上海直擊 《葉問 3》頻生意外 甄子丹手腕甩骹 拳王泰臣斷指 [忽然1周 - 1034] 子丹,葉問,葉問 3,甄子丹,MW,

甄子丹同泰臣吹開水先知，原來拳王有個 friend係甄媽媽徒弟（丹爺媽媽喺美國教中國武術㗎！），呢個 friend仲俾咗兩隻《葉問》系列 DVD泰臣睇，泰臣話睇完勁 like，所以先接《葉問 3》。

媽咪姐

上海直擊　《葉問 3》頻生意外　甄子丹手腕甩骹　拳王泰臣斷指

宇宙最強甄子丹，一個打十個，大家都知！不過當化身葉問嘅佢，遇上拳王泰臣，江湖就出現變數嘞。繼上個禮拜，丹爺拍天馬電影投資嘅《葉問 3》一場打戲嗰陣，意外批踭撞到泰臣左手食指骨折斷之後，原來佢自己都打到手腕甩咗骹呀！

媽咪姐有個 friend就喺上海直擊宇宙最強忍住痛繼續拍攝，但眉頭始終都皺一皺囉！陰功豬，心痛死老婆汪詩詩嘞。究竟發生乜嘢事呢？媽咪姐即刻 call丹爺問吓啦，好在佢把聲不知幾精神，仲好開心同媽咪姐講：「我冇乜嘢喎！其實泰臣係我拍戲以嚟最強勁嘅對手，我係佢 fans！當然我要好小心面對佢，因為大家都知佢出拳有幾百磅。事實佢每次出拳嗰陣，我都感受到拳風喺耳仔邊擦過，所以都幾危險！（你打到甩骹，都真係好傷喎！）

「咁又唔關佢事嘅。其實拍每部戲都會受傷。呢次係我同十幾個武師打，本來要出拳打個武師下巴，但我唔想傷到個武師，所以自己轉咗出掌，點知就撞到嚿骨！起初以為冇事，之後發覺手腕有啲痛，仲腫到成個雞蛋咁，連續腫咗 4、 5日。後尾我返香港探我太太，再去睇醫生，醫生話係輕微甩骹。不過因為之後又要同泰臣對打，所以都冇乜休息。」

嘩，丹爺，媽咪姐知你係宇宙最強，但都要小心身體呀！為國爭光呢啲，仲要靠你葉師傅㗎。

甄子丹與拳王泰臣對打係片中重頭戲，導演葉偉信同動作導演袁和平精心設計！

「乒乓波」手

丹爺冇俾拳王打傷，但就同武師打到甩骹。睇吓佢兩隻手有幾大分別！右手腫到成個乒乓波咁，現場工作人員幫佢即場護理。哇，好痛！

即使受咗傷，丹爺休息咗陣，咬咬牙，就堅持繼續拍，同泰臣一樣好專業。

斷骨照拍

埋身肉搏後，丹爺手踭意外撞向泰臣左手食指。拳王都痛到要休息一陣，但好快就繼續拍攝。後尾去醫院先知原來食指骨折。拳王仲搞笑話：「啲人好驚子丹受傷，但今次傷嘅係我，冇人關心我囉。」

老婆力撐

丹爺最錫屋企人，為拍《葉問 3》成日香港、上海兩邊飛，好在有老婆汪詩詩支持，照顧兩個囡囡。

除咗丹爺，譚耀文亦有機會喺戲中做拳王下屬，仲有好多內心戲㖭。阿譚講起勁開心：「泰臣係一個傳奇，亦係我偶像，佢仲好主動請我同佢合照。」

48歲嘅拳王，的確係硬漢，日日健身幾時都維持喺作戰狀態，做佢老婆（右）真係安全感爆燈，身後嗰 3個保鑣都係「造型」嚟啫。

戲入面，泰臣要講普通話，雖然佢努力咁練，但難免要工作人員喺現場舉下貓紙。丹爺笑住話：「佢講得最好嘅一句係『滾蛋』！」

泰臣喺戲中飾演地產商，有個中國養女。唔使埋位嗰陣，泰臣都成日同佢玩，仲教埋打拳呢。鐵漢柔情呀！

教女打拳

鍾意就快D Share啦！

下一篇 》