記者轉向左方走，林峯便拖住女友轉右。當記者轉身拿出相機打算拍照時，本來轉了右的林峯，卻突然來一個回馬槍，幾個箭步跑到記者跟前。
記者被嚇一跳，仍跟他打招呼，笑問千語 BB將送甚麼禮物給他慶生？只見千語含羞答答一味甜笑，而旁邊的林峯則搶著說︰「我唔會答你嘢！你唔好阻住我哋！」兩人嘆完日本菜後，便在商場逛家品店 Soholm Cafe，睇完沙發再睇餐枱，更即時買了鯊魚公仔手套，甚有小夫妻 feel。
拖實行街
搏命搵 vs搏命使
林峯年賺 6千多萬，雖然佢搵錢容易，不過同 BB拍拖只是短短一年， BB已經豪花林峯近千五萬。呢個 BB唔易養，林峯真係要搏命搵錢！
林峯恨生仔
在娛樂圈打滾了十多年的林峯，近年豬籠入水，加上本身有家底的他，現階段真是想組織家庭，尤其見到身邊好友個個結婚生仔，他亦開始想成家立室。早前，阿峯拍罷電影《詭嬰》後，坦言很想做老竇，並計劃生一子一女︰「三十多歲有小朋友差不多了，我唔想有代溝。」而千語亦配合話視對方為結婚對象。她深知做林家媳婦要過關斬將，皆因林父對她有微言，若最後都過唔到林父嗰關，林峯同千語分分鐘可能來一招「米已成炊」都話唔定。
據知今次日本之旅前，林父（林華國）曾講到出口，提醒個仔「搵錢辛苦，應使得使」。皆因上幾次的旅費太驚人，嚇窒林父。「上次阿峯去完米蘭返嚟，卡數差唔多成三百萬，其中一條鑽石手鏈仲過百萬。以往阿峯點會使錢使得咁誇張，林爸爸亦心裏有數。所以成日提醒個仔拍拖同結婚係兩回事，不過阿峯就瘟女大過天，當然聽唔入耳。」知情者說。
雖然千語強調同林峯講心唔講金，不過看其周身名牌、出入名店的頻率，加上之前又遊說男友買三百萬 Aston Martin跑車及億八舂坎角豪宅，野心不小。林峯兩度因為老竇反對未有送車送樓給 BB。
試餐椅
兩人在傢俬店 Soholm Cafe睇餐枱，千語更拉埋男友試坐一套 31萬日圓（港幣約 2萬 5千）的餐枱椅。之後他們買了個價值 3,990日圓（港幣約 300元）的鯊魚公仔手套。
買鑽石保值
據知千語 BB最近是以保值為名，開口叫林峯送鑽石。「千語猛向阿峯落嘴頭，話想儲鑽石保值。女友開到聲，阿峯當然識做，依家送下送下都唔少。」
日本之旅後，林峯將會立即為無綫拍新劇《使徒行者》，但因為女主角佘詩曼手癱未能開工，兩人的對手戲要押後。林峯可能又會多幾個假期同千語 BB蜜運了。
細佬唔 like
林峯弟弟今年五月大學畢業。林峯一家及表妹林夏薇親自到賀，弟弟將親人合照放上網，但冇 BB分。
豪門唔易入
女星愛公子，不過圈中有不少女星同富二代拍拖多年，但都因為未能過到未來老爺及奶奶關口，一直入唔到豪門。
傅明憲 莊家彬
現年 43歲的傅明憲， 08年與葉劍波離婚後，同年與年輕她十載的莊家彬拍拖，去年更被拍到兩人於沖繩參加好友婚禮兼度假。 5日 4夜之旅兩人共處一室，莊家彬更被發現只穿三角褲。由於兩人年齡有差距，加上傅明憲曾離婚，所以戀情未獲莊父首肯。
|
鍾意就快D Share啦！
|
|
|