全城熱爆的娛樂八封新聞 & 時事趣聞 & 生活 + 趣聞
人稱顧老闆嘅顧紀筠，財力深不見底，自家設計珠寶首飾多年嘅佢，近排仲搞埋陀飛輪腕錶。上周五（ 20日），佢創立嘅自家品牌 KuTour揭幕，當場公開兩款最新鑽石陀飛輪腕錶，閃到眼都花埋！
同樣係城中富婆嘅鄺美雲，珠光寶氣撐場，閃到不得了。話曬佢都係做珠寶生意，當日梗係出動自家鑽飾，仲戴埋隻 40幾萬嘅自家設計心形鑽錶，一樣夠曬搶。
顧老闆嘅陀飛輪腕錶，其中黃鑽款以「颱風」為概念。佢話因為自己出世嗰陣咁啱溫黛襲港，全家去醫院探佢，避過被山泥活埋木屋嘅浩劫，特別感恩。隻錶鑲咗 VS級數黃鑽，連鄺美雲都睇中。
明顯悉心打扮嘅狄波拉，孖住鬍鬚 Kong一齊到場。手上戴住藍白鑽錶，鬼咁好火，不過點都唔及佢孭住嗰個紅色山寨版電話套搶。心情靚靚嘅拉姑，聽到記者問孫仔同霆鋒嘅嘢，邊行邊答︰「哈哈，咩喜事！又唔係我大肚。（霆鋒有新戀情？）同邊個？同你（指記者）呀？」明顯唔敢多事。
