[FACE 383] 冇碇企 余黨攻陷大台 區永權挑機 崔建邦淆底 崔建邦,MF,

真面目

冇碇企　余黨攻陷大台　區永權挑機　崔建邦淆底

《 Sunday扮嘢王》最後一集冇騷錢、羅蘭姐出騷竟然得個萬能插蘇當騷錢、年年賺錢卻裁減一百名幕後員工……大台賺大錢理得你班人投訴！查實好多藝員都暗鬧高層唔體恤民情，而且矛頭直指余詠珊。

最新消息下個受害人是崔建邦，據知因為崔建邦並非余詠珊黨派，余一早睇佢唔順眼，故已徵召「舊有線派」愛將區永權過檔，取代崔建邦，做大台主持台柱！呢次崔建邦危危乎

崔建邦有咁多大騷做，余詠珊都唔 like？

崔建邦在《女皇的盛宴》集集好似公公一樣扶汪明荃出場，毫無發揮，不過他對被打壓只能選擇啞忍。電視畫面

崔建邦雖然有《女皇的盛宴》和大騷如《港姐》、《保良》司儀做，但致命傷是他並非高層余詠珊愛將。自余詠珊入主大台後，以前有線的舊黨派如洪永城、黃翠如、陸浩明等紛紛跟隨過檔，愛將們亦成功安插去拍劇兼做綜藝節目，獨剩大騷司儀未有人爭，崔建邦先有得留低；而最近余另一愛將區永權約滿 nowTV後，即時被撬過大台。週日（ 21日）崔建邦表示：「我𠵱家剩係得《女皇的盛宴》，未有其他節目安排。」聽到區永權即將過檔，他即語氣變得無奈：「我冇回應，唔好意思！」

區永權幾時過檔？

區永權於 nowTV算受重用，經常有節目孭飛，主打專訪明星的《 E+Focus》是他離開前最後一個節目。電視畫面

區永權本來跟 nowTV仍有一年生約，但據知余詠珊急召他到大台幫拖，區永權於是 9月初死約約滿即走，就算要過 3個月冷河亦在所不計。上週五（ 19日）區永權承認同余詠珊曾飯聚傾過檔：「我 9月初約滿，都想停一停工， 3個月囉！（係咪余詠珊叫你過大台？）同佢有非正式食過飯囉，都未落實，大台我都想做㗎！（停工 3個月唔使養家咩？） OK嘅，呢排兩個仔返學都多嘢搞。（過去係咪會取代崔建邦？）吓？約都未簽。」

大台仲有邊個危危乎？

陳貝兒離開《東張西望》之後，飛到巴西做世界盃節目已算最有印象，之後曝光機會大減。電視畫面

唔講唔知，原來「余黨」成員陳貝兒都得唔到歡心，話說前年余詠珊初初入主大台，陳貝兒一收到風立即致電恭喜對方，余即覺得陳貝兒「好假」，但因要在大台建立勢力，先繼續用陳貝兒作號召，難怪陳貝兒一直不受重用，做完世界盃及《東張西望》之後出鏡率已大減。

成個大台都係有線友？

「有線娛樂新聞台」 03年在有線首播，當年一半以上主播已跳槽到大台，只有鄭文在 nowTV，余思敏則嫁了鄭中基做少奶奶。網上圖片

余詠珊於有線電視期間，成功打造了《有線娛樂新聞台》，陸浩明、黃翠如、區永權、陳貝兒、梁嘉琪、衞志豪等都是她的愛將， 12年余詠珊入主大台做綜藝科總監，樂易玲明顯失勢，「余黨」即逐一跟隨過檔，黃翠如、洪永城、梁嘉琪等全部有運行，又做主持又拍劇，𠵱家大台被有線友霸晒

鍾意就快D Share啦！

下一篇 》