【C1頭條】神隱26年 白頭關正傑終現身
2014-10-15 00:45:00
關正傑的歌聲和形象正氣、聲線雄渾，過去他亦唱過不少勵志歌，是當年政府宣傳歌的常客。雖然關正傑性格沉默寡言，但怕醜性格反而成為他的殺手鐧，迷倒萬千少女，是當年歌迷的正直男神。
最近有網民難得share在美國唐人街一間餐廳遇見關正傑的相片，相中可見關正傑頭髮已變為全白，與他同行的還有一位女伴，當時二人似是用膳完畢，桌上放了一袋外賣，關正傑則正與一名相信是侍應的女士在傾談，向來cool爆、經常保持嚴肅的他更罕有露齒而笑，精神亦看來不錯。
當年關正傑有不少耳熟能詳的歌，《人在旅途灑淚時》、《天蠶變》、《大地恩情》首首都大hit，於各大頒獎禮獲獎無數，惟他在1988年推出《一個秋天》專輯後，突然退出樂壇，隨即消聲匿迹，並在1991年與太太移民西雅圖，由於他退出前沒有預告，也沒有告別演唱會，不少樂迷都感到震驚，對其繞樑三日的歌聲更加念念不忘。多年來有不少曾與他合作過的音樂人或幕後人，嘗試游說他返港演出也不成功，當中包括顧嘉煇，他接受訪問時曾表示，當年專程由溫哥華驅車到西雅圖找關正傑食飯，結果爭不贏結賬，同時亦未能打動他重踏舞台。
當年在寶麗金和EMI年代跟關正傑合作無間的音樂人馮添枝，昨日在電話中談到老友：「我對上一次同佢見面都十幾年前，佢返嚟香港大家見過，另外當時都有Email聯絡，但o依家就完全冇聯絡，我相信佢嘅意願係完全退出，想行新嘅路。」馮添枝透露關正傑除唱歌了得，亦有不少興趣包括彈結他和攝影，他大讚對方做事要求完美及是一個很有思想的人。但會否覺得關正傑完全不唱歌相當可惜？他謂：「呢啲我唔可以代佢答，呢啲係佢嘅決定，我會尊重。」
前港台高層李再唐跟關正傑相交多年，於4、5年前曾在西雅圖見過關正傑，李再唐接受電話訪問說：「聽講佢今年初都返咗香港睇屋企人，佢移民咗好耐，上次喺西雅圖見面，佢話自己肥佬樣，所以唔再唱歌，以前佢成日玩風帆，近年就少咗，生活比較平靜。」
李再唐透露張耀榮未離世前，曾多次想找關正傑回港復出開騷都被拒，他說：「佢真係好多hit歌，佢冇開演唱會好耐，佢聲音好靚，應該仍然係咁靚，雖然佢唱歌冇壓力，但唔想做準備功夫，佢最怕麻煩濕碎嘢，唔鍾意o依家嘅演唱會太花巧，佢只鍾意彈結他唱歌。」
關正傑正氣形象深入民心。
關正傑與陳慧嫻 (資料圖片)
有網民在美國唐人街一間餐廳拍得關正傑的近照。 (網上圖片)
|
鍾意就快D Share啦！
|
|
|