劉浩龍本身易肥，要短時間內增磅唔算難，不過要操肌，對佢嚟講就有難度，好彩最終都操到些少線條。
真面目
大胸肌 何超揼錢 order增肥 劉浩龍加大碼：操大對波！
做人如果冇夢想，咁同條鹹魚有咩分別？正如何超儀為咗圓夢，揼本開拍兼主演羽毛球為題材的新戲《全力扣殺》，查實唔少片商聽到題材時當場就打退堂鼓，好彩皇天不負有心人，新戲四月就會上演！
面對嘔心瀝血之作，超儀做足功課，除自己要扮邋遢肥妹外，其他角色都好有睇頭，好似劉浩龍就特登為角色而增磅加操，大騷肥厚胸肌同一對麒麟臂。
何超儀憑住《維多利亞壹號》奪得西班牙影后，去年再憑劇集《再戰明天》奪得大台最佳女配角，演技受到肯定。至於新戲《全力扣殺》，何超儀唔只玩騎呢造型，拍埋鄭伊健、鄭中基、梁漢文和劉浩龍等喜劇演員，仲玩埋懷舊喜劇 feel添！
勁食 pizza增磅
自知運動題材的電影唔易拍，更何況仲要加埋勵志喜劇元素，新戲《全力扣殺》角色造型勝在騎呢，飾演退役羽毛球手的何超儀，遇見鄭伊健飾演改邪歸正的劫匪，重拾對羽毛球熱誠。
作為女主角，何超儀造型都有好大犧牲，又塞綿花又化妝扮污糟邋遢肥妹；飾演鄭伊健左右手的劉浩龍，造型老土外，身形亦係亮點，事關師兄事前專登增磅操肌，他說︰「郭子健搵我嗰陣，一嚟就叫我操大對波、練粗對手，又要我剪短頭髮同曬黑，最慘我當時啱啱減完肥，點樣操大？不斷舉啞鈴，勁食 pizza同漢堡包囉。」
超儀企硬開拍
再次投資電影，超儀都非常緊張，新戲更率先在本週五（ 6日）在日本舉行的「大阪亞洲電影節」作世界首映，超儀更提名最佳女主角，與蔡卓妍的《雛妓》等對撼。超儀說：「拍完呢套戲當圓咗自己一個夢想！回想開拍初期，周圍搵片商注資，個個聽到羽毛球題材嘅電影都縮沙，不過人哋愈係覺得冇可能嘅事，我就愈要去做，證明係可行嘅！」
超儀 10年前攞過香港羽毛球冠軍，之後被罰停賽搞到意志消沉，成日匿喺哥哥謝君豪嘅火鍋店，變到又肥又污糟，連阿哥都忍唔住要成杯茶照頭淋醒佢！
乜戲都接
近年師兄參與唔少電影，《竊聽風雲 3》和《 12金鴨》都開始加重戲份，剛剛簽約太陽娛樂已經接咗兩套新戲， Paco仲話要捧到佢上紅館添，係唔係真㗎？
|
鍾意就快D Share啦！
|
|
|
