不慎踢爆蘇永康今年結婚 吳國敬尷爆：阿公對唔住
2014-03-04 23:53:00
吳國敬同女友Elaine齊齊行婚紗騷，阿敬更錫女友面珠，認真sweet。（攝影：陳俊強）
吳國敬同女友Elaine今晚出席一間婚紗公司晚宴，問到佢同Elaine何時正式拉埋天窗？佢笑言：「呢次當Rehearsal（綵排）啦，講笑啫，今次我哋為咗慈善，同兒童癌病基金籌款，我哋成班朋友支持呢個籌款活動，同埋我又見今晚啲衫咁靚，當Party咁玩，好開心，好有意義活動。」
有冇順手揀下啲衫？阿敬話：「有好多套好鍾意，希望老闆贊助，畀個折頭我。」
問到係咪同女友成功求婚？阿敬話：「邊個講求婚成功咗？（求咗未？）求咗好多次都唔肯。」提議佢即場求多次？阿敬話：「唔可以咁造作，到時定咗日子大家會知道，到時大家飲多杯。」記者笑問呢張「期票」要開幾耐？阿敬就話：「我都走唔甩。（係咪至今年底？）呢個問題保持緘默。」
咁係咪會爬老友許志安頭？阿敬就話唔知佢哋會幾時結，但不慎漏口風踢爆蘇永康今年結婚，佢話：「肯定爬唔到阿康頭，阿康（蘇永康）就好快啦，嚇﹗你唔知咩？」
當講到蘇永康本人否認咗，令阿敬無意中爆大鑊，佢即尷尬話：「咁就唔知咯，講錯嘢添我，等佢鬧下我，（即係今年啦？）我唔知呀，可能我收錯風啦。」阿敬及後再話：「佢實鬧我，阿公（蘇永康）對唔住。」
阿敬笑言今晚婚紗騷當係rehearsal。
阿敬無意中踢爆蘇永康今年結婚，即大呼：「講錯嘢添﹗」
蘇永康早前否認今年結婚，點知轉頭被老友阿敬踢爆會今年結婚。（資料圖片）
日前蘇永康帶埋女友欣賞徐小鳳個唱。
|
鍾意就快D Share啦！
|
|
|