網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2015年6月4日 星期四

李鍾碩爆咪  BEAST爆肌 同場打對台 [壹週刊 - 1317] 李鍾碩,M1,



日韓到會

李鍾碩爆咪  BEAST爆肌 同場打對台

6月,香港熱鬧到不得了,每個星期都有韓星襲港,而且仲要打孖嚟,剛剛的星期六,亞洲博覽館更加有兩場騷打對台,一邊係韓國男子組合 BEAST首次舉行香港演唱會,一邊係韓劇小天王李鍾碩開 fans meeting,自己人打自己人!

兩邊出盡法寶冧 fans, BEAST勁歌熱舞係意料之內,連賣演技嘅李鍾碩都開金口娛賓,雖然表現一般,不過誠意搭夠!

播片重溫經典作

李鍾碩有「韓劇小天王」之稱,拍過多套電視劇都收視長紅,由《聽見你的聲音》、《 Doctor異鄉人》到最近嘅《 Pinocchio》,套套都有口碑之餘仲收得,可以話韓劇冰河期嘅一個異類。有咁多套人氣韓劇喺手,累積大班 fans,梗係開 fans meeting巡迴一下搵番筆!今次李鍾碩只係第一次嚟到香港開 fans meeting,其實演員開騷,可以做嘅唔多,李鍾碩就選擇同 fans一齊回顧佢嘅代表作,播出多段作品入面嘅經典場面,佢就分享吓自己拍攝時嘅趣事,好似佢話自己唔鍾意飲酒,不過導演叫佢扮飲醉酒,於是佢同朴信惠就自創咗一個好萌嘅甫士,現場示範一下已經叫聲不絕。播片當然唔少得同女主角錫錫嘅場面,無論喺《聽見你的聲音》同李寶英,定係喺《 Pinocchio》同朴信惠, Fans一樣叫到拆天!

李鍾碩被稱為韓流「新四大天王」之一,另外三位天王金秀賢、李敏鎬、金宇彬一早已經攻陷香港,而家先第一次嚟香港開見面會,李鍾碩算遲喇。

抽得中上台可以近距離接觸偶像,真係好難控制情緒,呢位妹妹「一擁而上」,好彩李鍾碩招架得住。

唱歌走音 fans受落

睇完片, fans梗係想成為女主角!開始玩遊戲部分,抽幾個 fans上台,同佢哋重演劇中經典場面。以為有得對住李鍾碩做戲?錯喇,只係做番其中一格,係靜態,影番張即影即有做留念。雖然只係短短幾分鐘,不過李鍾碩好周到,全程拖住幸運兒,握手抱抱完全唔吝嗇。平時見佢外表好似好 cool,原來對 fans好好,台下又暈得一陣陣。之後再請幾位 fans上台同佢扮約會,有位女 fans仲帶埋爸爸嚟見佢,原來爸爸都係佢 fans,搞到李鍾碩鬼咁開心。尾聲時,李鍾碩開金口唱歌,其實佢對自己嘅歌藝無乜信心,果然「不負眾望」,第一句已經甩嘴,之後仲走音忘記歌詞, Fans就非常受落,仲大叫 encore,不過唱多首都係走音,唯有以笑遮醜。其實李鍾碩始終係演員,唱歌都係旨在氹吓 fans,不過 fans最想睇到嘅係佢嘅新劇,佢話而家係空白期,俾自己抖吓,揀吓劇本,希望快啲有新劇俾大家睇。

同 fans合照係指定動作,李鍾碩都交足功課,搭住膊頭影就梗係唔少得。

李鍾碩表情多多,喺台上不時扮鬼臉、 V字手勢等等吸引觀眾,呢一下托頭引來不少尖叫聲!

人無完美,高富帥又好演技,原來係五音不全,不過 fans完全無介意,見到佢一臉尷尬,仲話好可愛好萌!

見面會上不停播片,淨係《 Pinocchio》已經播咗五小段,其實 Fans都睇到熟晒,不過可以同 Oppa同場喺大熒幕睇又係特別開心。

BEAST勁歌熱舞晒肌肉

喺另一邊廂,韓國男子組合 BEAST舉行演唱會。六位成員尹斗俊、張賢勝、孫東雲、龍俊亨、李起光、梁耀燮之前曾經嚟過香港表演,不過正式開演唱會就係第一次。可以霸晒成個場同 fans作近距離接觸, BEAST特別開心,全場氣氛熱烈。一開始先以幾首大熱快歌《 Good Luck》、《 Shadow》、《 Special》等等炒熱全場。 BEAST跳舞一向強勁,唱功一樣了得,幾位成員輪流表演海豚音,真係比其他韓國男團優勝。嚟到香港個個都學廣東話,「好掛住你哋」、「我愛你」、連「今晚 call我」都識, fans當然冧晒。適逢成員孫東雲即將生日, fans同佢慶祝,令 BEAST非常感動,仲話好後悔咁遲先嚟開演唱會!梗係啦,唔知韓流熱潮幾時會過,最好梗係快啲再嚟開騷

BEAST第一次喺香港開演唱會,賣大包益 fans,人氣成員張賢勝呢一下拉起件衫騷吓排朱古力, fans點抵擋得住。

BEAST出道六年,被外界稱為跳舞最齊嘅男團之一,今次嘅演唱會都係以快歌居多。

6月 6日係成員孫東雲(右三) 24歲生日, fans為佢提早慶祝,個蛋糕都係 fans準備,好有心思。

曾經同 KARA成員具荷拉拍拖嘅龍俊亨人氣最高, Solo一出場, fans們叫到拆天。

演唱會上, BEAST表現親民,喺台邊同 fans玩自拍,非常識做。

鍾意就快D Share啦!