[FACE - 404] 危險人物 娛記搭路拍 cheap片 冇人敢簽齊昕怕算帳 齊昕,梁齊昕,MF,

新戲（ 10日）記招就話病甩底，翌日野生齊昕生猛現身中環，全冇病樣之餘，一見記者包圍即心花怒放，幾次行甩鞋都仲識笑。

真面目

危險人物　娛記搭路拍 cheap片　冇人敢簽齊昕怕算帳

係就係外型爭啲、身材弱啲、行為飄忽啲、談吐嚇人啲、觀眾緣又直情無，不過齊昕有樣嘢好，談論度全港領先，換言之無論拍乜都一定多人講先所以佢一話想入行，真係有人出埋錢寫埋劇本，度身訂造捧佢做女主角，第二個恨都恨唔嚟！

雖然新戲記招話病甩底、翌日喪住蒲頭自打嘴巴，不過你同我定，處女作六位數字訂金一早落袋，齊昕唔只下定決心要拍戲，仲周圍𢱑撈想簽長約。可惜全行大娛樂家都怕咗齊昕父親呢，惟有做住散工先囉！

大家唔係齊昕嘅母親，不過見親梁小姐齊昕新動向，都係忍唔住倒抽一口涼氣。點先？又話想入行、又話發明星夢，上週二(10日)真係有人開戲俾你做女主角開記招喇，又放飛機？聽講套原名叫《男極探射燈》嘅新片，記招臨開之際，導演劉俊輝都仲可以打到俾齊昕，有人依然拍哂心口話嚟緊：「十分鐘就到！」結果散場都係冇蒲頭，唔只個樣，特首女連誠信都深得父親真傳！

十幾度氣溫，詐病齊昕除剩背心，入名店 Jimmy Choo睇鞋又睇袋，不過得個睇字。

沿途齊昕邊行邊與超過十男記者搭訕說笑：「今日交晒戲俾你哋影好啲，我都唔鍾意做明星！」仲問人係咪真人靚過上鏡？點答你好呀！

行完半日街，齊昕由中環步行上山返禮賓府：「我唔叫司機就會行後門，俾你哋知我秘密通道添！」

父女累鬥累

齊昕恨入行唔係得把口！識用社交網絡製造話題自我宣傳、識得寄自薦信去各大模特兒公司，去年尾還開始接受傳媒訪問，增加曝光之餘亦趁機拓展社交圈接通娛樂天地線。

自從個人專訪推出後，齊昕與負責該專訪的娛樂記者火速混熟，還托該記者搭路週圍𢱑撈搵經理人簽約。可惜個個都怕咗一男子秋後算賬，唔係婉拒就一味拖字訣。好彩齊昕為求有嘢拍，逢飯局必到、樣樣都話好，無懼導演劉俊輝當年專拍三級片、代表作係《根太軟》，一聽有得做女主角，即刻𦧲飯應，簽埋片約袋埋六位數字訂金。

難怪梁小姐記招放飛機，導演都係咁老定：「佢開鏡先話唔嚟？我唔擔心！好濕碎啫，如果佢唔做咪拍少部戲，佢做咪拍多部戲囉！」就算撻訂都係六位數字啫，齊昕的父母親實俾得起！

記招甩底

除咗李逸朗（左三）自稱睇過劇本，其他演員包括朱慧敏男友 Eddie（右三）、樓南光（左）及無暇出席的曹查理都話臨時拉伕應召到場。

電視訪問

去年尾開始，齊昕突然大量接受本地各媒體訪問，據悉她因此與娛記混熟，搭路𢱑戲拍和物色經理人簽約。

電視畫面

收咗六位數字訂做女主角後，齊昕反而在社交網絡變低調，上一個 post只得一句：「 Be Yourself！」真係好自我。

講一套做一套嘅齊昕話就話覺得爸爸叻，實情樣樣對着幹。

網上圖片

冇人肯冒險

進擊的齊昕搵娛記搭路，近月勤約圈中人見面𢱑簽長約，不過據悉包括以下公關名人及高層，冇人肯覆實囉！

公關公司 IPS老闆 Peter Wong

天機公關 CEO鄭紹康

now高層何麗全

Neway老闆娘諸葛紫岐

嬲爆行後門

上月尾（ 1月 22日），齊昕出席上海灘時裝活動，表面上就打扮得花枝招展極盡風騷，背後卻呻話冇得行紅地氈、又要用幾萬蚊真金白銀買品牌服裝，待遇不如其他星，谷住條氣喎！小道消息，品牌冇當齊昕係星、自然唔肯贊助服裝，再加埋同場有個周汶錡，據聞有人向品牌詐形唔肯同齊昕睇齊，卒之咪搞到齊昕要鬼祟行後門囉！兩父女去到邊都俾人嫌，怪邊個好呢？

齊昕自費數萬元買行頭、仲要屈就行後門嘅上海灘活動，當晚同場還有名模周汶錡。

鍾意就快D Share啦！

下一篇 》