2015年5月28日星期四

與無綫傾掂數提前解約 50歲郭政鴻北上發展：一定要向錢看無綫,郭政鴻,

【效力30年】與無綫傾掂數提前解約 50歲郭政鴻北上發展：一定要向錢看

2015-05-28 21:35:00

郭政鴻離開效力近30年的無綫。（資料圖片）

離巢無綫的藝人越數越多，繼林峯、高鈞賢、石天欣、何傲兒、李司棋及將約滿的胡杏兒之外，連效力無綫30年的郭政鴻，最近亦與大台「傾掂數」提前解約。據聞有內地製作公司開出年薪過百萬利誘郭政鴻加盟，人工三級跳，令向來採取低薪政策的無綫難以留人。

郭政鴻是85年藝員進修班出身，多年來任勞任怨，無論是深宵重播的《大時代》演丁利蟹，還是黃金時段新劇《潮拜武當》扮低智商角色「蕃薯」，都盡心盡力去演。近年無綫走得人多，鴻仔雖然有機會簽包薪藝員合約，惜產量不多，估計月薪僅二、三萬元。有傳鴻仔為養一家四口，曾私下接內地登台騷賺外快，即時觸動大台神經，早前被高層樂易玲召見，最後鴻仔要「被辭職」提早5個月解約。

身在內地的鴻仔接受《蘋果》電話訪問時表示：「哦……梗係唔係（私下接job），黐線！咁啱我喺內地同馬來西亞都會有新發展，撞到同公司合約有少少抵觸。咁啱無綫幫我安排嘅新劇又疊住咗，我冇理由唔做公司嘢做出面嘢，然後又白白出人工畀我㗎。我喺公司做咗差唔多30年，都想有新發展、新機會，同樂小姐商量後，佢提議早幾個月解約，但之後有合適劇集或角色都會再返嚟，只係用另一種合約模式囉。」

鴻仔強調雙方在和平氣氛下進行，並感激公司台前幕後一直提攜，他說：「有問題都唔會幫手做兩次宣傳（潮拜武當）」問是否有內地製作公司以年薪百萬利誘？他笑說：「未講得住，我家庭負擔都好大。我50歲嘞，呢個階段一定要向錢看，唔可以為追求理想去拗氣，一定要係公司做出頭，我都想踏足出去試吓，點都叫行過出去吖。」