黃子華一連 11場《楝篤笑唔黐線唔正常》開騷，近年減少講政治嘅佢，一開場就「倒抽一口涼氣」，講催淚彈講佔中，幫市民出番啖氣。
全知言
如果黃子華講呢啲！
黃子華即係黃子華，就算佔中佔旺佔銅都阻唔到佢搵食，觀眾準時入到場、黃牛照炒到過千。子華更同觀眾夾晒嘴形，佔中話題大量發放。
如果下次黃子華再開楝篤笑，你又想佢講邊位人物呢？一班明星、名人諗頭多多，陀住 7個月 BB既唐寧仲想子華講吓卡通人物添！
唐寧拆解《 Frozen》
黃子華講乜人物都咁好聽我𠵱家接觸小朋友多，佢可以講吓卡通人物，《魔雪奇緣》入面兩個公主啦，好有興趣知道點解全世界都對呢兩個公主咁迷倒，肯定有啲事，我肚入面嗰個係女，唔知會唔會都鍾意呢，所以想佢（子華）剖析一下。
麥玲玲挖大家族
講啲富豪啦，梗係嗰幾大家族，幾大發展商啦，傳奇啲既人物啦，例如澳門賭場大亨何氏家族啦，有時講吓呢啲都好玩架，剩係講佢屋企都有排講
姚書軼講巨星
可以講番啲以前既 superstar，譬如梅艷芳、張國榮，一啲私人又好笑嘅嘢呀，未必大家都知道嘅嘢，用子華嘅方式講出嚟應該幾好笑；或者如果佢哋仲在生會係點。
周美欣爆大台
好想睇但買唔到飛，之前睇佢拍劇已經好好笑，棟篤笑係會更加好笑！如果講電視台明星會吸引，因為有好多係 friend，以前我喺溫哥華睇過黃子華 DVD係扮啲人物，如果佢扮啲電視台藝人一定好好笑。
市民：希望唔使再講梁振英
如果黃子華楝篤笑可以全民投票都幾好玩，有讀者就希望下次唔好再講梁振英，因為落咗台唔使再講喎。
Sam電子用品公司職員
下次希望唔使再講梁振英啦，因為下次佢已經落咗台，繼續講番阿爺或者小強已經好好喇！
林小姐 20歲 港大測量系 yr3
佔中三子啦，學聯都可以，都係𠵱家 hit既人，想知佢點評論佢哋。
Ben21歲 港大學生
講葉劉啦，因為葉劉亂講嘢囉，又想選特首應該寸吓佢囉，一個咁既人唔應該可以做特首。
|
鍾意就快D Share啦！
|
|
|