面對面
來自星星的前度 羅霖
韓劇大熱，羅霖也在追《來自星星的你》，說想看看年輕人現在流行甚麼。
91年當選亞姐冠軍、 96年和拍拖 5年的劉坤銘結婚，嫁濶少、做濶太、一口氣生了三個兒子，照劇本發展，結局該是「從此以後幸福快樂的生活下去」……
可惜這是現實世界，不是韓劇， 12年 10月，羅霖宣布與劉坤銘結束 16年婚姻，昔日愛侶現在溝通靠律師和菲傭，下次「約會」是下個月的家事法庭，一邊被前夫追討贍養費、一邊宣傳 23年以來拍攝的首部電影《愛•尋•迷》…… 48歲靠煲韓劇了解時下年輕人，因為她 48歲才向現實低頭重新走入社會。
離婚、工作、養家、育兒、打官司，甚至是第一次拍戲就要拍床戲、對手還是年輕自己 18歲的關楚耀，羅霖說都不難：「再攰，攬嚇三個仔就似叉足電可以再嚟過；拍戲，可以瞓身落去當自己係第二個人，最難，其實係唔明點解，一個曾經咁熟悉、喺身邊生活過咁多年嘅人，會變咗第二個、會變得咁陌生。」
又靚仔又有錢、學識淵博善解人意，仲要有超能力永遠在最危急關頭救你於水深火熱？對不起，現實世界裏來自星星的不是一個完美男人，而是你本來以為可以共度餘生的完美男人，脫掉外皮搖身一變恍如來自外星的陌生人……姊妹們，捨得醒未？
闊太是角色
91年當選亞姐冠軍、 96年嫁人淡出幕前，短短五年，羅霖的演出經驗其實不多。不過七、八十後都該記得， 96年她加入《真情》扮演雙雙，與彩瑤（張慧儀）一齊爭阿海（黃智賢）。這段三角戀當年一樣被全城老嫩追到七彩，最後是雙雙移民加拿大，成全了阿海與彩瑤。
「呢樣嘢我要多謝無綫，公司同寶華姐（《真情》編審）真係好錫我，公司啱啱簽我做經理人約、畀我主持台慶又話要力捧我、本來阿海呢條線都安排最後同雙雙一齊，結果因為我要結婚，特登為我改劇本。呢個決定好大，我問過屋企人、又同司棋姐、家燕姐傾過偈，大家意見都好一致，事業我可以隨時投入，但好嘅婚姻錯過咗唔會遇到下一個，所以，我喺嗰年選擇咗結婚。」
婚姻到底是好還是壞，真得要走到最後一步才能找到答案，事業卻果然應驗了前輩們的話，隨時隨地能重新開始：去年獲才子陶傑邀請接拍《愛•尋•迷》，首次大銀幕演出就是 48歲失婚闊太搭上廿𡃁洗頭仔滾床單。不得不讚羅霖一個字：勇。勇在 48歲處女下海演床戲、勇在 48歲以前她的公眾形象正是闊太，一點不怕惹人無限聯想。
「有咩好怕？有咩好聯想？劇情入面個闊太有幾億身家，我邊有幾億身家？我唔係廿幾歲，做唔番啲純情𡃁妹，唯一係擔心屋企人點諗啫。我問過爹哋媽咪意見，佢哋話我大個自己揸主意，我又問過三個仔，大仔話：『有乜所謂，西片成日都係咁！』，二仔話：『片酬多唔多？』，細仔就問：『嗰個係唔係你男朋友？』、我話拍戲，唔係真，佢哋就畀我拍喇……我自己係咁諗，同三個仔都係咁解釋，媽咪唔係名媛、唔係 ball後、更加唔係明星，就係一個藝人囉！好似司機、護士一樣，藝人都係一份職業，唔係當年做唔到，𠵱家要證明啲乜嘢，就係遇上一個濶太角色、投入角色咁簡單，唔需要聯想。」
我們相愛過
輕描淡寫處女床戲，事實上沒有羅霖形容得那麼簡單。尤其當年活躍娛樂圈的 5年間，演戲經驗加埋只有三部電視劇，九十年代的她，甚至還說簽約電視台、做藝人的首要條件是不拍吻戲。
