搶先曝光 澳門銀河完全體 [壹週刊 - 1316 - hotpot] 銀河,M1,

完整版人造沙灘「天浪淘園」，新設空中激流。講真激就唔會好激，但坐在大水泡穿過玻璃管道，又真係幾好玩，而且，玩完，頭唔濕妝唔溶，也實在方便。身後就是新建成的 JW萬豪酒店同埋 The Ritz-Carlton。

登機證

搶先曝光　澳門銀河完全體

澳門進入寒冬，佛誕長假期，咪又係人頭湧湧。

有點似《龍珠》劇情，無論正派反派，跌一跌，火鳳凰重生後，必定變得更加厲害。位於氹仔的銀河綜合度假城，應該是斯路，開幕四年來，不斷進化，今個星期，餘下兩間新酒店正式開幕，加埋天橋直通的「澳門百老匯」，令度假城網羅了米芝蓮星級餐廳與澳門地道街頭小吃於一身，成為終極完全體。向來受歡迎的人造沙灘亦擴充版圖兼且增加新玩意。澳門，打不死。

兩間新酒店　一間豪一間玩浪漫

如果，你話俾你求婚對象知，肯結婚的話，新娘房會係咁樣樣，我相信，女方答應下嫁的機會率，至少激增九倍。

澳門銀河本來已有「銀河酒店」、「大倉酒店」及「悅榕庄」，其中大倉主打和式風情，悅榕庄就係度假 resort，在澳門來說，算好有特色。最新加入陣營是 The Ritz-Carlton和 JW萬豪兩間國際品牌，唔使諗，當然係鬥豪。 JW萬豪共有超過一千間客房，全亞洲最大。一入大堂，一定被巨型藝術品「銀河光影」吸引住，由美籍韓國藝術家 Soo Sunny Park設計，玩盡陽光折射。房間的焦點就一定係浴室，霧化玻璃、恒溫馬桶，小事啦，鏡唔只係鏡，按一下遙控，鏡會變電視。嘩，刷牙洗面都可以留心股票行情或者《武則天》劇情。你知啦，係好重要㗎。不過，當鏡面變成電視畫面的一刻，你一定會聯想起《國產凌凌漆》。信我。

JW房間裝飾擺設不空廢，令人舒服。床夠晒大張，澳門酒店最令人高興，就是這一點。

最底一層的套房最正，因為有個大露台，打開屏風的話，仲可以同隔籬房打通，一齊用長長泳池。一家大細去澳門散心的話，啱晒。

電梯大堂都要有盞巨型水晶燈，你話幾咁豪呢！

房間精華就在這小小熒幕，唔按遙控，它只會是鏡子模樣。喂，袁詠儀呢？

正門大堂的裝置藝術，陰天時，平平無奇，但一好天，陽光射落去，不斷折射再折射，立即令全個大堂煥然一新。係屬於有用的藝術裝飾。

夠豪未？相對於 JW萬豪的霸氣， The Ritz-Carlton以私隱度高及優雅而取勝。踏入大門，乜都無嘅？無一大堆排隊等登記拎鎖匙的人客，當然唔會有一大堆擺低的行李喼，原來，大堂刻意安排位於五十一樓，保證唔會有人唔覺意行過。房間是一貫的高水平，約 250間房，全屬套房，模特兒 Toby一見到，已經嘩了一聲。嘩兩聲是見到宴會廳及新娘房之際。係呀，在香港擺酒，好多時候，新娘房都係得一間房仔，在這裡，足夠讓你跟成班姊妹開派對，布置仲鬼咁浪漫，並唔似香港好多五星級酒店，婚宴布置幾靚都好，新娘房張枱都只係一張白枱布。好多人認為澳門只是新郎開婚前派對的勝地，並不受新娘歡迎。現在，可能要改寫。

呢個係宴會廳擺設的示範。整個度假城，眾多宴會廳最多可容納三千人。男士們會否好驚？

這間是 The Ritz-Carlton最入門級的套房（下圖），這個是當中的浴室（上圖）。我還要說什麼？

兩間酒店位於同一座建築物，地下一層互通，同樣放滿藝術品。

澳門 JW萬豪酒店

房價︰$1,388起/晚

網址︰http://www.galaxymacau.com/zh-hant/jw-marriott-macau

澳門麗思卡爾頓酒店

房價︰$3,088起/晚

網址︰http://www.galaxymacau.com/zh-hant/ritz-carlton-macau

勁多新餐廳　一路食飯一路畫畫最法國

澳門銀河本身就有好幾間當紅餐廳，例如提供自助餐的群芳，幾多人專登過去澳門，就係為咗食呢一個又抵食又多嘢食的 Buffet。

成為銀河完全體後，餐廳總數已多到有成百二間。真係乜都有得食，除非無。知你喜歡去澳門食自助餐，必推介「名廚都匯」。一日之計在於晨，我們就先來看看自助早餐，老師傅在你面前示範即製拉麵，比起就咁急急腳隊落熱湯，是完全另一個層次。但我更欣賞餐廳處理新鮮生果的方法，用玻璃櫃好好保護住，莫講話蚊蟲，連塵都入唔到呀。我突然想起在布吉的五星級酒店，我也要三番四次趕走烏蠅才吃得到一片西瓜。

