網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年7月11日 星期五

[忽然1周 989] 翠如瞞住父母 另築愛巢冧蕭正楠 翠如,蕭正楠,黃翠如,MW,




30/6黑面復工

原本諗住同黃翠如出埠,點知最終放假唔成。 6月 30日,蕭正楠銷假復工,睇得出佢心情麻麻。

滾熱辣

翠如瞞住父母 另築愛巢冧蕭正楠

5月「翠蕭戀」斷正後,兩人獲大台撐腰,高調打情罵俏,更不避嫌沙灘浪漫,輸家何傲芝只有酸溜溜的份兒。不過,翠如受小三形象影響,與洪永城主持的足球節目收視插水,跌破 20點。大台見形勢不妙亦不敢造次,原定 6月尾播出由翠蕭主演的愛情劇亦立即抽起,連兩人齊齊放大假到峇里預支蜜月的計劃亦被迫取消。

「翠蕭戀」暗湧陸續有來,據知原來蕭正楠還未過到女方家長嗰關,黃爸爸更嬲爆男方令女兒變小三,兩父女更因此大吵幾場。為了掩人耳目,原本與父母同住的黃翠如,在住開的馬鞍山聽濤雅苑另租單位,作為兩人幽會的愛巢。








私隱愛巢

黃翠如和父母居住的聽濤雅苑,是馬鞍山的名牌樓盤。翠如 BB以月租兩萬租多一個單位,一來方便同蕭公子幽會,二來貪聽濤雅苑多出口,私隱度高容易避開傳媒耳目。

自從「翠蕭戀」斷正後,大台見翠如主演的節目收視跌,勒令兩人將戀情低調。不過剛剛熱戀的翠蕭卻難忍相思之苦,既然香港傳媒耳目眾多,於是把心一橫,齊齊請假一周,打算享受陽光與海灘。

「翠如本來想去沖繩,但 Edwin(蕭正楠)想去峇里,最後翠如都遷就男友意願。為避開傳媒耳目,佢仲打算搵熟人訂機票兼玩埋轉機,都係想同男朋友過嚇二人世界。不過,後來佢哋齊齊放大假嘅消息被周刊踢爆後,大台高層即刻要佢兩個銷假,唔想俾人再炒作。」知情者說。

臨時銷假復工

兩人在端午節高調在沙灘出巡,原來當時黃翠如已經暗地裏,在聽濤雅苑租多個單位,方便同蕭正楠密會。《蘋果日報》圖片

大台施壓,上緊位的翠蕭亦不敢違抗。 30日早上十一時許,臨時銷假的蕭正楠面黑黑、嘴扁扁返大台開工。蜜遊計劃臨時撻 Q,又難怪蕭公子心情低落。除了大台壓力,翠如 BB的父母原來對男方都甚有微言。

六月,翠如 BB出席活動時,透露父親節活動冇預蕭正楠,亦坦言男友未見家長。「佢(蕭正楠)近日要趕拍劇,所以唔會啦。(幾時見家長?)未呀!邊有咁快,屋企女太多,有排排。」

黃父嬲爆蕭正楠

黃翠如拍劇,亦不時同蕭公子互通短訊,更暗示男友要佢多留言。連拍檔洪永城亦忍唔住話:「有人邊睇留言邊微笑。」

據知出道以來一向以純情形象見人的黃翠如,深得父親寵愛,對於女兒,黃爸爸一向十分緊張。翠如 BB曾自爆中學時先斬後奏宿營,最後黃爸爸竟然現身營地將愛女接走。

據知翠如為愛同老竇反目,並非第一次,雖然她平日是乖乖女一名,好聽父親話,但一拍拖就會變得反叛。三、四年前,她試過同個近五十歲嘅圈外男友拍拖,但父母唔鍾意,嫌對方年紀大又吊兒郎當。但翠如一意孤行,父母都冇佢辦法,最後他們因意見不合分手。

不滿女兒變小三

「依家輪到蕭正楠,黃爸爸好嬲個男仔未同女友(何傲芝)分手就追佢個女,覺得佢靠唔住。最嬲係搞到佢個女做小三。因為呢件事翠如同父母嗌咗幾場交,翠如見老竇好火,亦唔敢再刺激佢,雙方冷戰緊。」知情人續說:「上月初,翠如靜雞雞喺住開嘅屋苑租多個單位,有時用開工做藉口喺新竇過夜,其實係方便同男朋友幽會,即使俾記者影到,佢可以話返自己屋企。」之前翠如出席世界盃活動時亦漏了口風想搬︰「因為屋企人受追訪,想搵地方住。」但就強調:「未想過同居。」

面對公司及父母壓力,翠如近日談到男友蕭正楠時,刻意拉遠距離,指兩人聚少離多,「佢要拍劇,我們好少見。」被問到結婚又話「冇計劃」,要等對方「攞咗視帝先」。

雖然飽受壓力,但談到有高人批兩人感情「冇將來」時,翠如就滿有信心話︰「我係基督徒,唔信呢啲。」愛得癡纏,不理父母反對,無懼影響形象,連屋都租多間方便會男友,這個廿四孝女友,蕭公子應該好好珍惜。

強顏歡笑

去唔成旅行,黃翠如周日( 6日)強顏歡笑,為應屆考生打氣。

28/6 BB冧仔

兩人不時喺微博打情罵俏。蕭公子出名是漫畫迷,黃翠如留言暗示他是小朋友,蕭公子就自言是「文物」,黃翠如即刻話要保護佢,冧爆!

據知蕭正楠母親(右)覺得是黃翠如逼走何傲芝,故蕭母對黃翠如亦有意見,還聲言「想個仔攞視帝多過結婚。」

蕭正楠一向鍾意陽光與海灘,故當初打算同黃翠如去旅行,亦以峇里為首選。

拖友做鄰里

圈中唔少拖友,為免被指同居,寧願租住附近屋苑,甚至是同一屋苑,學足電影《金枝玉葉》嘅劉嘉玲同張國榮住埋樓上樓下,夠曬方便。

胡杏兒 黃宗澤

兩人 05年因拍劇而撻著,但黃宗澤緋聞停不了,胡杏兒為睇實佢,先由加多利山搬到火炭碧霞花園,只需 6分鐘車程就到男友寓所。 2011年,她更搬到 Bosco所住的晉名峰同一座高層單位。

胡定欣 馬國明

08年兩人拍拖,胡定欣本來同家人居住屯門,馬國明則住太古城。胡定欣為方便見馬明,不惜由屯門搬到太古城,與馬明寓所只有幾分鐘路程。

大台轉軚

最初大台怕翠如小三形象負面,迫蕭正楠公開示愛。但最近二人戀情持續高調,高層遂轉軚,迫兩人銷假,避免兩人外遊被拍。

做騷示愛

今年 5月翠如被斷正在蕭家過夜。大台於是在《東張西望》「維穩」,要蕭正楠當眾示愛,強調黃翠如並非第三者。

隔空曬甜蜜

示愛騷後,一直封口嘅翠如終於 sweet爆回應,大讚男友奮不顧身保護自己。之後兩人不時在網上隔空打情罵俏,又被傳媒影到兩人 sweet爆拖手漫步沙灘,可惜翠如小三形象影響收視。

迫銷假復工

大台勒令要兩人低調拍拖。翠如和蕭正楠於是向公司請假,計劃一起旅行,但出發前被傳媒踢爆。為免再成傳媒焦點,大台勒令兩人復工, 30日蕭由荔景寓所駕車返大台復工。



鍾意就快D Share啦!