本週一（三月三日）照顧養子，拼命搵錢的張慧儀返深水埗巡鋪，她主力打理賣馬來西亞家鄉食品的檔口。湊埋嚟嘅九歲養子 Hanson則跟店員吹水打發時間。
探熱針
帶子搬返香港 張慧儀深水埗開檔
過去七年帶住患有先天性心臟病的養子，在內地打拼的張慧儀，去年拍罷無綫新劇《女人俱樂部》後決定帶同養子回港定居，並在深水埗開百貨店，為替長期要醫護的囝囝儲醫藥費，張慧儀親自湊客，走平價街坊路線，賺得一蚊得一蚊。
售價平一兩成
有深水埗街坊指，去年復出拍劇的張慧儀不時在區內一間小型百貨店內打點，向客人推介其家鄉馬來西亞怡保的特產小食。
本週一（三月三日）下午，本刊記者到上址了解，見到戴住眼鏡的張慧儀，在店內跟夥記傾談，已經九歲的養子 Hanson也在場。
張慧儀的小型百貨店《激安の殿堂》，位處深水埗黃金商場旁，鋪面約有千呎，食品日用品家電樣樣有售。如「阿信屋」一樣，大部分食品來自日本，部分餅乾，咖啡售價比一般超市平一至兩成，吸引不少顧客掃貨。
大客吳孟達
現場所見，張慧儀大部分時間留守擺設「貓山王榴蓮餅」、「椰王香餅」等怡保小食，又夾雜了賣藥油的貨架附近；見記者走埋去，她第一時間攞起藥油力 sell。
「呢隻油好好，吳孟達都買咗成千支送俾啲朋友用；隻油去瘀去水腫都得，入面有埋真實個案俾大家了解嚇……。」
落足嘴頭，再嚟親自示範。
「嗱，你喺腳踭位捽十五分鐘，好快見效。因為隻產品係香港造，又好用，我先攞番嚟賣！」其間，店內顧客不時好奇眼望望，但張慧儀毫不尷尬，集中火力 sell足五分鐘。
兒子學費八千
原本在廣西經營禮品生意的張慧儀，去年拍罷曾志偉做監製的無綫新劇《女人俱樂部》後，決定搬返香港。
「佢想個仔喺香港讀書，三個月前由廣西搬咗返嚟住。個仔依家喺北角讀嘅國際小學，每個月要八千蚊學費，加埋醫藥費， part time工人同埋三萬蚊屋租，好大開支，所以佢好搏命。」知情者爆。
記者道明來意，張慧儀承認因為兒子學業，才決定回流返港。至於選址深水埗區開店，她聲稱是由拍檔決定，店鋪開業只有數月，今個月底會在佐敦開分店。
經營小型百貨做街坊生意，張慧儀說萬事起頭難。
「好似呢啲價錢牌，推介單張，全部係我哋一手一腳整，我一有時間亦會盡量返嚟睇鋪。」
跟住又職業病發，連記者都唔放過，「呢隻餅冇落香精㗎，係用真材實材嘅榴蓮做餡……」
到處打拼
06年張慧儀在北京收養當時只有兩歲的 Hanson，擔起母職的她便拼命工作。在北京一邊賣家族果醬，一邊投資印刷廠。兩年後生意不景，她毅然帶住孩子到廣州做推銷，賣保健及護膚品。之後她以個人推銷技巧，成功將港式甜品店「許留山」引入內地十多個城市。直至去年她轉戰廣西做參茸禮品生意「慧•慷鑫」，事業終於站穩了腳。她曾在訪問中說：「不時開完會要抽時間湊仔放學，喺屋企餵佢食完飯再返去開會，有段日子捱得好辛苦，返屋企匿埋喊。」
|
鍾意就快D Share啦！
|
|
|