掃呢頁CODE去手機

2015年2月26日 星期四

[壹週刊 - 1303] 妻離女散 沉淪賭海 吳啟華澳門百家樂輸清光 吳啟華,M1,




吳啟華單拖過大海,由永利賭到 MGM,輸清手上籌碼才肯離開。

娛頭

妻離女散 沉淪賭海 吳啟華澳門百家樂輸清光

上世紀的「師奶殺手」吳啟華,去年宣布與年輕二十一年的太太石洋子離婚,自此與六歲大的寶貝女熙兒長期分隔兩地。經歷兩次婚姻失敗,五十歲寡佬,吳啟華賭博過日辰。

較早前,本刊直擊吳啟華一支公過澳門,由永利賭到去 MGM,鋪鋪過千蚊上落;手風唔多順的他,輸錢後開始躁爆掟牌,賭到凌晨四點幾,輸清手上籌碼先捨得走。

吳啟華肉緊「甩牌」,懶理被身旁賭客認出。

手風唔順,連輸幾鋪後,吳啟華冇晒心機。

發𤷪𤺧用力將牌掟向賭枱。

三哥黑晒面

中年失婚,吳啟華寄情賭博,幾乎個個禮拜,都會過大海!

早前,記者發現吳啟華揸住市值三百萬的黃色法拉利從九龍塘寓所,飛車到上環信德碼頭,泊低車後,孭住背囊的他,急急腳走去過關,準備搭船過澳門。

到埗後,吳啟華先會合了苗僑偉(三哥)夫婦及兩名女性友人,一齊醫肚。飯後,一行人再往永利酒店,安頓好三嫂上房後,吳啟華與三哥便殺入賭廳,明顯非常熟悉架步的他,拉住三哥先玩花旗骰熱身,玩咗幾鋪有斬獲,便轉到最低投注八百蚊的百家樂枱,見手風順,再轉去一千蚊枱繼續玩。

賭廳遇明星,賭客不停用手機影相,三哥開始表現不耐煩,玩唔夠一粒鐘,便黑晒口面無癮離開;但吳啟華一於少理,完全冇被身旁「觀眾」影響,留低繼續搏殺。

獨賭的吳啟華,之後轉場到附近的 MGM酒店,換場再賭。在百家樂枱坐低,手持數萬元賭本的他,聚精會神望住電腦顯示屏上的「路紙」,揣摩牌路後,開始下注,每鋪上落最少一千蚊。

現場所見,吳啟華每次睇牌都非常肉緊,開始幾鋪都有贏,但玩了一陣,手風開始轉差,連輸幾鋪後,便開始𤷪𤺧用力「甩」牌,甚至激動到將啤牌掟落賭枱。最後,吳啟華將手上一戙千元籌碼輸清光。

曾經在訪問中自爆出身賭博家族的吳啟華,指祖母九十歲高齡過大海賭番攤,一口氣連過三關,結果心臟病發,在賭枱上過身,深受影響的他與哥哥吳啟明,自小便鍾意賭博。

「個女出世之後,有一段時間佢係賭少咗嘅,不過而家離咗婚,一支公住,賭癮又發作,過大海過得好密,佢多數一個人去,有時玩足兩三晚先返香港。 Lawrence唔怕俾人認得㗎,坐喺大廳都賭得好投入,佢通常換十萬八萬碼,都係輸多贏少,就算贏咗,第二日咪又去輸番。」吳啟華身邊人透露。

苗僑偉陪玩個多小時後先行離開,剩低吳啟華繼續搏殺。

將黃色法拉利泊在碼頭停車場後,便急步行去過關搭船去澳門。

去年吳啟華同老婆石洋子宣布離婚,與六歲女熙兒長期分隔兩地,最近有傳前妻已火速覓得第二春。

新年期間吳啟華跟隨曾志偉等人到溫哥華賭場做開幕嘉賓,順便度歲。

師奶殺手

83年無綫藝員班畢業,與劉嘉玲、吳君如同屆的吳啟華, 87年因為合約糾紛離開公司,轉投影圈並拍了多部三級片。 97年,吳啟華重返娘家,憑住《妙手仁心》中飾演程至美醫生爆紅,令事業攀上高峰,成功洗底成為師奶殺手。 03年,吳啟華在北京拍劇,被拍到收工後帶三名夜總會女公關返酒店,從此形象插水。近年再重返無綫,接拍《 On Call 36小時》、《再戰明天》等,令人氣回升。

