[忽然1周 989] 六歲仔爭崩頭入名校 郭晉安：老婆做咗好多嘢 郭晉安,MW,

一家襯到絕

正放假的郭晉安，當日一家四口加外傭姐姐嘆午餐，全家還以黑白灰打扮，襯到絕。稍後數天他們更帶仔女出外旅遊，以慶祝大仔考入名小。

娛樂喧

六歲仔爭崩頭入名校　郭晉安：老婆做咗好多嘢

子女考入名校，永遠是父母的夢想，郭晉安、歐倩怡夫婦亦唔例外，為了今年 9月升小學的長子郭令山考入心儀的保良局蔡繼有學校，力谷兒子每星期學不同「雞精班」，塑造全能資優生。

據知婚後全職湊仔的歐倩怡，幾年前亦先後報讀營養學、市場管理學高級文憑、航空理論課程及考船牌，增值自己之餘，亦可為兒子爭取面試分數。

老婆為仔女學業出心出力，難怪問到安仔，其兒子考到名小，他表現萬分興奮，還大讚老婆：「佢做咗好多嘢！」

其他影片：>>六歲仔爭崩頭入名校　郭晉安：老婆做咗好多嘢！

郭晉安的 6歲長子令山，今年 9月即將成為小學生，身為虔誠基督徒的安仔，曾反對兒子讀名校，早年亦只把他送入較平民化的九龍城靈糧堂幼稚園。但面對社會競爭大，安仔夫婦亦不惜做「怪獸家長」，讓兒子學多項興趣班以便「攞分」，去年就有指他與歐倩怡為報小學問題鬧至分房瞓。

安仔本來打算為令山報十間小學，但老婆則認為兒子會「分心」，最後集中報了五間，當中有私校及直資小學，其中一間屬國際學校。二人的第一志願是在郝德傑道的保良局蔡繼有學校。早前安仔透露揀此校的原因是受兩個 10歲小演員影響，「有次拍劇，導演教班小朋友做戲讀劇本，其中有兩個特別 smart，我問佢哋讀邊間學校？佢哋答蔡繼有。放工後我返去同 Cindy（老婆）講，可以留意嚇呢間學校。」

其後歐倩怡到將軍澳商場會合郭晉安和細女食午餐。現場所見，較少曝光的細女，眼大嘴細甚可愛，樣子極似媽咪。

精靈細妹

歐倩怡自我增值

安仔夫婦婚後男主外、女主內，揀學校全權由老婆負責。據知歐倩怡早在阿仔未出世時已開始鋪路。當時她報讀中大營養學高級文憑，一讀四年，目的是將來做營養師，之後她又報市場管理學位，早前更成功考取航空理論課程及船牌。近日她再報讀兩個中大碩士學位，一心訓練兒子成資優兒之餘，自己亦以身作則。

「佢哋兩公婆自問讀書唔多，安仔喺長洲啲學校中五畢業，而 Cindy會考未放榜就入咗行，無論如何都想幫小朋友揀間好學校。呢方面 Cindy做曬功課，佢知道考小學除咗學生本身，仲要同家長面試。佢哋係名人，唔代表有著數，學校好睇家長嘅職業、談吐同學歷。 Cindy讀讀埋埋啲證書相當有用，學校會覺得家長教到小朋友，一定加分。」知情人士透露。

早在令山讀 K2時，安仔及歐倩怡已安排了一系列的「雞精班」狂谷兒子，如貴族英文班、畫畫、溜冰、拼音等，單是每月學費也花近一萬。去年中進入一連串小學面試前，歐倩怡再安排令山上 Phonics加強班，打好英文根底，為此歐倩怡說：「 Phonics真係好好用，只要學識拼音，見到英文生字都識讀出嚟。以前我哋冇人教，依家有能力就要盡力教佢哋，我仲同佢一齊學。」

日前收到收生通知，令山不負眾望考入第一志願保良局蔡繼有學校，如無意外也會直升原校中學，總算暫時鬆一口氣。安仔接受本刊訪問時說：「記得舊年蔡繼有 open day，阿仔見到啲哥哥姐姐表演，佢睇得好興奮，又話好鍾意個籃球場。可能因為印象深刻啦，佢面試時表現好好，但佢 in男拔萃時反而麻麻，所以我估佢較鍾意蔡繼有，考到真係開心到想喊。（你老婆出咗好多力喎。）都係嘅，佢做咗好多嘢！我開工忙，好在佢睇實。」

