真人騷
撈足 15年 剝清再出發 莊思敏：有錢唔係大晒！
窮人如我，最愛掛在口唇邊：「有錢真係好！」遙不可及的富人世界裡，錢彷似利器：無堅不摧，無往不利。
然後富人如莊思敏，又是用那句反駁：「有錢生活係舒服啲，但唔係大哂，錢買唔到健康、買唔到愛情，亦買唔到事業。」
咪玩現實有賭業巨富同大肚名模做人辦，有錢明明就可以延年益壽可以分享愛人！健康同愛情？多多都買得起！
反倒是事業，至少是莊思敏想要的事業，我同意她， 15年娛樂圈生涯，家底再厚也沒有幫她爬得更高。
父親是拿督家財萬貫，家住山頂道七層複式巨宅，莊思敏的確是有錢女中的異數，勤力堅持工作態度冇得彈： 15年前約剛入行的她在沙灘拍比堅尼，已經又趴又瞓又舔雪糕，聽話聽教任人擺佈； 15年後依舊襟撈，電視電台電影行騷接 job樣樣肯做，叫人忍不住要問句：「既然不缺錢，辛辛苦苦為甚麼？」
「為咗成功感囉！」
「要成功感，點解唔學 Juno，叫屋企人出錢開套戲俾你做女主角？」
「咁就無意義如果係屋企人出錢，件事就變咗玩具唔係事業，仲點會有成功感呢？」
垂手可得的玩具，我偏不要！呢啲咪任性囉！呢啲咪「有錢就是任性」囉！
好多人唔抵得別人成功
續約蕭定一點解要拍全裸照？
想表達一個訊息，見啲報導一時話我藝人、一時話我演員，一時又話我模特兒，個身份好唔清晰，咁樣喺呢行再行落去好有困難。所以續約時我哋決定當係一次重生，好鮮明話俾大家知，我係一個演員。
仲以為你咁做即係改戲路、拍三級片添！
我並唔係要拍三級片，唔係要露三點改戲路，呢個係一個訊息，冇任何身份，唔穿金戴銀，想 focus我係演員。
形象學校及經理人公司結束後，就同電影公司簽新約，係專心發展咁解？
可以咁講，不過自己間公司結束都真係另一個故事，一來投資方覺得難做，二來的確係有分心。
開幕時一腳踢好似好勁咁，做落係咪覺得女強人唔易做？
自己開公司至知，員工幫唔幫得手係一件事，員工同員工相唔相處到又係另一件事，每間公司都有辦公室政治，我夾喺中間，呢件事最花心神。做得藝人一定有自己諗法自己目標，有時公司藝人同其他人又未必夾到……
由做經理人、調解旗下藝人嘅角色，有冇反醒下自己屬唔屬於難搞嗰種藝人？
我知我急嘅，我最怕停落嚟冇嘢做；我都知我咁多年喺呢行，每一步都係似踩鋼線咁，長期惹火長期處於高風險之中。人哋做可能冇嘢，但我一做，就易遭到抨擊。我講未必有心，但係睇嘅人會好認真，會覺得我又嚟搞事，又有目的……其實邊有諗得咁仔細？
咁下次仲敢唔敢出聲？
會少啲……要收斂下。可能要改變態度，但唔代表要收聲。作為一個藝人，講嘢冇態度又好難定位。但要喺發聲嘅同時，轉一個令人舒服啲嘅方式。我認，我係輕佻啲，但係好難取捨囉，乜都度過諗過至發表，就唔好笑唔好玩囉！其實遇上好多鍾意抱不平、以為自己知好多嘅網民，我用自己頭像、自己個名發表意見，你哋就用化名嚟抨擊我、或者講啲不負責任嘅說話，我真係好想搞一次，不如公平啲大家約出嚟見下，但又有冇人敢行出嚟呢？呢個係社會風氣，好多人變得憤世，或者有啲人會唔抵得，點解你係成功嗰個、點解你係有嘢做嗰個……
我啲鞋一定唔只一千對
杜如風話自己有一千對鞋搞都俾人鬧，其實你啲鞋應該多過佢好多！
我一定唔只一千對……屋企成層都攞嚟擺鞋，但係因為要裝修，有啲要入倉好多要攞去捐。
好多人針對你，會唔會係因為你有錢？
我諗有小小關係，仇富係其中一個問題。唔只我，仲有杜如風、 Juno，大家好容易將 focus擺咗落去你屋企背景、你消費能力有幾強，佢哋淨係見到你使咗幾多錢、但見唔到你做咗幾多嘢，做嘢時有幾勤力。
老實講，以有錢女嚟講，你好勤力。廿歲開始做 model乜都接，到𠵱家又係樣樣都做齊。
好多人都勤力，我相信。人哋可能都要製作電影、要錄音，都做緊嘢，但唔同我，電台電視都係長期定時曝光。
𠵱家仲係住緊有七層嘅獨立屋？
屋企裝修緊，我同其中一個妹一齊租貝沙灣。以前住喺屋企，真係幫我慳番好大筆，除此以外，我使費咁多年由出嚟做嘢後都係靠自己，仲有投資股票同基金。
生意結束蝕咗二百幾萬，對你嚟講算唔算大數目？
梗係算啦，我都赤㗎，但係做任何生意都要有風險估計，明知唔係一定賺，我做之前會肯定自己可以承受幾多。點解我選擇做藝人之餘再做其他投資，就係因為萬一有咩事，我都仲可以保得住另一邊收入。
一般人最鍾意講喺口唇邊，係有錢就乜都得。你錢就有喇，對你嚟講咩最難得到？
健康囉，有錢唔代表有健康。係，有錢會令生活舒服啲，但唔代表有錢就大晒。仲有愛情，仲有事業。
