2015年2月26日 星期四

[壹週刊 - 1303] 波牛杜琪峯 愛絕版老爺車 杜琪峯,BKD_S,M1,




同你吟一吟

波牛杜琪峯 愛絕版老爺車

發哥喜歡行山,佢老友杜琪峯就鍾意球類活動,幾乎每個禮拜都落場,早排又見佢孖住馬國明、蕭正楠、廖啟智、林敏驄成班人鬥波;繼續守龍門,仲成功擋出馬國明嘅衝力射球。中場休息,杜 sir仲捉住教練練波,反而班後生個個企埋場邊抖大氣飲水。

就快 61歲,杜 sir唔單只 keep住自己副偈,連佢架勞斯萊斯老爺開篷跑車,一樣行得走得。

有日《壹》仔响中環置地對出上落客區見杜 sir同老婆戙咗喺度等車,隔無耐,司機就揸住佢架勞斯萊斯 Corniche到。呢架 1971年出廠嘅 Corniche,係勞斯萊斯第一代經典開篷跑車,到 1988年停產,全球只係出咗 3,224部, 6,750cc配 V8引擎,唔單只外形靚仔,更加係有錢都未必買得到。

其實車同人一樣,副偈唔郁好易老,杜 sir選擇做波牛,發哥去行山,朝偉愛跑步,睇嚟大家都唔懶得!

杜 sir同太太坐勞斯萊斯 Corniche出入,雖然單門設計要擒上車唔方便,但揸出街可以贏盡「收視率」,乜都抵番晒!

勤於練波嘅杜 sir,就算面對馬國明嘅衝力射球,依然有本事大腳擋出解圍。

中場休息,杜 sir爭取時間練波,仲全程笑笑口,一啲都唔攰。

大好入波機會,點知蕭正楠埋門「撻 Q」,個波踢咗出界,佢同隊友都忍唔住抱頭嗌哎呀!

鍾意就快D Share啦!
Related Posts Plugin for WordPress, Blogger...