[FACE 383] 求救 眨唔到眼唔識笑 面癱官恩娜搵腦科名醫打救 官恩娜,MF,

真面目

求救　眨唔到眼唔識笑　面癱官恩娜搵腦科名醫打救

地球是否已受污染？繼早前黃浩然突然患上「貝賽特氏症」，官恩娜（ Ella）又離奇患上「貝爾氏麻痺症」，導致右邊面癱，右眼不能眨眼及合攏，睡覺時更要用手術膠布遮眼幫助入眠。

據知 Ella已向唱片公司華納公司請假， 9月份全部工作推掉，全面停工等康復。 Ella更找腦科權威醫生打救。以 Ella每次出席商業活動收 10萬元計，單是停工 1個月， Ella已唔見過百萬。不過錢財身外物，健康當然最重要。

上週四（ 18日） Ella出席活動時忽然自爆患咗「貝爾氏麻痺症症」，右邊面完全郁唔到，仲邊講邊流眼淚，佢話因為眼眨唔到，所以受到閃光刺激就會「標」眼水。

35歲官恩娜（ Ella）近排剛派新歌，正打算全力做宣傳的同時，卻突然患上怪病「貝爾氏麻痺症」（ Bell's Palsy），令原本靚靚女女的 Ella右邊面癱，上週四（ 18日）出席活動時更喊住講病情，真係我見猶憐。據知 Ella問過醫生男友 Juan的意見後，便向腦神經科名醫盧文偉醫生求診。

「完全好唔番都有！」

本刊聯絡上盧醫生，他說由於要保障病人私隱，所以他不會回應官是否找他醫治。他解釋患此病在港並不罕見。「細菌入侵、唔夠瞓、壓力大等等都有機會發病。其實呢個症好常見，我一個星期都有一位新病人求醫。至於康復期就因人而異，有病人一星期，常見要幾個星期，但有啲人完全好唔番都有，成塊面歪晒。通常呢個病，醫生都會開類固醇俾病人，服類固醇其實影響唔大，塊面可能圓啲囉。」

靠樣搵食，面癱加塊面變圓真係唔想見人，難怪 Ella已推掉 9月份全部工作， Ella的經理人 May亦承認已代 Ella推掉 9月工作，「佢一路康復緊，不過暫時 9月工作推咗，至於 10月至 11月就要睇情況。」 Ella最新騷價差不多 10萬，閒時一星期都幾個騷，數數手指，淨係 9月 Ella已經唔見近百萬。不過錢，點及健康重要？

雖然休養中，但 Ella仍然造作，化行妝仲黐埋假眼睫毛自拍表情短片再 po facebook，讓外界知她康復中。網上圖片

官恩娜搵腦神經科名醫盧文偉打救。盧醫生的診所位於佐敦，離官恩娜居住的加多利山豪宅很近。收費按不同病況，必須預約。

月初 Ella接受訪問時話想早日成家立室，但轉個頭就面癱，唔知今次個病會唔會令 Ella同佢個老外醫生男友 Juan加速拉埋呢？

少有後遺症

如果有朝起身發現自己臉歪、咀歪、眼睛合唔埋，請別以為自己是中風，其實可能只是患了「貝爾氏麻痺」。發病係因為人體的第 7條腦神經受細菌感染導致患者免疫反應異常，引致面神經水腫、發炎，細微出血而導致麻痺。

治療方面，一般醫生會開類固醇，或者配合物理治療。約 3-6星期可以康復，極少有後遺症；但嚴重嘅，可能要施手術醫治。

鍾意就快D Share啦！

下一篇 》