CY女拒收回言論 秋生刪fb回應 又起罵戰
2014-03-04 22:17:00
黃秋生表示與梁振英次女梁齊昕只有一面之緣，但就認為大家不應以文革批鬥手法攻擊梁振英父女，而且兩人亦有言論自由和人權表達意見。
CY次女梁齊昕就明報前總編輯劉進圖遇襲案後，喺網上留言質疑事件與新聞自由是否真有關係？即時惹起不少人評擊並直指其言論冷血，事件甚至演變成杜汶澤開火鬧CY次女，黃秋生就出言護航，又質疑杜汶澤有幾熱血。但杜、黃罵戰未有繼續發酵，秋生亦刪走曬網上所有留言。
事隔幾日，阿澤已經同老婆飛去第二度度假，而秋生晏就又喺fb發表言論，先係寫上「用反對打壓言論自由的理由去打壓言論自由」，繼而激起唔少網民反彈，秋生就回應謂:「我唔係講啲集會記者，我係指你班喺我呢度嘅喧嘩者，你哋冇人哋咁正義。唔好又借意抬高自己，係咁多啦。」此言一出換來更多網民嘲諷佢係梁粉。
面對近乎一面倒反對聲，秋生續道:「有怎樣的公民便有怎樣的社會」，又表示一直以來佢都勇於表達自己嘅見解，但補充謂:「當然，透過媒體表達往往會有一定的模糊」，並謂:「以髒話對抗髒話，以無禮對付無禮」。
面對排山倒海網民狙擊，秋生繼續發表己見:「在這自由的電訊世界中，不需理據及理由地謾罵，人身攻擊，只因我看你不順眼，都不需負上責任。尤其是躲在群衆中那些無名無姓的人。」
最後秋生寫道:「現在有比我的告白更重要的事，保衞學術自由。沒有學術自由，香港人認知的地球將會是方的，危急！」未知是否回應今日李家傑斥港大鍾庭耀操弄民意不利愛國愛港陣營一事。
其實秋生之前接受本報訪問、談到遭網民圍攻時，已用文革做比喻網民批鬥CY父女，更指:「你覺得佢唔啱，你可以審判佢，但唔可用暴力或者一啲非法行為去侮辱，或者公審佢。」又謂:「呢個女仔(指梁齊昕)係冇人權嘅，佢哋有，但你哋做嘅嘢，同你反對緊嘅人有乜分別？」
至於梁齊昕在接受《信報》訪問時回覆指，在fb留言「或許不是一個很好的主意」，同時明白自己係喺敏感時候觸及敏感話題。佢形容劉進圖遇襲係一件可怕、令人震驚及反感嘅罪案，令佢感到憤怒，並且「推動自己閱遍相關資料和新聞，並作出評論」。
對於網民留言反駁，佢表示完全不感到難過，更指反而同情網民有好多空閒時間，並形容部分「極端、瘋狂」，留言「極有娛樂性」，又建議部份有創意留言嘅網民應該將創意用喺其他有建設性嘅地方。佢重申看法純粹個人意見，不代表他人及家人，又表示對襲擊予以譴責，但就不會撤回早前言論，並批評有人借劉進圖案反政府，而網民係尋找「出氣袋」去反政府、反中央。
阿澤同老婆田蕊妮已經去到尼泊爾，遠離煩擾。
好多行李喎!
|
鍾意就快D Share啦！
|
|
|