2015年3月4日 星期三

《衝上雲霄》真係咁差? 即場街坊民調誠實 [FACE - 406] MF,




你有你鬧,但《衝上雲霄》一樣收過 2千萬,贏咗《賭城》發哥同《金鴨》君如,加埋大台𠵱家重播緊第一輯,票房有望再高收。

全知言

《衝上雲霄》真係咁差? 即場街坊民調誠實

今年賀歲片特別多卡士亦唔弱,自從高登瓊姐喺 facebook寫咗一篇關於《衝上雲霄》千字影評喪插後,再同導演鄒凱光罵戰,呢下曲綫宣傳即令《衝》片贏晒其他港產賀歲對手。雖然鄒導話唔覺得爛,不過觀眾感覺最老實,全知言當然落街即問觀眾反應,都唔算太負評,起碼冇瓊姐大叫「回水」咁差喎,灘叔呢次執身彩喇!

少爛

馮生 2x歲

我覺得都 ok啦,少少爛我會畀 60分,鄭秀文有 50分,啲對白我都覺有少少老土,同埋同電視劇冇咩關係,但都冇跌錢感覺。

半蝕 蔡小姐 33歲

我會畀 60分,故事同電視完全冇關係,但又唔覺對白好老土,有一半蝕錢感覺。

睇 Sammi

馮生 2x歲

唔係好爛啫,我唔會用爛去形容,我畀 75分佢,我為咗 Sammi入場,套戲同電視劇冇咩關係但都 ok!戲入面三段情我覺得佘詩曼、古天樂最好睇。

85分

Annie

我覺得唔係爛嘅,睇之前都有朋友咁講,話好似睇 MV啦,但我又唔覺囉,戲係講番佢哋以前經歷嘅嘢,最感人其實係 Cool魔嗰幕,我會畀 85分呢套戲,我唔會覺得蝕錢。

古仔悶

Clarence 13歲

我覺得爛呀!啲人物係夾硬塞落去, 100分嚟講我畀 42分。好嘅地方係用番第一集主題曲,冇用第二輯嗰首,同埋多咗古天樂但就好悶。

Cool魔好

黃生 46歲

我買飛睇,我覺得唔爛, ok喎!覺得 Cool魔嗰幕幾好睇,唔覺得似 MV喎,我覺得都有 80分!

明星撐自己友

高登瓊姐甚少寫影評,竟然出千字文喪插《衝上雲霄》,不過反而令更多人想入場喎,唔通瓊姐曲線幫手宣傳?

新年基本上班星全部出埠避年,想睇賀歲片都難,不過唔少星都話點都會支持下《衝上雲霄》喎,咁又係,唔通連自己人都唔撐咩。

陳嘉桓:好鍾意 Sam哥!

今年我只係睇咗《衝上雲霄》,其他好多 full場所以未睇到。我自己好鍾意 Sam哥呢個角色,電影有 Sam哥加 Sammi我覺得唔錯,我係因為有佢哋先入戲院睇。

幾享受 森美

今年去咗外地避年,一套賀歲片都未睇,我冇聽過話唔好睇,我啲朋友睇過都幾享受,如果有人話唔好反而想睇下,咁多靚仔靚女睇佢哋都抵番啦。

情意結 陳志雲

賀歲片我一定會睇《衝上雲霄》,因為有情意結,睇咗兩部電視劇,𠵱家上大銀幕都想睇下佢哋會唔會有皺紋呢,亦都要支持下以前啲同事啦。

知無不言 言無不盡 我係全知言

即時報料

facepop熱線 9222 0828

電郵facenews@nextmedia.com

facebook: facemagazine inbox

LINE、 we chat id: facemagazine

鍾意就快D Share啦!
Related Posts Plugin for WordPress, Blogger...