祖兒週日（ 2日）同母親到灣仔食飯，一聽到父親欠債即黑面拒絕回應。
《蘋果日報》圖片
封面
阿媽落閘 避見 6年 容祖兒拒孭 30萬父債
34歲容祖兒一直在單親家庭長大，由容媽余金鳳獨力撫養，兩母女感情極之深厚，即使祖兒現已貴為天后，容媽仍然經常傍實女兒出騷，貼身照顧。
相反祖兒與父親容錦輝感情疏離，加上容父唔生性，多年來冇盡過父親責任之餘，更為女兒帶來唔少麻煩。近日容父更被貼街招追債，據知此乃其 30萬賭債，現時容爸更玩失蹤人間蒸發。為免女兒再受利用影響聲譽，容媽堅拒幫前夫還債，聽晒媽媽話的祖兒亦唯有狠心唔理，等父親自己承擔後果。
父母在自己 15歲時離婚，容祖兒自此跟隨母親生活，同父親關係疏離，多年來甚少聯絡，過時過節亦不會見面。
唔會父債女還
最近容錦輝被人貼街招追債，上面寫住「尋人─此人容錦輝，乃係樂壇天后容 XX之父親！招搖撞騙，欠債唔還，見字速聯絡，否則後果自負。」街招一度出現跑馬地，擺明衝住祖兒搞事。
據知容父今次爛賭累事，欠下約 30萬，因無力償還而走佬避債主。事發後祖兒雖然冇親口回應，不過已透過經理人霍汶希暗示會與父親割席，亦唔會父債女還，「咁多年祖兒一直由媽咪獨力撫養成人，關於爸爸嘅嘢，佢作為女兒責任做盡，祖兒為咗捍衞家人，以後老竇出面發生任何事，都同祖兒冇關，佢唔會回應亦唔會負責，當下最重要只有母親，其他嘢唔理。」
母女同一陣線
2千蚊都欠
本刊發現，容父多年來亦有不少欠債紀錄，最新一次係今年 1月爭稅局 2千幾蚊！
父親連 2千蚊都還唔到，相反祖兒則生活富貴，住東半山松柏新邨、揸波子，去年收入高達 8,600萬，更手持超過 2億物業。
一向謹慎理財的祖兒，近年將血汗錢俾晒容媽，而容媽則交俾 TB密友關月茵投資。關非常擅長投資，近年幫祖兒母女的物業買賣全部有斬獲，令祖兒放心將錢交俾對方；而且有密友照顧，失婚近廿年的容媽亦唔再記掛前夫。
爛賭又貪錢
其實容錦輝早年仍有與女兒以短訊溝通，有時甚至親自煲湯拎上祖兒屋企，不過非常了解前夫爛賭貪錢性格的容媽，擔心女兒被利用，寧願做醜人隔絕兩父女來往，但有人仍不時以父女情做藉口埋身。
據知容父 5、 6年前曾相約祖兒食飯，傾唔夠兩句便向女兒借 10多萬，雖然對已屬天后級的祖兒來講只係小數目，但祖兒為免觸動母親神經，當時拒絕借錢，之後兩父女便冇再聯絡。 6年後的今天，竟發生貼街招追數一事。
容錦輝曾經做過水貨車買賣，上過深圳開色情酒吧，更娶了比祖兒年輕 4歲的內地女子，育有 1子，容父當年曾稱祖兒見過哎吔細佬，仲讚佢肥肥白白好得意。可惜容父撈極唔掂，有指最近更向人透露「𠵱家冇人冇物乜都冇」，既要走佬避債，又同嫩老婆散埋，人財兩失，真係早知今日何必當初呢？
3億樓后
油麻地上海街地鋪 市值約 2,300萬
香港仔深灣 9號高層 市值約 5,000萬
半山松柏新邨 3個單位 市值約 1.3億
大坑名門 2個單位 市值約 1億
跑馬地山村臺 市值約 1千萬
貼街招追數
陀衰家
明星表面風光容易搵錢，弊在遇着唔生性嘅屋企人，隨時要代為還錢，好多時都頂唔順要劃清界線！
|
鍾意就快D Share啦！
|
|
|