全城熱爆的娛樂八封新聞 & 時事趣聞 & 生活 + 趣聞
骨中 V 呢件幼帶 deep V晚裝睇落好牙煙，但背脊係皮帶設計所以唔會鬆，前面亦黐滿膠紙包保唔走位。身材如 iPad嘅 Sammi被七個外籍 model扮抱起，現曬肋骨，咦，心口有條「陰影」事業線！佢話用咗成個月練手臂、節食、保養皮膚，非常認真㗎。
媽咪姐同成班 fans等咗 3年， Sammi終於再出新碟《 Love is Love》！今次唔係福音碟，形象自然可以激啲，大碟 MV個個 look都好鬼性感，全部由合作多年嘅形象設計師鄧麗幫佢配襯，阿 Zing負責化妝。不過，媽咪姐見 Sammi瘦到現曬肋骨，真係戥安仔肉痛！乖，影完相食番多啲嘢嘞，後生女。
破戒食
雖然為咗著靚衫要節食，好彩 Sammi偶爾都會放縱一下，食嚇炸大腸、煎蠔餅等等，間唔中一次，冇所謂啦。有啲肉，安仔都攬得舒服啲啦！
喱士睫毛 次次有驚喜嘅阿 Zing今次用「喱士布」取代眼睫毛，黐喺 Sammi嘅下眼瞼上，上眼線就塗上深深的黑眼蓋膏。呢啲妝真係唔係個個受得起！
鑽石眼淚 露完上又到露腳，恤衫配超短褲，阿 Zing喺 Sammi下眼瞼黐閃石，似「鑽石眼淚」。 Sammi喺三角鏡內跳舞，不過甫士有啲似坐緊無影櫈。
狂野豹妹 雖然 Sammi成日著高跟鞋做嘢，但著住對 6吋豹紋鞋，都要步步為營。
透視泳衣 仲有一款似透視泳衣，中間以十字架設計，遮重要部位。 Sammi仲自拍放上微博，解釋呢件衫唔遊得水，為咗工作，先以好大勇氣說服自己著呢件衫。
