靚抽王
娛樂激戰 惡鬥世紀老八巫
娛樂新聞嚟講，識睇一定係睇罵戰，咁笨唔係因為我哋八，係因為從罵戰裏面，我哋可以睇到人性！同埋一個人嘅戰鬥力！
選手甲：甄妮
綽號：世紀老八巫（嗱，唔係我哋改㗎，係吳國敬先生改㗎！）
戰績：上年曾經數臭阿 G.E.M.冇禮貌，而「少年你太年輕了」嘅阿 G.E.M.竟然以為道歉就冇事，於是繼續被追殺。不過網民紛紛認為「而我不知道誰是甄妮」，同時一致證實其樂壇 Old PatPat嘅真震身份。
必殺技：恃老賣老。（嗱，都係網民話㗎！）
選手甲：向太（陳嵐）
綽號：中國（星）義勇軍
戰績：曾經插爆星爺幫王晶拍戲時工作態度惡劣，聲言以後唔會搵佢。由於星爺本身都有「窮到得番錢」嘅美譽，同時喺圈內嘅敵人已經多過朋友好多，於是向太全勝。
必殺技：老公係向生囉，不贅。
戰情分析：
比賽一開始，有樂壇 Old PatPat之稱嘅甄妮，就以其下半身嘅重量使出一招「道德高地」嚟落井下石，聲稱房祖名同柯震東係「吸毒小將」，希望國家主席習近平下令修理佢哋……我哋嘗試聯絡習主席，不過截稿之前都未搵到方法聯絡佢，相信佢嘅回覆多數係「而我不知道誰是甄妮」之類。
點都好，呢個時候向太終於忍唔住，使出一招「針唔拮到肉唔知痛」，講出一句「你也有小孩的。將心比心吧！」，並斥責甄妮係狠毒女人。不過身經百戰，嗌交多過食飯嘅甄妮當然冇被呢招擊倒，只係淡然一句「就事論事有何不可」就避過呢一擊。
呢邊廂另一絕地花生友吳國敬竟然喺擂台下面出招抽水，除咗話甄妮係「世紀老八巫」，仲直線抽擊佢「好討厭……好毒辣好嘔飯好核突。」由於吳生嘅出招，甄妮開始節節敗退，究竟今次佢會唔會好似上次鬧阿 G.E.M.咁，輸喺網民嘅密集批判手上呢？
|
鍾意就快D Share啦！
|
|
|