《選戰》口碑好，港視原定原班人馬開拍《選戰 2》，更叫劇中李心潔、廖啟智、王宗堯等要角預留四、五月檔期，但據知各演員至今仍未收到拍攝通告，令已預留檔期的演員感到無所適從。而智叔亦曾承認：「王生一早問過我意見，想開《選戰》前傳或續集，佢開拍我都會考慮接拍。」
娛樂喧
港視劇九月清倉 《選戰 2》難產
港視不少劇集，無論質素、口碑均不俗，可惜在銀根短缺下，港視倉庫現時只剩 7劇未播，至 9月便無以為繼。其實之前《選戰》收視強勁，港視早已放晒風話開拍續集，更 hold埋主角李心潔、廖啟智及王宗堯檔期，講明 5月埋班，但演員至今仍未收到通告，谷到演員一肚氣。有份演出《選戰》的王宗堯在電話中承認：「我知劇本一早出咗，但至今都未收到通知。」
港視開台時，向大台重金挖角，更在將軍澳工業邨建廠房，斥資逾廿億。但隨着不獲政府發牌後，隨即打亂「魔童」王維基的陣腳。
智叔心潔 hold檔期
不過諗頭多多的「魔童」，去年轉做網上電視，劇集《選戰》、《警界線》、《導火新聞線》等均有口碑。原定 2月打算食住個勢，原班人馬開拍《選戰 2》，製作部更 hold晒演員檔期，打算在 5月火速埋位開工。
可惜言猶在耳，埋位卻一拖再拖，搞㷫男女主角李心潔及廖啟智。一知情人透露：「其實編審黃偉強寫完《選戰》後，王生睇完個劇本覺得好掂，已叫佢開工寫前傳同續集，仲叫班 artist hold定個期，話等編審修飾吓個劇本，預計 5月左右開工。嗰時心潔經理人話佢好忙，要睇咗劇本先決定接唔接，咁編審就 send個大綱俾心潔睇。佢睇完都口頭話 OK，同智叔一樣，仲 hold咗個期。點知等到依家，都未收到通知話開工，激到心潔嗰邊死死吓！」
王宗堯：劇本一早出咗
記者日前向本來有份拍《選戰 2》的王宗堯求證，他承認港視曾通知 5月埋位開工：「劇本一早出咗㗎喇，之前係 hold過我個期，你知智叔、心潔個期都好難就呀！但相信未咁快成事。」而向來與王維基私交甚篤的黄日華，則指近日未有跟王生密斟：「睇定啲港視意向先，呢排冇同王生傾偈，我唔急嘅，依家冇乜野心，可以慢慢揀工作。（咁有冇為囡囡芷晴擔心？）佢咁大個人可以自己 handle，除非佢開聲叫我先會幫手。」
剩餘物資
已「停產」拍劇一段時間的港視，現時手頭自家製劇集已所剩無幾。早前有傳港視年中會開拍新劇，但由於銀彈有限，加上申請免費牌照仍未有聲氣，因此製作新劇一直只聞樓梯響。
剩 7劇靠外購劇維生
這邊廂開劇無期，加上網購生意未上軌道，那邊廂港視員工亦擔心飯碗不保。現時港視僅剩 7劇未播，至 9月便要播外購劇來維持。據知有經理人合約的藝人，至今只走剩今年「金像獎」憑《點對點》角逐「最佳新人」的張雪芹及胡烱龍。加上公司唯一藝員經理人亦在日前被辭退，搞到公司個個人心惶惶。
知情人續說：「其實依家返工都冇咩做，大家你眼望我眼等食 lunch、等放工。王生講到明網購嗰邊一日未上軌道，一日都唔會拎錢出嚟搞製作。但佢咁樣咪變相整死我哋囉！佢又唔炒我哋，又唔同我哋透露未來發展，個個都擔心會步亞視後塵俾公司拖糧！」記者曾致電港視發言人求證，但至截稿前仍未得到回覆。
|
鍾意就快D Share啦！
|
|
|
