身形向來細小的司馬燕自切除胃部後得番 70磅，如今再瘦多 20磅，情況令人擔心。
《蘋果日報》圖片
真面目
正能量 50磅司馬燕腎瘤煎熬 大仔吳景滔報平安：落到床 ok！
「我只想，身體健康！」個個識唱， 12年確診患上胃癌，需要切除整個胃部的司馬燕，手術後曾一度好轉，仲可以同老公吳忠義（ Togi）再影婚紗相留倩影，可惜近日再傳出司馬燕的腎再生瘤，而膽管和尿管亦相繼出現問題。
上週司馬燕再次入院，老公 Togi醫院屋企兩邊走照顧老婆。週一（ 3日）大仔吳景滔表示：「佢（媽咪）落到床，食到嘢，情況 OK。」希望正能量爆燈的司馬燕能再次打低癌魔！
51歲的司馬燕自 7月與老公 Togi慶祝生日後，微博再無更新，據知司馬燕自切除胃部後，由於每餐只能食少少，故身體一直虛弱，朋友聚會亦推得就推，原先還有 70磅的她，至今已跌至 50磅。由於要照顧老婆司馬燕， Togi已將工作帶回家做，方便進出醫院探妻；而與司馬燕分屬好友的周美鳳上週前往探病後亦表示：「好希望司馬燕過埋呢個難關。」
冇聽過搞告別 P
司馬燕曾經在訪問時提過：「我以前無酒不歡，三個朋友可以飲四支威士忌。」可惜熱情好客性格始終對健康有損，司馬燕現在最想一家人齊齊整整。「𠵱家只要成個 family齊全就夠，阿仔眼中我係好媽咪，老公眼中我係好老婆，如果要走我都無悔。我係一個 fighter。」
週一（ 3日）司馬燕大仔吳景滔照常返學，放學時向本刊表示冇聽過媽咪想搞告別派對。「咩 farewell party？唔知呀！（冇講過？）無。（媽咪𠵱家情況點？）佢𠵱家喺醫院 ok。（瘦晒？）唔係呀！佢食到嘢！（擔心媽咪？）少少啦，但係我哋全家都會支持佢。佢情況都 ok，落到床 ok！（幾時出院？）未知囉。（會延期去英國讀書？）我仲會去英國。」
Fighter語錄
抗癌最緊要係樂觀，唔好覺得世界末日，當傷風感冒咁醫，係冇事嘅！
我以前好鍾意夜瞓唔瞓覺，好鍾意飲酒，所以上天比個病你，話比你聽，好 slow down喇喎！
我好乖㗎𠵱家，已經唔飲㗎喇！𠵱家用羅漢果水代酒。
80年代靚港姐
司馬燕曾參選香港小姐而加入娛樂圈， 90年曾為成人雜誌《 Penthouse》影過性感封面，曾一度行性感路線的司馬燕搏到盡，在當年保守的年代經常晒事業線，可是星運平平。後來司馬燕嫁給荷蘭籍老公吳忠義便退出娛圈，專心相夫教子，直至 00年被纖體公司邀請才再晒美好身段。
|
鍾意就快D Share啦！
|
|
|