滾熱辣
Eddie媽上門代箍煲 朱慧敏爆喊拒讓步
朱慧敏和前 EO2成員彭懷安（ Eddie）拍拖三年，即使男方多次被拍到夜蒲溝女，朱慧敏依然對男友投信任一票。年初她更宣布明年二月下嫁 Eddie，可惜食開有癮的 Eddie，日前再被爆偷嗒「長腿 G.E.M.」陳惠敏。
報道一出，難再姑息未婚夫的朱慧敏，即日便致電取消酒席、婚紗、化妝和場地布置，更 book定 6月初的機票，隻身赴美國三個月「過冷河」。
朱慧敏氣難下，更拒見 Eddie。據知 Eddie母親日前上門代仔求情，其間朱慧敏雖然即場爆喊，但最後堅拒讓步，更講明婚期無了期押後，三年情凍過水。
經歷多次感情跌宕的朱慧敏，年初宣布下嫁拍拖三年的 Eddie。她更索性入股未婚夫的華星冰室，夫唱婦隨日日打躉茶餐廳做生招牌。
雙方婚期已定，但爛蒲的 Eddie早前撇低未婚妻，拖實短裙嘅「長腿 G.E.M.」，大街大巷摸面珠不特止，還載女返香閨。上周五（ 15日）晚，含住一泡眼淚開工的朱慧敏，終於忍無可忍插爆負心男：「同類事件並非第一次……喺我立場嚟講，我係想延遲婚期。」
即日取消酒席
朱慧敏話做就做，據知在當日早上未婚夫偷食報道一出時，她已第一時間致電取消酒席。知情人透露：「 Eddie同 Queenie（朱慧敏）原定 book咗大埔科學園 Club One五十圍酒席，亦都搵定婚紗公司同場地布置公司。不過單新聞一出， Queenie決定婚期押後，仲話明有可能取消，唔想 hold人個期，阻住人哋做生意，所以先打電話 cancell晒啲 booking。」
撻訂蝕十萬
朱慧敏和 Eddie原定於下年 2月初拉埋天窗，二人早於今年 3月已 book定在大埔科學園 Club One擺酒，貪其地方大，可以筵開 50圍酒席。
以綠色環保概念布置宴會廳的 Club One每圍酒席約$13,000。據知朱慧敏和 Eddie最初揀選這個地方，是遷就住在大埔的男家親人，同時由於 Eddie在圈中有不少好友，因此需要較大的場地宴請賓客。可惜偷食事件曝光，準新娘取消婚宴， Eddie早前所付的十萬訂金亦無法取回。然而錢銀事小，老婆事大，未知 Eddie今次有冇本事再𠱁掂未婚妻。
遇人不淑
現年 34歲的朱慧敏， 04年港姐亞軍出身，多年來屢遇花弗男。佢雖然有樣有身材有學歷，但選身邊男伴時，眼光卻麻麻。
梁榮忠「車震」
05年，梁榮忠背住拍拖 8年女友鍾麗淇，與朱慧敏在車上激吻。事後，朱慧敏除了慘遭無綫雪藏外，更被冠以「第三者」的惡名，朱慧敏曾呼寃表示不知男方有女友。
Rick Chang悔婚
09年，朱慧敏與在台灣做 IT生意的富豪男友 Rick Chang拍拖，其間更坦言隨時嫁得。豈料 Rick被傳媒踢爆在台灣攬咀辣妹，最終 Rick悔婚，兩人分手收場。
Eddie媽恨抱孫
偷食事件曝光後， Eddie多次致電朱慧敏求饒，更試過上女方位於清水灣半島的寓所，但每次均食閉門羮。最後就連 Eddie年邁母親，日前亦上門代仔求情。知情人說：「 Eddie阿媽年紀唔細，成日催佢哋結婚，希望可以快啲抱孫，加上男家嗰邊已經通知晒啲親朋戚友，如果取消婚禮，男家嗰邊會好冇面。所以今次明知阿仔幫唔落，但老人家見兩個後生今次鬧得咁僵，都忍唔住插手，上門勸 Queenie大事化小。老人家仲同 Queenie講，話 Queenie啲屋企人唔喺香港，冇人照顧佢，如果同 Eddie結咗婚，大家就係一家人。」
「未來奶奶」代仔求情，已連續多晚失眠的朱慧敏，當日情緒一度崩潰，喺老人家面前爆喊，但最終表明自己需要時間冷靜，着老人家先回家。
美國搵表妹
Eddie之前兩次攬女，朱慧敏都耳仔軟原諒對方。但揚言「戀愛不等同結婚」的她，今次為免嫁錯郎，做錯決定，日前已 book定機票，六月初隻身赴美國西雅圖，搵住在當地的表妹傾訴心事。其後再會到英國，搵已移民當地的中學恩師一家敍舊並順道散心，前後出走三個月。
男方懶理婚事
冰封三尺非一日寒，朱慧敏今次企硬，並非單純因男方偷食，反而是雙方在籌備婚禮期間，男方一副「你緊我唔緊」態度。知情人續說：「 Queenie最嬲係 Eddie唔嗲唔吊性格，永遠冇主見，樣樣都要女方揸主意。 Queenie半年前叫佢要決定個 sitting plan，到今時今日都仲未有， Eddie成日話使乜咁急。為咗呢啲事，佢哋嗌交嗌到要雙方 block埋對方個 WhatsApp。」朱慧敏和 Eddie更坦言雙方為傾婚事而冷戰足足一個月。
信冇偷食唔代表嫁硬
雖然 Eddie日前就偷食一事，表示已得到朱慧敏原諒。而朱回應傳媒亦指「除非捉姦在牀」，否則依然會信男方。但其實二人由拍拖至今，溝通一直有問題。每次鬧交，男方便會玩失蹤。上月朱慧敏生日，亦因雙方正處於冷戰期，男方冇陪女友之餘，更被捉到正偷會「長腿 G.E.M.」。難怪朱慧敏說：「無可否認佢（ Eddie）係一個好人，亦信佢冇對自己唔住。不過我哋之間仲有好多問題要解決，結唔結婚仲係言之過早。」
婚前偷食不結即分
正所謂「十個男人九個滾，剩番一個仲諗緊」，男人偷食乃兵家常事，但往往遭踢爆後，事情總是會戲劇性的發展，不選擇分開的就會結婚。
鍾舒漫
不下一次被拍到夜蒲溝女的吳浩康，就在婚前，再被斷正當街攬啜巨胸妹 Yvette。心死的鍾舒漫立即發表「單身宣言」，表示與吳浩康回復普通朋友關係。
周慧敏
08年，倪震被拍到在中環夜店啜爆城大女生張茆，事後宣布引咎與周慧敏分手，但一星期後二人竟戲劇性宣布結婚。
|
鍾意就快D Share啦！
|
|
|
