2015年3月4日 星期三

背守貞鍾舒漫狂出軌 吳浩康雜食:搞大肚就落咗佢 [FACE - 406] 浩康,鍾舒漫,吳浩康,MF,




男友出軌後首次露面的鍾舒漫,表示已經原諒男友,但又話需要緩衝期分開冷靜下。咁鬼矛盾,睇嚟佢自己都好亂。

封面

背守貞鍾舒漫狂出軌 吳浩康雜食:搞大肚就落咗佢

31歲吳浩康個底花到冇人有, 03年試過因藏毒被判罰款 5千,雖然唔使坐監,不過事業自此一沉不起,生活頹廢,直至跟同門師妹鍾舒漫拍拖後,才積極重新做人,努力作歌接戲,又開班教泰拳。

可惜吳浩康死性不改,年廿九被爆偷食 34E乳模 Yvette Chow,兩人當街攬啜 15秒,偷食偷到明目張膽。據知 Deep唔只一次背住教徒女友同其他女仔行埋,生性風流的他行事亦極為「唔安全」,有傳他曾向朋友炫耀戰績,講明「出事」亦不會負責,賤男豪言︰「搞大肚就落咗佢!」








吳浩康同鍾舒漫拍拖近 3年,兩人感情穩定,早前傳出已經訂婚,以為好事近,可惜忽然爆出吳浩康偷食,令全世界包括鍾舒漫自己都跌晒眼鏡。

唔知男友偷食的 Sherman,睇到雜誌先知出事,急急喺微博盲撐男友,但表明短期內唔會結婚。

網上圖片

偷食斷正,吳浩康亦知衰,喺 instagram認錯,承認自己「表現非常不恰當」。

傳 13年有暗病

年廿九當晚,吳浩康背住未婚妻鍾舒漫,約 34E乳模 Yvette Chow食飯唱 K,更被影到街頭拖手及濕吻 15秒。事後吳浩康雖然在微博公開認錯,但額頭已經鑿上「賤男」二字!

前一晚與鍾舒漫 sweet睇戲,第二日即偷嗒大胸女,睇得出吳浩康有幾「餓」。唔只偷食唔抹嘴,原來吳浩康份人極之不負責任,幾年前被好兄弟發現偷食,兄弟好言相勸唔好害人,點知賤男一句劈埋去:「搞大肚就落咗佢!」確保自己唔會有手尾跟。

不過呢個世界真係有報應, 13年傳出賤男因太風流而得暗病而頻睇醫生,當時本刊收到風,亦搵過在 12年與 Deep拍拖的前度唐紫睿,當時 Hazel表現得很保護 Deep,例牌否認。

大胸偷食女

出事潛水

34E大胸模 Yvette,影過唔少性感相,出事後即將 ig設為 private,避免被起底。

前度 Hazel

吳浩康曾經同奀模 Hazel(唐紫睿)拍拖,更被影到當眾撩對方裙底。

Hazel最近有

份參演《鴨王》。

嬌滴 陳霽平

早於 1月, Deep已被發現同兩女夜蒲蘭桂坊,三人一齊於街頭 high爆截的士。

同於今年 1月, Deep又係背住女友同舊愛 Olivia(右)及港視小花謝珊珊(左)夜蒲。

《蘋果日報》圖片

冧女得把口

網上圖片

吳浩康冇錢冇事業,更加冇車冇樓,要冧女唯有靠把口。吳浩康耐唔耐就會上 instagram寫嘢冧女友,不過講到幾 sweet都冇用啦,咪又係背住正印搞搞震!

講一套做一套

溝女戰績彪炳的吳浩康,出道多年食過無數女,除了數之不盡的𡃁模外,最經典一定係大台姐仔胡定欣,同埋孿都俾佢拗番直的拿督有錢女莊思敏。

自從 13年同鍾舒漫拍拖,吳浩康表面上收心養性唔蒲唔滾,更一度跟隨女友返天后播道會同福堂教會,試過搵何志滌牧師接受婚前輔導,似一心視鍾舒漫為結婚對象,但其實「大食康」一直對堅拒婚前性行為的教徒女友有所埋怨。洗底期間,撈極唔起的吳浩康又積極儲老婆本,拍戲組 band之餘,又開班教唱歌;而且 Deep好識做,過時過節會同女友父母見面,甚至親自下廚冧未來外父外母,令鍾舒漫相信男友已經改過。點知拍拖唔夠 3年已經出事,而且個男友仲人前人後兩個樣,多年來 keep住覓食。

'13首公開

'13年開始拍拖後, Sherman每次都對男友讚不絕口,主動表示想同佢結婚。

'14 最後露面

兩人去年孖住出席 Yumiko婚宴,之後再冇以情侶檔公開現身。

《蘋果日報》圖片

吳浩康曾經同莊思敏拍拖,但分手時搞到極不愉快,女方曾暗示男友有壞習慣,同埋爭佢錢唔還。

網上圖片

Hazel 12年同 Deep拍過幾個月散拖。

「 Keep住互相關心」

近年多數做大茄的 Deep,最近終於可以孖住同門師弟妹一齊擔正新戲《三條友飲醉酒》。

未婚夫偷食通晒天,乜面都冇晒的鍾舒漫,週一( 2日)同師姐阿嬌出席活動時仍然強顏歡笑,接受訪問時竟然話已經原諒賤男,「唔好單憑一個人一件事一個故事去睇,外面人唔係知晒全部。佢(吳浩康)有 say sorry,我同佢有溝通,佢知唔恰當,我哋已經處理緊!」

口口聲聲話處理緊,但 Sherman言談間似乎未肯真正放低男友偷食一事,要過冷河互相冷靜,婚事亦暫時擱置,「大家都需要緩衝期休息,但呢段時間會 keep住聯絡同互相關心。」結婚一生人一次咁大件事,真係要諗清諗楚先好決定嫁唔嫁呀!

梗有一個賤男喺左近

吳浩康偷食唔抹嘴,新一代賤男非佢莫屬。之不過其實娛樂圈大把賤精先生,當年陶大宇已婚都去偷嗒郭羨妮,彭順同周永恒又係背妻搵小三,仲有倪震經典孔雀開屏!好在鍾舒漫未嫁,都仲有得揀!

彭順•李心潔• Liddy

瞞住長居大馬的老婆李心潔,包養𡃁模 Liddy(李悅彤),兩人到圓方睇戲啜嘴斷正,更一齊返回將軍澳愛巢。

網上圖片

《蘋果日報》圖片

周永恒•趙頌茹• Ruby

與阿 Yu結婚 5年有兩個女依然唔定性,偷食港視小花 Ruby(劉依靜),仲向阿 Yu施家暴被控普通襲擊罪,判監 2個月,緩刑 18個月。

圖片

網上圖片

陶大宇•黃慧寶•郭羡妮

07年拍《學警出更 2》同郭羨妮撻着,與陶大宇結婚 7年的黃慧寶直指「狐妮」係第三者,索性離婚冇眼睇。

《忽然 1周》圖片

倪震•周慧敏•張茆

08年偷食大學生張茆,事發後宣布同女友周慧敏分手,但事隔幾日又突然公布要結婚,非常戲劇性!

網上圖片

鍾意就快D Share啦!
Related Posts Plugin for WordPress, Blogger...