熱褲索媽

上周六早上（ 5日），歐倩怡帶大仔令山到九龍城參加幼稚園畢業綵排。即使生了兩個小朋友，但著住超短熱褲的她，身形依然 keep得唔錯。

為整靚仔仔 profile，歐倩怡除了自己報讀不同的碩士課程，還經常帶仔女做義工，今年 4月更一家四口步行籌款。

16人爭 1學位

位於深水埗郝德傑道的保良局蔡繼有學校屬私立一條龍學校，小一及小二每年學費達 6萬 5千，由於它有 IB課程（國際文憑課程），中學部又能報考 IGCSE國際普通中學教育文憑試，是九龍區不錯的選擇，故每年都有不少家長報名。而今年小學收生更爆額在 3,000人中收 180名學生，即約 16人爭 1個學位，如此「爭崩頭」，難怪令山成功考入，安仔坦言開心過中六合彩。

做義工為女攞分

搞掂了阿仔，又輪到為今年三歲的女兒張羅。去年她獲「國際培幼會」邀請做大使，諗到又可為阿女加分，二話不說即刻應承。「開頭 Cindy都冇即刻話做，因為佢真係好忙。但佢諗深一層，呢件事唔係為自己，係為小朋友。早幾個月佢哋仲一家四口一齊幫個會步行籌款。」知情者說。

in五間三間收

郭晉安透露希望囝囝入讀有 IB課程（國際文憑課程）的小學，因此讓大仔面試了四間有 IB課程的本地小學和一間國際學校，結果五間中三間成績不俗。上周四（ 3日），記者在活動上問安仔兒子考入名小一事，他表現雀躍說：「真係開心到想喊！」

登台掘金

近年郭晉安經常到內地登台，曾試過一星期走三、四場，以每場收 8萬人仔，一個禮拜便賺逾 30萬港幣，賺到笑。

賺錢狂買樓

有老婆睇實屋企，郭晉安大可專心搵錢，他一年拍兩至三套劇，再加平均每月最少兩場內地登台騷，每月估計淨賺百萬。本刊發現安仔一年多內，分別以個人及公司名義以 700萬及 833萬購入太古城一住宅單位及旺角一商廈高層舖位。太古城的單位僅約 600呎，相信用來收租投資。記者亦到過旺角商廈單位，原來已用作他與胞姐郭致恩合股搞的健康食品公司門市，似乎他有意把生意搞大。對於連氣買樓買舖，安仔不願多談，只說:「私人事唔想講太多，不過係開心嘅！」

強攻磚頭

郭晉安近年不畏摸頂，積極入市。根據土地註冊處資料，他早前豪擲千五萬，先後購入一商業大廈和太古城單位，其中商業大廈的舖位更用作他有份投資的健康食品門市，瓣數多多。

家長變怪獸

藝人為谷仔女入名校，個個出盡法寶，難免變成「怪獸父母」，令自己和子女都倍添壓力。

蔡少芬　買樓近校網

蔡少芬大女楚兒今年才 3歲，但蔡已為女兒考小學鋪路。本身住元朗錦繡花園的她，為了可以選擇九龍區理想的 31校網，去年 9月斥資 1,200萬購入西九豪宅凱旋門 500呎單位，方便將來報地址。

關詠荷　七碩士補習

關詠荷出名緊張 8歲女兒 Brittany，先是安排女兒入讀學費每年達 14萬的德瑞國際學校，保證由幼稚園直升中學一條龍。每天又安排她學英語、德文、公文數、體操、溜冰等，更誇張到請了七名大學碩士任補習老師，進行軍訓式補習。

吳君如　萬元英文班

愛女陳是知前年成功考入傳統名校瑪利曼小學。緊張媽媽君如在愛女歲半時便開始催谷，就讀每月學費一萬的貴族英文 playgroup，另外又學畫畫、彈琴、普通話、手掌畫，在家只可看高質素的電視節目，如澳洲頻道歌舞節目《 Hi-5》。

鍾意就快D Share啦！

下一篇 》