程至美造型

○三年在北京被影到帶公關小姐返酒店。(《忽然 1周》圖片)

歎住紅酒打牌

翌日下午五點,吳啟華從澳門返港,疲態盡現的他,落船後到停車場攞車返歸。

在澳門賭足一晚,吳啟華意猶未盡,返家沒多久,又再出動,揸車到尖東的潮州海鮮酒家,包房飯局兼約定腳打麻雀;在澳門坐大廳肆無忌憚,但返到香港卻提高戒備,要侍應將房間的玻璃密封。打到夜晚十二點半,酒樓閂門先離開。

「 Lawrence鍾意打大陸牌,仲打得好大,一鋪二、三千蚊上落;有時仲會幾萬蚊開支紅酒,飲住紅酒,一邊打牌,好歎㗎!」知情者透露。

澳門賭到香港,連賭兩日的吳啟華,第二朝早出席完活動,與大班師奶 fans逐一合照後,馬上揸車趕返歸;隔一陣又再出發到尖東,將坐駕交代客泊車後,便急急腳會雀友。同前一晚一樣,打到十二點半,才打道回府。

吳啟華從澳門返港,賭完一晚通宵的他疲態盡現。

返歸換過件衫,吳啟華再出動,約埋雀友到尖東酒樓晚飯打牌。

吳啟華出席高爾夫球活動,離開時被師奶 fans包圍。

近年一年拍一劇的吳啟華,返內地登台是主要收入來源。

想爭撫養權

○七年,吳啟華同長春姑娘石洋子結婚,火速誕下囡囡吳熙兒,修心養性做好老公,一家三口表面上幸福滿瀉,但有指石洋子經常向身邊閨密哭訴,指老公三番四次不忠;近幾年,兩公婆已經分居,並各有各玩,去年正式離婚,結束七年夫妻情。

「洋子發現過幾次 Lawrence手機入面有啲古怪嘅微信對話,但整整吓連佢自己都出去蒲識男仔。不過 Lawrence好錫個女,亦想過要爭番個撫養權,不過個女咁細,佢都明白跟媽咪會好啲,跟佢嚟香港住,反而驚會唔適應,有時佢開工又會好唔方便,所以就算佢堅持爭,勝算都唔高。」知情者說。

妻離女散,吳啟華賭性一發不可收拾!

女兒跟隨母親長居內地,直至假期才能與吳啟華短聚。



賭性重的吳啟華也愛踩單車,新年前,他由畢架山寓所踩到茶果嶺天后廟,好腳力。

賭性難移

十賭九輸,圈中不少藝人因為爛賭,搞到身敗名裂,甚至被大耳窿搵上門追數。

馬賽

13年,被踢爆介入 TB汪子琦的攣情做小三,有條大水喉射住,馬賽每月獲發家用二十萬,並被拍到孖住汪子琦在新加坡金沙賭場豪玩十萬坡幣(約六十多萬港幣)一注的百家樂,嗌牌面不改容,賭相現晒形。

林雪

好賭的林雪,愈賭愈狠,要身邊人包括杜琪峯,也曾借錢助他填氹;可惜林雪屢勸不改,更欠下二百萬波債,因為借無可借要向財務公司借錢冚數,又不斷改電話號碼,潛行內地唔敢返香港。

阮民安

前組合 E-Kids成員阮民安,出道十三年,負面新聞一籮籮,爛賭、欠租、走數樣樣齊; 06年,因為在澳門豪賭欠下 24萬貴利數,遭大漢脅持回港。

司徒瑞祈

08年,在澳門連賭 14小時後,欠下 80萬,並遭大耳窿追數,他在尖沙咀開設的樓上咖啡室,遭人潑漆,又於將軍澳電視城外牆噴上追債字句,最後要報警。

鍾意就快D Share啦!