許偉堅是香港豬肉行總商會理事長，愛豬肉也愛紅酒。記者向他送上一杯，他只敢聞、不敢喝：「肉檔唔食得嘢，食環署拉㗎。」
坦白講
風度翩翩豬肉佬
許偉堅，六十五歲，豬肉佬。十二歲入行，由打工變肉檔老闆，每年營業額高達五百萬元，但工作朝七晚七、全年只休年初一，全身油膩膩又有勁臭豬肉味。佢話，豬肉佬，等緊你。
周星馳喺電影《國產凌凌漆》話：「我係一個風度翩翩嘅豬肉佬。」我呢個豬肉佬呢，放咗工會飲吓紅酒咁啦，得閒又會拖住我老婆隻手，跳吓國際標準舞，即係要著老西跳嗰啲。邊個話豬肉佬一定有個大肚腩、擔住口煙、粗口爛舌。我呀，唔敢話自己好有型，但你睇我又高又瘦又有鬍鬚，仲識得講英文㗎。
依家嚟買餸嘅好多都係外傭，佢哋唔識講廣東話手指指，我就問佢哋：「咪治？」（指 mince，免治），跟住我又問：「喂攝乎？」（指 receipt，收據），個個都明我講乜。其他街坊、師奶嚟幫襯，我會問佢哋想食咩，煲湯嘅，我就叫佢買豬骨啦，仲會問多句：「食唔食湯渣？」因為豬骨有唔同價錢和味道。
我自問係一個敬業樂業嘅豬肉佬，雖然呢份工令我成世人個身都有陣好臭嘅豬肉味，而且成手油膩膩。放工逼車時，左右隔籬會皺住眉眼超超，搞到我唔敢望人。我記得好多年前追我老婆，同佢出街之前，我特登先返屋企由頭洗到落腳。好彩佢無介意我係豬肉佬啊，如果我同賣魚佬比，唔知邊個臭啲呢？
我從來都無因為自己係豬肉佬而自卑……應該話，有頭髮邊個想做鬎鬁。我讀得書少，十二歲就出嚟做嘢，第一份工係人哋介紹做豬肉買手，日日出入屠場，初初見人殺豬嚇到面青青。後來我知道無得揀要頂硬上，因為喺六十年代，我呢個草根都係隻豬，為搵食，只能肉隨砧板上。
最靚豬腩肉
之後我正式喺街市做豬肉佬，由屠房來到肉檔嘅豬，已斬成六大件，分頭、中、尾。頭就有脢頭和西施骨、中就有豬扒、尾就有全瘦肉和豬尾，各種豬肉共超過四十種。好了，要拿刀斬啦，我七歲已煮飯俾屋企人食，刀對我嚟講一啲都唔陌生，但拿起四磅重嘅豬肉刀唔係講笑，初初咪話唔驚。
我起初用豬肉刀剷吓皮、刮吓毛，慢慢掌握豬肉刀嘅用法就知刀肚（註：指刀鋒中間位置）用嚟切，刀背用嚟斬。依家我望住嚿豬肉，一眼就知要切邊個位。你要廿五蚊瘦肉，我一切，再放落個磅一秤，無多無少，就廿五蚊。點解可以咁準？喂，我做咗豬肉佬五十幾年啦。
豬肉佬其實幾好搵，我記得八十年代日薪五百蚊，所以我三十歲，就有錢開自己嘅豬肉檔，依家每年生意額有五百萬，哈，勁呢。不過呢行咁辛苦，就算依家日薪有九百至一千蚊，都無乜後生仔肯入行。我哋業界想將豬肉佬改名做「肉類分割技術員」包裝吓，但我話講到底，係自己點睇呢份工。我兩個仔女，一個喺屠場做，一個喺我肉檔幫手，好彩佢哋肯繼承我心血。
我覺得，豬肉佬最自豪，係可以好似麥兜咁同人講：你哋每晚返到屋企，有最靚嘅豬腩肉，等緊你。
由你開講
一切好人好事，壞人壞事，先吐為快。
你敢坦白，我敢講。
電郵：voice@nextmedia.com
|
鍾意就快D Share啦！
|
|
|