[忽然1周 961] Joey開騷嚇一嚇 Joey,容袓兒,MW,

Joey話今次開騷最揼本，除咗搵中國著名攝影師陳漫拍海報，又有英國知名帽子設計師 Steven Jones做頭飾，再睇埋台上 dancers數目，就知今次成本真係唔平。

媽咪姐

Joey開騷嚇一嚇

《忽周》上期報道天後容祖兒（ Joey）同男友劉浩龍最近因錢銀問題（ Joey唔肯入股男友新開嘅餐廳）而冷戰。啱啱周六（ 21日） Joey就喺紅館開騷，一開始唱〈小日子〉竟然就好似開咗水喉咁，邊喊邊唱，搞到甩嘴兼走音，媽咪姐都打個突，以為佢情傷好深！

好在，佢跟住唱〈這分鐘更愛你〉、〈習慣失戀〉等經典歌，水準返曬嚟。失驚無神，仲可以半裸演出，好鬼搏命！啱嘅，愛情咁漂渺，我哋做女人嘅，都係俾心機做嘢實際啲。

裸你命

Joey呢套衫可謂最激。肉色透視貼身 bra top，前面黐粒星星就搞掂。側身睇，簡直似半裸， woo！

師兄隱身捧場

記者喺台前唔見師兄， Joey就咁話：「佢有嚟，不過坐得高啲，慢慢先坐番落嚟。」之後就喺網上見到汪阿姐同師兄喺後台合照，冷戰有轉機喎！

扮大肚

唱〈世上只有〉時， Joey扮大肚出場。佢話：「要試嚇佗仔嘅感覺！」大家問天後幾時真係生？佢就話演唱會後先諗喎。

多次去美國學舞嘅 Joey，今次都由美國請 dancers幫手，仲叫佢哋做「黑朱古力 dancer」。咁望落又真係好有台型嘅！

呢個白臉日本歌姬造型又係令媽咪姐驚一驚，不過裙身啲花會發光同變樣，又幾靚嘅。

呢排緋聞多多嘅霆鋒，難得都肯嚟捧 Joey場，同老闆楊受成夫婦一齊坐。

鍾意就快D Share啦！

下一篇 》