除了樽裝果汁，也有即搾鮮果汁提供。

我去酒店食自助餐，向來少吃粉麵，因為平日在茶記吃太多。但看到廚師咁樣表演法，點會忍得住唔破戒？食完，不會後悔。

食物是一般早餐自助餐水平，但麵包種類算多，也新鮮熱辣，讚。

只有生果，被放在玻璃箱內，確保衞生。其實，將所有冷盤也用這種方法處理，我想也沒有人會介意。

名廚都匯

價錢：早餐成人$208/ 3-12歲$108

午餐成人$228/ 3-12歲$118（週末$268/$138）

晚餐成人$428/ 3-12歲$218（週末$498/$248）

Ritz-Carlton Cafe的裝修甚有法式小店風味，甜品櫃分隔開用餐區和酒吧區。黑白圖案完全無土豪味。

想再食得貴氣少少？強烈推介 The Ritz-Carlton Cafe。法國菜，但一啲都唔嚴肅，仲好好玩。駐場畫家會晚晚幫食客免費畫漫畫肖像，十五分鐘左右就搞掂一幅，嘩，使唔使咁法國先？食物又如何呢？必食推介居然不是什麼生蠔或者羊架，而是一杯朱古力？對，超濃郁朱古力加大大嚿忌廉，細細杯都好邪惡，講明最好一上枱即刻影相先，視覺效果最震撼，然後，一啖飲清。個人認為，比起同場其他幾間跟香港一樣的米芝蓮餐廳，更加吸引。

香煎鴨肝配烤桃子、榛子和楓糖漿$108當然不是只有朱古力飲品才是值得推介的招牌菜。

手切生牛肉$138精華其實在大廚特製的醬汁上，至於係用什麼材料製成？我問唔到，佢唔肯答。

Surprise Chocolate$98內層是草莓蛋白酥皮，不算太甜，但味道複雜，一層接一層。

Valrhona熱朱古力$98（連牛角包）細細杯就夠了，忌廉和朱古力的分量最夾，令味道最突出。飲完，仍然留有餘韻。即使，心內會湧起一分內疚。

畫家來自法國，本身是烏克蘭籍，畫得可愛，最重要是畫得快，不會令你坐到火滾。

將澳門變成台北夜市

澳門銀河行走高貴路線，以為「澳門百老匯」一定一樣啦，仲唔係紐約風情咩？竟然相反，係行本土路線，仲要係攤檔 feel，十幾蚊十幾蚊一樣嘢食嗰隻，今時今日的澳門，簡直是奇聞。

澳門百老匯內有一條百老匯大街，兩邊都係餐店，不是什麼貴價精緻菜式，但有澳門老店榮記豆腐花，又有台北名店度小月第一次登陸澳門，即將仲會有新馬路成記粥品、皇冠小館等澳門地道餐店，香港亦派出代表添好運與阿鴻小吃等，陣容鼎盛。

都未夠平民化？除了餐店，大街上，更有十數個小攤檔，賣小食。可惜試業當日落大雨，大部分小食檔都開唔到鋪，不過，有台式的紅豆鮮奶燒，又有鹵味，仲有滑到爆的炭燒奶茶，已經令我感動到想流淚。攤檔的老闆們個個都好傾到死，完完全全有晒台北夜市的風味。香港沒空間發展的，在澳門，反而找得到。

紅豆鮮奶燒，$30一份，呢個有名碼實價了。不夠甜，但熱度搭夠，氣氛搭夠。

我去台北必吃的度小月，澳門開分店，原汁原味，擔仔麵只售$15一碗。「係呀，當宣傳囉。」

非常甜蜜，狀似情侶的一對，賣自家製冰條，只得一種口味，賣幾錢？「未知呀，未決定呀！」

真係用炭爐燒出來的奶茶，未飲已經覺得香，飲落口就超滑，賣幾錢？「十幾蚊啩！」

澳門極出名的老店榮記豆腐花，以後唔使專登去新馬路幫襯。

扮呂奇扮陳寶珠跳街舞

好了，明明賣點是台北夜市，咁點解叫澳門百老匯，唔叫澳門士林，或者澳門師大？因為澳門百老匯有一個坐滿可達三千觀眾的舞台，在澳門度假城，無番一個真真正正並非賭場的「娛樂場」，又點似樣？多了這個即將啟業的「百老匯舞台」，加埋原有的「銀河影院」，娛樂方面的潛力，至少可以比得上威尼斯人和新濠天地。

佔先的，可能是每逢週末舉行的「百老匯搖滾秀」，一班打扮晒的街頭藝人，在流動卡車搭建的舞台上，表演踩高蹺、雜耍，仲拉埋遊客一齊載歌載舞。想搶鏡的話，可以學習范冰冰們以出席康城影展的裝扮來華麗轉身。

話明玩地道，除咗會狂播《 I really like you》之類蒲場大熱歌曲，仲會播《難兄難弟》，然後有一堆寶珠呂奇出現跳舞，我應該叫阿媽來做模特兒。

澳門銀河

地址：澳門路氹城望德聖母灣大馬路

電話：+853-2888 0888

網址：http://www.galaxymacau.com

澳門百老匯都有一間百老匯酒店，最平$800幾竟然可以租到間房，仲可以用埋澳門銀河的設施，抵到爛晒。

澳門百老匯

地址：澳門路氹城蓮花海濱大馬路

電話：+853-8883 3338

網址：http://www.broadwaymacau.com.mo

鍾意就快D Share啦！

下一篇 》