熱爆娛樂: 偷會港隊單車手　魏駿傑與內地嫩妻釀離婚 [忽然1周

2015年5月22日星期五

偷會港隊單車手　魏駿傑與內地嫩妻釀離婚 [忽然1周 - 1034] 魏駿傑,MW,

打頭陣

偷會港隊單車手　魏駿傑與內地嫩妻釀離婚

男人最忌老婆紅杏出牆，魏駿傑的重慶嫩妻張利華，月初被拍得 5日內兩度夜會前港隊單車名將鄧宏業，二人更摸黑攬腰散步。據知大男人魏駿傑嬲到震,當時身在內地拍劇的他隔空與老婆吵大鑊釀離婚。

二人結婚七載，魏太心癢並非一朝一夕。近年一直在內地搵銀的魏駿傑，留低嫩妻居港湊女，獨守空房寂寞難耐。本刊收到消息，近年打扮花枝招展的張利華，經常撇低 5歲囡囡給工人湊，外出踩單車結識不少運動猛將，早出晚歸冇王管。

周三（ 20日），本刊獨家拍到魏駿傑獨自湊女到西貢睇醫生，人妻兼人母張利華影都唔見。魏駿傑坦承婚姻亮紅燈，但他仍有挽救之心：「未去到（離婚）呢個階段，但嗌交實有！」

其他影片：>>魏駿傑夫婦街頭開拖

07年 5月魏駿傑突然宣布與拍拖 9年、一度談婚論嫁的滕麗名分手。有傳是因為年僅 19歲仍是重慶郵電大學體育學院女學生張利華的介入，但男方矢口否認。不過 08年 1月，魏駿傑與張利華在重慶秘密閃婚，分手真相水落石出。有指張利華嗲功一流，魏駿傑與她撻着不久，即給她供書教學，結婚初期還在重慶一同租屋住，至 10年囡囡出世後，張利華成功攞單程證來港居住。

去年感情生變

家有嫩妻，囡囡 Jessica今年已 5歲，魏駿傑不時在微博上載一家三口遊埠照，本來相當幸福。惟自 13年中開始，魏只上載工作照及父女相，老婆再沒有出現。本刊收到消息，現年 47歲魏駿傑與 27歲張利華的感情去年已大不如前。本月初魏太更被拍得 5日內兩度偷會前港隊單車名將、有「黄金寶接班人」之稱的鄧宏業，二人撐枱腳兼摸黑散步，男方更為女方拎手袋，又攬晒腰。

魏駿傑的嫩妻張利華月初被拍得與前港隊單車手鄧宏業兩度夜會。事後男方曾解釋：「我係佢私人教練，大家係好朋友。」他還透露有個拍拖數月的女友 Yannes，亦已跟女方解釋清楚。

西貢街頭互片

當時魏駿傑怒不可遏，身在內地開工的他更打長途電話向張利華大興問罪。二人隔空對質，魏一時火遮眼嚷着要離婚，二人冷戰至今已兩星期。早前本刊記者亦拍到魏駿傑與張利華街頭互罵十分鐘，雖然有一女友在場，但二人愈鬧愈火，最後不歡而散。

而在本周三（ 20日）上午 11時半，本刊記者又拍得魏駿傑偕外傭離開早禾坑村屋寓所，湊囡囡到西貢市睇醫生， 5歲的 Jessica在醫務所內勁黐爸爸，對爸爸不時又攬又錫。魏駿傑亦慈父上身，多次為囡囡抹鼻涕，媽咪張利華則冇影。

夫婦面左左

日前本刊獨家拍到魏駿傑做司機到西貢接踩完單車的老婆，但二人卻向左走向右走，張利華全程玩電話冇理老公。

街頭駁火

未幾二人企在街上突然傾到動晒氣，魏駿傑更對住老婆手指指。

手指指還擊

當時張利華有一女友人在旁傍實，她亦反篤老公心口，更嘮嘈口擘擘，魏駿傑被激到叉晒腰。

當日魏駿傑原本專程買定餸到西貢接老婆，但互罵之後張利華嬲到掉頭走，魏則燶口燶面戙高腳在車尾箱綁鞋帶。

想阿女在好環境長大

魏駿傑帶囡囡睇完醫生在停車埸接受本刊記者訪問。對於曾醞釀離婚，他暗示為女兒會盡量挽救。

記：係咪因為老婆偷會鄧宏業呢件事，同老婆嘈過，我哋見到你哋喺西貢指手畫腳鬧交咁？

魏：唔記得喎……嗌交就梗有啦，我哋成日講嘢都指手畫腳，兩個脾氣都比較火爆。我好啲，年紀大，會㩒住。你知四川人（指老婆），重慶特色係比較躁啲！

記：咁你點睇太太俾男人攬晒腰？

魏：又唔係話攬咩！如果有不軌行為都影到

記：係咪有同老婆提過離婚?

魏：未去到（離婚）呢個階段。個女咁細，我依家只為個女諗，個女好生性，好跟我，我希望俾個好嘅環境佢長大。

記：點解佢會識到鄧宏業？

魏：我老婆係好熱衷運動，仲勁過我，我陪唔到佢踩單車，畢竟都 48歲，追唔到呀！佢依家嗰啲朋友都係鍾意踩單車嘅。

記：老婆靚咗咁多，怕唔怕狂蜂浪蝶？

魏：狂蜂浪蝶一定有，佢咁後生，又識打扮，冇計㗎男人好矛盾，娶個老婆，又唔會想個老婆冇狂蜂浪蝶，咁即係……（偷笑）你明唔明呀？佢後生我廿年，接受啦。老夫少妻，自己識分寸咪得囉！我成日解釋佢聽，你雖然唔係呢行，但你嫁咗俾藝人就係知名人士，出去做每樣嘢都要注意啲，唔好俾人有話柄。

記：咁你自己又有冇引誘？

魏：吓！引誘好多㗎！不斷有㗎！但係知自己有家庭，有個女，佢哋埋唔到身嘅！傾吓偈囉！異性朋友傾心事係有嘅！但好安全，好乾淨嘅。唔涉及桃色。

記：點解個女病，太太都唔幫手？

盡責父親

周三（ 20日）上午，魏駿傑偕外傭帶女兒到西貢睇醫生，其間他細心幫囡囡戴上口罩。

老婆冇影

魏駿傑堅稱同老婆分工合作，他負責搵錢，對方則照顧女兒。但當日張利華全日唔見人，帶女兒睇醫生的重任都係落在魏駿傑身上。

買瘦肉煲粥

返屋企休息

魏：佢今日有啲嘢做，唔得閒。今日我唔使開工，過幾日先返大陸，我好鍾意湊女，關於個女嘅嘢我會爭住做。

鄰居爆老婆唔黐家

其實這天本刊記者早上七時半已在魏駿傑西貢寓所外等候他們兩夫婦，但一直未見張利華外出，究竟是她晨早離開家門，還是前一晚未有返家，真是不得而知。

據二人的西貢鄰居透露，近期張利華的確早出晚歸，甚少湊女：「以前每逢傑仔返咗大陸，佢老婆就揸佢架車日日湊女返學同放學。但舊年開始囡囡大部分時間交咗俾工人湊，個女人就去街去密咗，仲扮得好靚。傑仔舊年開始多咗留喺香港，佢話想多啲時間照顧個女，有啲 job唔係咁啱就唔接。」

結婚容易維繫難，為咗 5歲囡囡，睇嚟魏駿傑都要諗吓點樣修補與嫩妻的關係。