做呢行，有錢女嘅身份幫唔幫到你？
絕對幫唔到，錢買唔到事業，乜嘢都要講工作態度。
點解你唔學 Juno，搵屋企人幫你開套戲？
咁就冇意義啦，如果叫屋企人開套戲俾我做女主角，呢件事變咗玩具唔係事業。我可以幫我買廣告牌，但嗰啲咪就係玩具囉！ Juno再有錢，佢套戲成功，票房唔會係佢自己買返嚟。
咁辛苦做呢行，由 model仔捱起，你求乜嘢？
成功感囉！
有冇得到過？
我就簡單啲，娛樂圈競爭咁大，每年都淘汰咁多人，某程度上我仲喺度，已經覺得有成功感。點解個客搵你、點解呢個工作仲係屬於你，即係我得到人嘅認同囉。
同富二代溝通唔到
好多人都話，娛樂圈一啲都唔複雜，又話大台係大家庭，你咁惹是非，又同胡定欣開過拖各執一辭，我諗你唔會話呢行冇壞人、冇假人啩！
邊個行業都有壞人。做 office都有雙面人，娛樂圈年中見太多人，大多數都係一面之緣，好多時印象都係靠人講，有時人哋講未必係真，我發覺唔好聽，要靠自己去睇。有時人哋口中嘅衰人，相處落未必係咁衰，相反，我試過遇過啲女藝人，表面形象好好，原來佢係會篤背脊、搞咁多嘢都係想套料，我唔會揭穿佢，呢個世界好細，咪同佢鬥假囉。
你同吳浩康分手三年幾，當中傳過幾段緋聞，有冇真？
全部係傳，我呢三年都係單身。我忙，同埋又懶咗，再冇耐性去打扮去識朋友。
會唔會覺得愛情都係門當戶對易行啲？
都係溝通重要啲……我識好多富二代，但唔代表溝通到。好多富二代喺溫室長大、冇責任心，有咩事打個電話就有人幫佢搞掂、覺得可以每日兩點返到公司就係勤力，佢哋係幸福係無煩惱，但坐埋一齊我抒發下，佢哋根本唔明！你以為大家背景似、追求相同，但其實坐埋一齊食餐飯，嗰餐飯根本傾唔到偈。
所以你咪夾咗喺有錢人同窮人之間，好難搵對象？
我哋真係好尷尬，有啲朋友去玩 speed dating我哋又唔去得，有時朋友介紹上門，原來嗰個人唔係鍾意你，純粹好奇娛樂圈生活。
咁整容嚟講，胸大咗三年，慣唔慣？
慣！冇得唔慣，自己揀㗎嘛，有時最𤷪係啲人因為我加工而針對我，你哋針對我假嘅同時，係唔係保證到其他人係真嘅先？俾嗰啲有整但唔認嘅人呃，針對我呢個坦白嘅人，你會唔會太天真呢？好奇怪，好多人寧願接受假嘢，但唔鍾意聽到真相。
會唔會再整？
到老嘅時候可能會，但整到上癮一定唔會。愛靚之心總有，照鏡嘅時候都覺得有啲嘢可以再好啲，有時見到朋友做完效果唔錯都會好奇，但一定要制止自己。人哋 work唔代表我 work，好多例子話俾我聽，再整只會越整越差。我認同呢個世界冇完美，黃金比例嗰啲會撞面、完美到根本唔係一個人。要換咗個鼻又要削骨，咁自己去咗邊？不如去換身份證改過個名，重新做人罷
做咁多年戲，但係角色雷同，都係又強又惡又有錢，點解呢？
我唔會失望，每個機會都係一個機會。我生得高大，個樣又寸，人哋搵我做同樣嘅嘢都冇辦法，慢慢改變啦，不過身高就難啲改。
又係喎，印象中好似未見過有咁高大嘅弱者？
係喇……我成日話想演智障人仕，但有個導演都係咁話，邊有智障咁高㗎……唉，智障唔同發育不健全㗎。
高度限制戲路係其中一個有錢都改變唔到嘅事實？
都係，但係都有嘢係我做得到嘅，你叫我增肥二百磅我一定肯，但個前提係，先要有一個願意俾機會我嘅導演。我相信有呢個機會，我會抱住呢個希望。
咁整容嚟講，胸大咗三年，慣唔慣？
慣！冇得唔慣，自己揀㗎嘛，有時最𤷪係啲人因為我加工而針對我，你哋針對我假嘅同時，係唔係保證到其他人係真嘅先？俾嗰啲有整但唔認嘅人呃，針對我呢個坦白嘅人，你會唔會太天真呢？好奇怪，好多人寧願接受假嘢，但唔鍾意聽到真相。
會唔會再整？
到老嘅時候可能會，但整到上癮一定唔會。愛靚之心總有，照鏡嘅時候都覺得有啲嘢可以再好啲，有時見到朋友做完效果唔錯都會好奇，但一定要制止自己。人哋 work唔代表我 work，好多例子話俾我聽，再整只會越整越差。我認同呢個世界冇完美，黃金比例嗰啲會撞面、完美到根本唔係一個人。要換咗個鼻又要削骨，咁自己去咗邊？不如去換身份證改過個名，重新做人罷
做咁多年戲，但係角色雷同，都係又強又惡又有錢，點解呢？
我唔會失望，每個機會都係一個機會。我生得高大，個樣又寸，人哋搵我做同樣嘅嘢都冇辦法，慢慢改變啦，不過身高就難啲改。
又係喎，印象中好似未見過有咁高大嘅弱者？
係喇……我成日話想演智障人仕，但有個導演都係咁話，邊有智障咁高㗎……唉，智障唔同發育不健全㗎。
|
鍾意就快D Share啦！
|
|
|