華泰董事長吳萬善（右）及總裁周易（左），在上市儀式與港交所主席周松崗（中）握手。（《蘋果日報》圖片）
中環人語
華泰廣告嚇怕芬佬
有基金經理睇完華泰證券國內一個畫公仔畫出腸嘅廣告，就冇乜興趣認購華泰嘅新股；廣告術語讀起來十分鏗鏘又押韻——「足不出戶 萬三開戶」；「萬三」唔係廣東話萬三蚊喎，意思係萬分之三，即係話股票買賣佣金只收 0.0003，香港金融界叫「三滴」，以往佣金都有「八滴」，證券行爭生意爭崩頭，減佣吸客至得番「三滴」。
見到咁嘅形勢，芬佬話華泰上市後公布半年業績可能唔錯，因為佣金未減至「三滴」，但之後如何？唔樂觀喎！所以華泰證券雖貴為新股凍資王，但雷聲大，雨點小，首日掛牌升幾個%，每手僅賺兩嚿幾，夠飲餐茶囉。
霍孫照稿讀
冇創過業嘅霍孫霍啟剛出席貿發局分享創業心得，認真搞笑，貴為香港青年聯會主席，經常都要公開「讀稿」演講，原來霍孫以往在高盛和所羅門兄弟做分析員時就經常要讀稿，讀俾邊個聽？咪佢阿爺霍英東呢個潛在大客，睇吓個孫仔可唔可以 impress到阿爺攞嚿錢來投資熱吓身；相較於其他冇咁富貴嘅二、三代，入投資銀行做暑期工，一般都係做「影帝」，同埋「影后」，影乜，影印囉！霍孫可以對住阿爺讀稿，已屬另一層次。
金融逍遙客 人靠賣相
游走於中港台併購、私募投資的金融多棲動物，現為多間上市公司主要股東及董事。
年紀愈大，見人愈多，就愈覺得「相由心生」這四字真是古人智慧。雖然小時候父母教導不要以貌取人，但經歷的事多了，總結下來，以貌取人真有一定可靠性。
環顧香港政壇，各政客政論水平，沒有令人印象深刻，論相貌卻各有突出之處。逍遙客之見，從政僅靠學歷或 IQ只是基礎，一副好賣相才是關鍵。現時政棍政毛當道，日嘈夜吠，每日看電視上那幾副尊容，就恨不得馬上轉台以免影響食慾。無論建制、民主派、造反派或港式紅衞兵，百思不得其解，點解連搵個四正啲嘅都難呢？
先講吓所謂特首首席智囊的佳叔，講嘢一嚿嚿，一句話也要斬件碎上，永遠聽唔到一句完整句子，肚裡更有墨水，都冇法讓聽眾有耐性等佢講完。還有不斷為市民提供茶餘飯後笑料的樹根叔，及有事無事都先藐嘴藐舌的掃把頭。這邊廂民主派的袋巾梁，大熱天三十幾度，即使去濕𣲷𣲷的深水埗街市與小販握手，也永遠英式三件頭加小袋巾。看他藏於金絲眼鏡後的瞇瞇小眼，令人想起抗日片中那個師爺翻譯官多過政治家！較好的是新進鬥士四眼鋒，雖中學程度口才了得，其貌不揚但佔中期間對住 CNN，英文對答流暢，一定令那幾個鬼鬼祟祟的學聯發言人無地自容。間中穿插還有揮舞英國國旗的猥瑣男，身邊有朋友笑謂，看到他就有舂佢幾拳的衝動，他衝軍營被判入獄，必有不少人叫好。
打開電視，香港政壇就像一個活生生的馬戲團，嗚呼哀哉，就算冇真普選，究竟什麼時候能還我普羅大眾，一個較有美感的政治畫面？對着電視不想轉台的那一天，應就是香港政治有希望的一天！
中環寸嘴 最怕你唔來
