靚抽王
娛樂賭蕉王 Ice Bucket Challenge救地球
每期娛樂賭蕉王以專業角度分析熱門娛樂話題，為每個話題嘅發展可能性計算賠率，識睇一定係睇我哋！第日同親朋吹水都有啲揸拿！
一個 Ice Bucket Challenge，成個地球失晒魂。全球嘅富豪、明星個個善長仁翁上身，連香港一地都係嘅草民都好似房祖名、柯震東咁上晒癮不能自拔。有人批評佢哋浪費食水，但係我哋就認為呢單嘢情有可原，點解？因為好多人一生可能只有一次，可以同 Bill Gate、 Lady Gaga等名人做埋同一樣嘢而又獲得關注。鬼咩！如果唔係呢個活動，平時你試吓搵冰水淋自己吖，我夠膽講句，係絕對唔會有人理你嘅！
識着一定着白色衫
我哋身為凡人，唔明點解玩 Ice Bucket Challenge要着白色衫。但係阿 G.E.M.同埋 Jessica.C就應該明點解，皆因佢哋拍攝淋冰片嘅時候，仲會襯埋透底嘅白色衫加花哩碌嘅彩色 Bra Top。為慈善除咗出錢出力，仲兼顧埋視覺效果，認真唔話得。
想將冰水換成鏹水
正所謂一樣米養百樣膠人，呢個講嘢超高音嘅港女喺中環着住比堅尼大叫「我愛梁振英」，同時佢又冇提過成個活動係為咗乜嘢，好明顯佢只係為咗引人注意先咁做，基本上呢種行為同古時嘅裸跑博見報冇乜分別。
最嘥水嘅忘情水水
人稱張家輝嘅化骨龍，吖唔係，係人稱化骨龍嘅張家輝，玩 Ice Bucket都要搞笑過人，淋 1次唔夠，要淋夠 3次，令人諗起佢嘅名曲〈忘情水〉：「基鵝一杯忘情水，基鵝一杯忘情衰水，基鵝一杯忘情，忘情忘情水水……」
你唔好玩我啦，冰釋前嫌？
王 Wiki玩完 Ice Bucket，點名挑戰 So感涼， So感涼竟然冇好似上次咁走數唔俾 Wiki申請電視牌。佢成為找數真漢子之餘，仲話要冰釋前嫌，其食字抽水嘅能力同顏臉之厚，確實令人吃驚。
Ice Bucket Challenge係乜？
Ice Bucket Challenge（冰桶挑戰）係一項為咗引起大家對「漸凍人症」患者關注嘅籌款活動。參加者需要將一桶冰水倒落自己度，再拍片放上網，同時 tag3位朋友下戰書，亦要捐 10美元俾慈善機構。拒絕挑戰者，就要捐 100美元。
|
鍾意就快D Share啦！
|
|
|