全知言
為甚麼這麼多人講周星馳？
星爺呢排真係好 hit，除咗因為佢套新片《美人魚》進行遴選而經常見報，仲因為向太陳嵐（向華強太太）為咗篇網上萬言文而數臭周星馳，話佢偷咗向生嘅貴價紅酒，仲爭向生一句對唔住，之後唔少同星爺合作過嘅明星同電影公司老闆都加入數爆星爺。
雖然全城熱數周星馳，但星爺嘅電影，的確套套經典。老實講，星爺出道至今拍過咁多部戲，邊一部係唔笑死你？邊一部你冇翻睇又翻睇？一班女星原來亦 like爆星爺電影，而且個個都有自己心水。
鍾舒漫&鍾舒淇：得個知字啫
我記得周星馳喺《國產凌凌漆》入面有一個橋段，係周星馳吐咗篤痰，佢隔籬有個同鄉就問佢：「篤痰你㗎？」跟住周星馳答咗先：「係呀，有咩問題呢？」咁個同鄉就話喇：「冇，得個知字啫！」我覺得呢個好好笑係因為我哋平時嘅溝通，成日都會問一大堆嘢係無意思嘅，但係都會話：「得個知字啫！」即係等如我問你：「你凍唔凍呀？」「凍呀！」「我無衫比你！」「唉，你食…你食咗飯未呀？」「我未呀，好肚餓！」哈，得個知字啫，唔通餵你咩？
盧巧音：會吸住自己
周星馳嘅戲其實有好多部我都好想講，不過霎時之間要講一套，我會揀《喜劇之王》因為呢套戲唔只個戲名吸引，呢部戲係一坐咗落去就好似會吸住自己，入面有好多元素，搞笑各樣，其實都好好睇，係恰到好處，而成日會用到嘅一句說話就係：「係由內至外，去返外再返內！」
Yumiko：每次重播都好笑
我最鍾意周星馳一套戲呢，就係《逃學威龍》。我已經睇咗好多好多好多次㗎喇。套戲差唔多每一年新年都會重播，但就算每一次重播睇番呢，我都仲覺得好好笑！
黃芷晴：同 Daddy一齊睇
其實星爺好多套電影我都好鍾意嘅，但係最鍾意嘅都係《少林足球》！因為《少林足球》呢一套戲呢，我就可以同 Daddy一齊睇啦，同埋佢入面有好多角色都好特別。我好鍾意佢哋 crossover Michael Jackson嗰隻舞，然後就喺趙薇嗰個攤檔度跳舞囉！經過咗咁多年之後都仲好印象深刻。
市民 like溫情星爺
藝人都揀咗心目中最愛嘅星爺作品，唔知市民又點睇呢？全知言問過唔少市民，大部分都係話星爺喺戲入面有幾搞笑，對白有幾精警，但係以下兩位哥哥佢哋有啲獨特見解！
陳先生 3x歲
我最喜愛《賭聖》（其實佢想講《賭俠》），因為「你睇我唔到，你睇我唔到，你睇我唔到……」
梁先生 20歲
我最鍾意周星馳嘅係《武狀元蘇乞衣》。因為佢由好有錢嘅時候，變到好窮，之後出去乞食都唔肯出去乞，但係之後佢老豆病咗，為咗幫佢老豆結果一齊出去乞食，我覺得呢度好感動。
|
鍾意就快D Share啦！
|
|
|