搵到錢梗係食好嘢，去九龍半島酒店間嘉麟樓食個晏仔，呢度啲人冇中環區咁急，可以慢慢歎，食餐安樂茶飯。點番壺靚茶先，呢度有成三十款任揀，梗係要番壺六安六安冇普洱咁濃，家陣出面好少有得飲。招呼我個妹頭（註：即侍應）幾醒目，喺銅鑼灣怡東酒店過嚟，問佢有冇 serve過中巴個老細，識答話：「有呀，顏二少嘛！」嗱，啲伯父緬懷自己後生嘅日子，特別鍾意人哋稱呼做「乜少」、「物少」。
嚟呢度，一定要叫柚皮，個廚以前喺福臨門 train過，最叻做柚皮；半島叫佢啲廚房佬 make sure長年都要有貨（柚皮），半島喺泰國、菲律賓都有酒店，嗰度出產碌柚，所以全年有得食㗎！
點多味阿拉斯加蟹，紅燒一味，酸梅子薑蒸又另一味，再開埋支白酒，唔好以為隻蟹好大隻喎，唔「𢲲」肚。我叫個廚同我將剩咗嘅酸梅醬汁，炒個米粉，天口熱，開胃好多！嘩！擺到成枱都係。隔籬枱條股票佬帶班𡃁嚟食，一入嚟眼睥睥我添，聽到佢喺度猛講馬雲啲股票，不過唔似搵到食喎，佢全枱都係放點心！
粉絲 Micky又來信，醒我另一首詩（貶篇）：
「肥仔一日食到黑 侍仔都係有人格
宣傳吓都照頭淋 冇你老豆點會發
勸君來將寸嘴改 他日好景或不再
風水輪流轉又轉 謙卑永得眾人愛」
回應：呢位粉絲，醒我苦口良藥，嗒落有餘韻添！出得嚟行，我預咗要受，唔怕你精，唔怕你呆，最怕你唔來！不過我同你講，有啲肉哋先係老細格，戴卓爾夫人 82年 PK後，我要喺北美開山劈石呀，嗰啲辛酸不足為外人道。
邱達根與陳展鵬
荔園翻生，呢期邱達根（左）好旺；不過有人誤會咗佢係藝人陳展鵬（右），大家睇吓有幾分似？
金牙大狀講嘢 亂掟公帑出街
鬍鬚曾為經濟把脈，話少咗遊客嚟，零售及酒店業嘅失業率較舊年微升零點五個百分點，驚咁會打擊整體就業。不過，話口未完，佢又指出二至四月，整體失業率下跌，總就業率更按年上升。咁少咗遊客到底主吉定主凶？
鬍鬚曾冇講，但就撥多八千萬元俾旅發局去吸引多啲遊客嚟。如果遊客真係多番，會唔會反而令多啲人失業，以致整體失業率升番呢？
一田百貨莊偉忠老早講咗俾大家知，現今事浮於人，冇一行人齊。少咗遊客，話唔定零售及酒店以外嘅行業可以因而請夠人手，做多啲生意呢。咪恃住庫房有錢就係唔係都亂咁掟公帑出街至得㗎。信吓市場嘅自動調節機制都得啩，老友。
中環人語迷你版
“如政改通過，恒指可上三萬點以上”
估中邊個中環人講呢句說話，送你 plantronics. Voyager Legend Signature Black藍牙耳機一個有意參加者，請於六月三日（星期三）下午一時後，將答案、姓名及聯絡電話電郵至centralman@nextmedia.com小宗只接受電郵，郵寄免問。
本刊員工及直系親屬不得參加。
為求公平及杜絕偷步搶答起見，請於每個星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於下期本欄揭曉。
廣告時間
你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅冤屈或過癮八卦事，爆俾《壹仔》財經組知，一切報料，均會保密！
爆料熱線/whatsapp： 6829 5929
|
鍾意就快D Share啦！
|
|
|