15年 5月
側面睇，微笑時下巴線條緊緻，但當擘大口講嘢，塊面硬到唔郁得。
探熱針
重播《他來自江湖》 毛舜筠重手執樣搏吸金
大台重播《大時代》，唔單只帶旺午夜時段收視，更帶挈大佬孝（邵仲衡）等一班有份演出的藝人，快錢自動波送上門。
舊劇多人 like，大台打算緊接在同一時段，推出另一套神級劇《他來自江湖》，擔正的毛舜筠睇準重播招財良機，的起心肝為五十五歲容顏進行大修葺，可惜因為出手太重，搞到大細鼻窿、嘴角僵硬，好膠！
回春有法
現年五十五歲的毛舜筠，為了做廿四孝媽咪，近年逐步減產，甚至接近全面停工，陪廿歲大女令山到加拿大升學。
今年初毛舜筠返港與朋友聚會，大家不約而同讚她又靚又後生，當事人解釋是加拿大空氣環境好，加上有代言健康產品進補，所以分外容光煥發。
放假充電，雖然有回春功效，但有不少「同道中人」，一眼就睇穿毛舜筠是經過人工修葺。「皮光肉滑，去到呢個年紀，啲細紋仲可以咁淡一定有執過吓，但 Mo姐好醒，超級輕手，所以唔係執開樣嘅人，未必一眼睇得出。」一名毛舜筠的友人透露。
落重藥
四月中大台重播《大時代》，劇中無論是丁家或方家的演員，近日均成為活動搶手貨，其中已退出娛樂圈多年的大佬孝（邵仲衡）曝光率奇高，日前他與丁益蟹（陶大宇）出席活動時透露，工作量持續上升：「保守估計有七位數進賬。」
神劇帶旺人氣，本月中播完《大時代》後，將緊接重播《他來自江湖》。有辦你睇！在娛樂圈打滾近四十年的毛舜筠心中有數，為了劇集重播後的無限錢途，再度出手為五官大肆修葺。
上週四（五月二十八日）下午一時，毛舜筠離開沙田住所，揸車到蘇志威位於觀塘的跳舞學校學跳舞，下午三時，跳到身水身汗的她準備攞車離開，素顏戴超，雖未能飽覽人工芳容，但邊大邊細的鼻窿，雙唇兩旁繃緊，一清二楚。
上週六（三十日），毛舜筠與老公區丁平以及細女亦山一家三口到圓方出席《唱出我天地》首映，在化妝遮掩下，毛舜筠的大細鼻窿情況略有改善，但下半截的硬膠面，卻無所遁形。毛舜筠貪字得個硬！
人工美
貪靚無分年齡性別，近年不少藝人紛紛加入人工修葺行列，企圖留住靚樣，但亦有唔少人走火入魔，衰過以前。
|
鍾意就快D Share啦！
|
|
|