「選亞姐，一聽到要喺西班牙公眾場合著三點式已經想退出。簽無綫拍劇，話到明唔可以性感、唔可以拍吻戲。我一直好保守、面皮又薄，選亞姐時仲未識劉生添，絕對唔係驚第時出嫁唔好睇，係受慣保護、過唔到自己嗰關。我爹哋係醫生、媽咪係護士、家姐大我歲半，媽咪佗我到 7個月就生我出嚟，因為早產、又因為有哮喘，自細就俾屋企當公主咁湊，瞓覺驚我唞唔到氣陪我瞓、食粒提子媽咪剝皮去核送到口邊、屋企冇請工人，家姐搶曬所有家務唔畀我掂，連大個返工做嘢，佢都係凡事諗我先，連買新衫都係畀我著先。 18歲讀完中學就做空姐、 24歲一選亞姐就做冠軍、然後結婚、生仔……係真㗎，我以前嘅世界幸運啲、簡單啲、畀我可以有選擇、可以留畀自己多啲底線。」
羅霖說開始變得硬淨，不僅僅是婚姻破裂以後，而是早於 17年前第一個兒子出生：「呢個係女人天性，知道個仔要依靠我，女人就自然變得硬淨。以前我俾人照顧慣，但係大仔兩歲時我哋喺新加坡生活，佢撞穿頭我第一時間唔係打畀老公，而係人生路不熟都自己送佢去醫院。同前夫分開、阿媽生瘤，我再難受、再難過都係匿埋喺廁所喊，或者三個仔上曬床自己返房喊……每日喊天光喊咗半年，都係因為啲仔，想做個好榜樣畀佢哋睇，話畀佢哋聽，咩事都好，都一定要企番起身。」
羅母今年七十多歲，十多年前患過乳癌，本來已經痊癒，去年又再發現新瘤。我問為甚麼，羅霖說：「因為呢兩年太多事情讓她煩心，好彩個瘤係良性。但係佢都仲係好擔心我嘅官司，下個月我又要上庭……」
去年三月接受雜誌訪問，羅霖說過沒福分做濶太、沒有收過前夫的贍養費等等，沒多久就收到夫家的律師信，告誹謗兼反向女方追討贍養費，十六年夫妻，現在聯絡一概經律師和菲傭傳話。即使如此，羅霖說還是記得對方當年的好處：「始終有相愛過，佢始終係一個心地善良嘅人、又係一個錫細路嘅好爸爸。我最記得係第一個仔出世，最溫韾、最充滿期待，兩個人嘅聯繫最多……」
我要的幸福
前夫從以前的好爸爸變得如何陌生，同樣不敢多說，因為動輒會收律師信。
「我媽咪由細就教我，一定要忍，忍嚇忍嚇就一世。但係試過搬去上海同我哋住咗兩年，連媽咪都話，畀我自己決定。三個仔比媽咪睇得更多，發生咩事，佢哋更明白，係細仔 8歲仲會問我同爹哋會唔會好番……我答佢冇可能，我同爹哋之間已經冇咗愛情。做夫妻十幾年，就算離婚，點解唔可以為咗啲仔繼續做朋友，我可以，但係佢唔得。我覺得呢段關係，佢似女人、我似男人，關係完全調轉……唔知咁講會唔會又收到佢律師信。」
分居以後有報道指羅霖瘟𡃁仔，羅霖多次否認離婚涉及第三者，不過她承認現在追求者眾，二十歲到六十歲都有。影樓裏，攝影師讚她性格外形都不像 48歲，我也說羨慕她現在還有市場，她聽了只是苦笑。
「有市場有咩咁開心？我呢個年紀先至離婚，自信變咗零至真。係同一個人白頭到老幸福、定係好多人追係幸福，你話呢？我嘅要求好簡單，淨係想搵一個可以終老嘅人，然後生活平淡、仔女聽話……下一世？唔好搞喇，做人一世已經夠辛苦。你喺窗口望出去，點解有啲人住高樓大廈、住別墅揸 Benz；有啲人係乞兒、做地盤，飯都食唔飽呢？命運生出嚟，係咁就係咁，唔可以同人比較，家家有本難念的經，你睇佢穿金戴銀，其實人哋要忍受幾多嘢你又知唔知？」
闊太流浪記
以前住西半山，羅霖現在住深井父母村屋家中，因為地方有限，只能帶最小的兒子同住。以前出入有司機坐 Benz，羅霖現在靠的士，離開時，我看著她腳下踩著五吋高踭鞋，與菲傭各分工提著一袋二袋，一步一艱辛走過凹凸不平的石路、穿過鐵閘、登上的士。
那一袋二袋都是羅霖為拍照自備的私夥，拍每張照，她都把頭髮梳到一絲不苟，把高踭鞋襯到絕，然後鋪開大堆耳環和頸鏈揀對字母鑲石的才上場。
即使流落到人間，行緊顛簸石路，濶太即是濶太，無論如何在鏡頭前得要閃令令。
|
鍾意就快D Share啦！
|
|
|